Deuteronomy 18

Amharic Gofa GFBEVF (ጌሻ ማፃፋ)

1ሌወ ኮቸ ግድዳ ካህነታስነ አትዳ ኤንታ ኮቻስ እስራኤለ ግዶን ላታ ቢት ባዋ። አሳይ ጎዳስ ሺሽያ ፁሳ ያርሾይ ኤንታ ግሾ ግድያ ግሾ እያ ምሸ ዳና።

2ኤንታዉ ኤንታ እሻታ ግዶን ላት ዴና፤ ጎዳይ ኤንታዉ ግዳይሳዳ እ ኤንታ ላታ።

3ኮርማ ዎይኮ ዶርሰ አሳይ ያርሾስ ሺሽዳይሳፈ ካህነታ ግሾይ ሀይሳ፤ ምሳይ፥ ጋጮይነ ኡሎ አሾይ ኤንታዉ እመቶ።

4ነ ካፈ፥ ዎይንያፐነ ዛይትያፐ ኮይሮ ጋክዳ አይፍያነ ነ ዶርሳ እክስያፐ ባይራ ካህነታስ እማ።

5ሌወት ጎዳ ሱንን መርናዉ ካህነ ግድድ ኦና መላ ነ ኮቻ ግዶፈ ጎዳይ፥ ነ ፆሳይ ኤንታ ዶርስ።

6እስ ሌወይ እስራኤለ ቢታን ደእያ እስ ካታማፐ ደንድድ፥ ጎዳይ ዶርያ በሳ ባናዉ ኮይኮ፥

7እ ብያ በሳን ደእያ ሌወት ጎዳ ስንን ኤቅድ ኦይሳዳ እካ ጎዳ ባ ፆሳ ስንን ኤቅድ ኦ።

8ባና ጋክያ ግሹዋ ኤክዳባ ግድኮካ፥ ካህነት ጎኤትያ ኡባ ኤንታራ ግና ሻከትድ ኤኮ።

9ጎዳይ ነ ፆሳይ እምዳ ቢታ ነ ገልያ ዎደ ሄ ቢታን ደእያ አሳይ ኦያ እፀትዳ ኦሶታ ኦፋ።

10ባ አደ ናኣ ዎይኮ ማጫ ናእዉ ያርሾስ ታማን ፁግያ ኦንካ ነ ግዶን በንቶፎ። ብት፥ ማራጨ በኤይ፥ ማሮተይ፥ ህግሸይ፥

11ሞይትለ በኤይ፥ ሀይቅዳ አሳ አያና ፄገይ፥ ዎይኮ ሀይቅዳ አሳ አያናራ ኦደተይ ነ ግዶን ደኦፖ።

12ሄሳ መላባ ኦያ ኦንካ ጎዳ ማታን እፀትዳ አስ። ኤንቲ ሄሳ መላ ቱና ኦያ ግሾ፥ ጎዳይ ነ ፆሳይ ሄ ካዎተታ ነ ስንፈ ጎዳና።

13ሽን ነኒ ጎዳ ነ ፆሳ ስንን ቦረይ ባይናይሳ ግዳ።

14ነኒ ላታናዉ ብያ ቢታን ደእያ ካዎተት ሙሩነይሳታነ ብተይሳታ፤ ሽን ነ ሄሳ ኦና መላ ጎዳይ ነ ፆሳይ ነና ድግስ።

15ጎዳይ፥ ነ ፆሳይ ነ ኮቻ ግዶፈ ታ መላ ናበ ነዉ ደንና። ነ እ ገይሳ ስአ።

16ኮሬባ ዙማ ቦላ ነ ሺቅዳ ዎደ ጎዳ ነ ፆሳ ሀይሳዳ ያጋዳ ኦይቻዳሳ፤ “ታ ሀይቆና መላ ጎዳ፥ ታ ፆሳ ግርሳ ዛራዳ ስእከ፤ ሀ ዎልቃማ ታማ ዛራዳ በእከ” ያጋዳሳ።

17ጎዳይ ታኮ፥ “ኤንቲ ቱማ ግዶሶና።

18ታ ኤንታ ኮቻ ግዶፈ ነ መላ ናበ ኤንታዉ ደንና፤ ታኒ ታ ቃላ እያ ዶናን ዎና፤ እ፥ ታ ኪትያ ኡባ ኤንታዉ ኦዳና።

19እ ታ ሱንን ኦድያ ታ ቃላ ስኦና ኦናካ ታ ኦይቻና።

20ሽን ታ ኪቶናባ ታ ሱንን ኦድያ ዎይኮ ሀራ ፆሳታ ሱንን ኦድያ ሄ ናበይ ሀይቆ” ያግስ።

21ኔኒ፥ “ናበይ ኦድያ ቃላይ ፆሳፈ ግዶናይሳ ታ አይብን ሻካዳ ኤራኔ?” ያግኮ፥

22ሄ ናበይ ጎዳ ሱንን ኦድዳ ቃላይ ፖለቶና እፅኮ፥ ሄስ ጎዳይ ኦድቦና ቃላ ግደይሳ ኤራሳ። ሄ ናበይ ኦድያ ቃላይ ዎርዶ ግድዳ ግሾ እያ ያዮፋ።

← Chapter 17 Chapter 19 →