2 Samuel 24

Amharic Gofa GFBEVF (ጌሻ ማፃፋ)

1ጎዳ ሀንቆይ ቃስካ እስራኤለ ቦላ ኤፅስ፤ ጎዳይ ዳዊታ ኤንታ ቦላ ደንድ፥ “ባዳ እስራኤለነ ይሁዳ አሳ ታይባ” ያግስ።

2ሄሳ ግሾ፥ ካዎይ ቶራ ሞጮናታ እዮኣባነ ባራ ደኤይሳታኮ ሀይሳዳ ያግስ፤ “እስራኤለ ኮቻታ ዳነፐ በርሳበ ጋካናዉ ታኒ ኤራና መላ እስራኤለ አሳ ብድ ታይብተ” ያግስ።

3ሽን እዮኣብ፥ “ጎዳይ ነ ፆሳይ ሀ ደእያ አሳ ቦላ ፄቱ ኩሸ ጉጆ! ሄሳ ታ ጎዳ፥ ካዋ አይፈይ በኦ! ሽን ታ ጎዳይ፥ ካዎይ አይስ ሄሳ መላባ ኦናዉ ኮዪ?” ያግስ።

4ሽን ካዋ ቃላይ እዮኣባነ ቶራ ሞጮናታ ፆንን፥ ኤንቲ ካዋ ስንፈ ከይድ፥ እስራኤለ አሳ ታይባናዉ ብዶሶና።

5ኤንቲ ዮርዳኖሰ ፕንድ ዱገሀ ባጋን ደእያ፥ ዛንጋራ ግዶን ደእያ አሮኤራ ካታማን ዱንካንዶሶና፤ ያፐ ጋደ ካንድ እያዜራ ጋክዶሶና።

6ያፐ ኤንቲ ጋላዳነ ህተታ ቢታን ደእያ ቃደሳ ብዶሶና፤ ያፐ ቃስ ዳነ ብዶሶና፤ ያራ ስዶና ጋክዶሶና።

7ያፐ ደንድድ፥ ፅሮሳ ሚፃነ ህወታነ ካናነታ ካታማ ኡባ ብዶሶና። ዉርሰን ይሁዳ ነገባን ደእያ በርሳበ ብዶሶና።

8ኤንቲ ቢታ ኡባ ዩይሸ ኡዱፉን አጌናነ ላታሙ ጋላስ ጋምእድ፥ የሩሳላመ ስምዶሶና።

9እዮኣብ አሳ ታይቡዋ ካዋ ኤርስስ፤ እስራኤለን ማሻን ኦለታናዉ ዳንዳእያ ሆስፑን ፄቱ ሙኩሉ ምኖ ኦላንቾት፥ ይሁዳን ቃስ እቻሹ ፄቱ ሙኩሉ ኦላንቾት ደኦሶና።

10አሳ ታይብዳፐ ጉየ፥ ዳዊታ ዎዛናይ ህርግን፥ ዳዊቲ፥ “ታኒ ሀ ኦሱዋን ግታ ናጋራ ኦስ። ሽን ሀእ አቤት ጎዳዉ፥ ታኒ ነና ዎሳይስ፤ ታ ናጋራ፥ ነ አይልያ ናጋራ አቶ ጋ። ታኒ ዳሮ ቦዛባ ሀናስ” ያግስ።

11ዎንተ ጋላስ ዳዊቲ ሂፃፐ ደንድያ ዎደ ዳዊታስ ቆንጨ በእያ፥ ናብያ ጋደኮ ጎዳ ቃል ይስ።

12“ባዳ፥ ዳዊታኮ፥ ‘ታኒ ነና ሄባፐ እሱዋ ዶራና መላ በሳይስ፤ ታኒ ነ ቦላ ፖላናዉ ኤንታፈ እሱዋ ዶራ’ ያጌስ ጎዳይ” ያግስ።

13ጋድ ዳዊታኮ ብድ፥ “ሄ ላይ ነ ቢታ ቦላ ኮሻ ኤሆዬ? ዎይኮ ነ ሞርከት ነና የደን፥ ሄ አጌና ኤንታ ስንፈ ባቃታነዬ? ዎይኮ ነ ቢታ ቦላ ሄ ጋላስ ጋዶይ ያናይሳ ዶራይ? አነ ሀእ ቆፓዳ ታኒ ታና ኪትዳይሳስ ዛራናባ ኦዳ” ያግስ።

14ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ፥ ኑኒ እያ ኩሸን ኩንዳና፤ ታና አሳ ኩሸን የጎፎ” ያግስ።

15ሄሳ ግሾ፥ ዎንታፈ ብድ እ ግዳ ጋላሳይ ጋካናዉ ጎዳይ እስራኤለ ቢታን ጋዶ ኪትስ። እስራኤለ ቢታን ዳነፐ ብድ በርሳበ ጋካናዉ ላፑን ታሙ ሙኩሉ አስ ሀይቅስ።

16የሩሳላመ ይሳናዉ ኪታንቾይ ባ ኩሽያ ምጭዳ ዎደ አሳ ቦላ ጋክዳ ጋዶይ ጎዳ አዛንዳ ግሾ፥ አሳ ሾጭያ ኪታንቹዋኮ፥ “ግዳና! ነ ኩሽያ ዛራ” ያግስ። ጎዳ ኪታንቾይ ሄ ዎደ ያቡሰ አድያ ኦርና ዉዱማን ደኤስ።

17አሳ ሾጭያ ኪታንቹዋ ዳዊቲ በእዳ ዎደ ጎዳኮ፥ “ናጋራ ኦዳይ ታና፤ ታ ባላስ! ሀ ዶርሳት አይ ኦዶና? ሀያና፥ ታናነ ታ አዋ ሶ አሳ ነ ሴራና መላ ታኒ ዎሳይስ” ያግስ።

18ሄ ጋላስ ጋድ ዳዊታኮ ይድ፥ “ባዳ፥ ያቡሰ አድያ ኦርና ዉዱማን ጎዳስ ያርሾ በሲ ጊግሳ” ያግስ።

19ዳዊቲ፥ ጎዳይ ጋደ ባጋራ ኪትዳይሳዳ ኦናዉ ፑደ ብስ።

20ኦርን ዱገ ፄልያ ዎደ፥ ካዎይነ እያ አሳት ባኮ የይሳ በእስ። እ ጋፃ ከይድ፥ ጉፋንድ ካዋስ ዝግስ።

21ኦርን፥ “ታ ጎዳይ ካዎይ ባ አይልያኮ፥ አይስ ይዴ?” ያግስ። ዳዊቲ፥ “አሳ ቦላፈ ጋዶይ ስማና መላ ታኒ ጎዳስ ያርሾ በሲ ጊግሳናዉ ነ ዉዱማ ሻማናዉ ያስ” ያግስ።

22ኦርን፥ “ታ ጎዳይ፥ ካዎይ ባ ኮይዳባ ኤክድ ያርሾ! ፁሳ ያርሾስ ቦራት ደኦሶና፤ ኤሶ ምስ ቃስ ካ ቡክያ ሚሸይነ ቦራ ቃምባር ደኤስ።

23ካዋዉ፥ ሀይሳ ኡባ ኦርን ካዋስ እምስ” ያግስ። ጉጅድ ኦርን፥ “ጎዳይ ነ ፆሳይ ነ ያርሹዋ ኤኮ” ያግስ።

24ሽን ካዎይ፥ “አካይ፥ ታኒ ታ ሚሸን ሻማና። ታ ጎዳ፥ ፆሳስ ፁሳ ያርሾ ጋተይ ባይና ያርሽከ” ያግስ። ሄሳ ግሾ፥ ካዎይ ዉዱማነ ቦራታ ኦርናፈ እሻታሙ ብራ ሳንትመን ሻምስ።

25ዳዊቲ ሄ በሳን ያርሾ በሲ ጊግስድ ፁሳ ያርሾነ እስፈተ ያርሾ ጎዳስ ያርሽስ። ጎዳይ ቢታ ግሾ ዎሰትዳ ዎሳ ስእድ፥ ጋዱዋ እስራኤለፐ ድግስ።