2 Samuel 9

Amharic Gofa GFBEVF (ጌሻ ማፃፋ)

1ዳዊቲ፥ “ዮናታና ግሾ ታኒ እያዉ ኬሀተ ኦናዉ ሳኦላ ኬፈ አትዳ አስ ደእሻ?” ያግድ ኦይችስ።

2ሄ ዎደ ሲባ ጌተትያ እስ አይለይ ሳኦላ ሶን ደኤስ። እ ዳዊታ ስን ያና መላ ፄግን፥ ካዎይ፥ “ኔኒ ሲቤ?” ያግድ ኦይችስ። ሲብ፥ “ኤ፥ ታኒ ነ አይልያ ሲባ” ያግስ።

3ካዎይ፥ “ፆሳ ኬሀተ ታኒ በሳና መላ ሳኦላ ኬፈ አትዳ አስ ባዌ?” ያግስ። ሲብ፥ “ናምኡ ቶሆይ ስልዳ ዮናታና ናይታፐ እሶይ ሀኖ ጋካናዉ ፓፃ ደኤስ” ያግስ።

4ካዎይ፥ “እ አዉን ደኢ?” ያግስ። ሲብ፥ “ሎዶባራ ጌተትያ በሳን አምኤላ ናኣ ማክራ ሶን ደኤስ” ያግስ።

5ካዎይ ዳዊቲ ሎዶባራፐ አምኤላ ናኣ ማክራ ሶፐ መምፕቦስተ ኤህስስ።

6ሳኦላ ናኣ ዮናታና ናአይ መምፕቦስተይ ዳዊታኮ ይድ፥ ዳዊታ ስንን ዝግድ ቦንችስ። ዳዊቲ፥ “መምፕቦስተ” ያግድ ፄግስ። እ፥ “አበ ታ ጎዳዉ፥ ታ ነ አይልያ” ያግስ።

7ዳዊቲ፥ “ያዮፋ፤ ነ አዋ ዮናታና ግሾ ታኒ ነዉ ኬሀና። ነ አዋ አዋ ሳኦላ ጋድያ ኡባ ታኒ ነዉ ዛራና፤ ቃስ ኔኒ ኡባ ዎደ ታ ጋይታፐ ማና” ያግስ።

8መምፕቦስተይ ዝግድ፥ “ሀይቅዳ ካና ዳንያ ታና ኔኒ ዉዳዳ ፄላናዉ ነ አይለይ ታኒ ኦኔ?” ያግስ።

9ካዎይ ሳኦላ አይልያ ሲባ ፄግድ፥ “ሳኦላባነ እያ ሶ አሳባ ግድዳባ ኡባ ታኒ ነ ጎዳ ናኣ ናኣስ እማስ።

10ነ ጎዳ ናኣ ናአይ ማና መላ ኔኒ፥ ነ ናይትነ ነ አይለት እያ ጋድያ ጎይድ፥ ካፅዳ ካ እያዉ ኤህተ። ግዶሽን፥ ነ ጎዳ ናኣ ናአይ መምፕቦስተይ ኡባ ዎደ ታ ጋይታፐ ማና” ያግስ። ሲባስ ታማነ እቻሹ አደ ናይትነ ላታሙ አይለት ደኦሶና።

11ሲብ፥ “ኔኒ ታ ጎዳይ፥ ካዎይ ነ አይልያ ኪትዳ ኡባ ታኒ ነ አይለይ ኦና” ያግስ። ሄሳ ግሾ፥ መምፕቦስተይ ካዋ ናይታፐ እሱዋ መላ ካዎ ጋይታፐ ሜስ።

12መምፕቦስተስ ምካ ጌተትያ ጉ ናእ ደኤስ። ሲባ ሶን ደእያ አሳ ኡባይ መምፕቦስተስ አይለ ግድዶሶና።

13ናምኡ ቶሆት ስልዳ መምፕቦስተይ ኡባ ዎደ ካዋ ጋይታፐ ምሸ የሩሳላመን ደእስ።

← Chapter 8 Chapter 10 →