2 Kings 25

Amharic Gofa GFBEVF (ጌሻ ማፃፋ)

1ሰደቅያስ ካዎትዳ ኡዱፉን ላይ፥ ታማን አጌናን፥ ታማን ጋላስ፥ ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ፤ እያ ዩሹዋን ቢታ ዶርድ ተቅስ።

2ሰደቅያስ ካዎትዳ ታማነ እስን ላይ ጋካናዉ፥ ካታማይ ተቀትድ ጋምእስ።

3ሄሳ ጋሶን ቢታን ኮሽ ሱልን፥ ሄ ላይ ኦይዳን አጌናን፥ ኡዱፉን ጋላሳን አሳስ ምያባይ ይስ።

4ካታማ ዩሾ ግምበይ እስ ባጋራ መቅን፥ ካልዳወት ዩይ አድ ናግኮካ፥ ይሁዳ ካዋ ኦላንቾት ኩመ ቃማ ካዎ ጋደ ኤፍያ ኦግያ ኦይክድ፥ ናምኡ ድርሳ ግምበት ጋሄትያ ፐንግያራ ከይድ ባቃትዶሶና። ኤንቲ ዮርዳኖሰ ድልባኮ ስሚድ ባቃትዶሶና።

5ሽን ባብሎነ ኦላንቾት ካዋ የደድ፥ እያርኮ ደምባ ጋሸ ኦይክዶሶና። እያ ኦላንቾት ኡባይ እያፐ ሻከትድ ላለትዶሶና።

6ሄሳፈ ጉየ፥ ኤንቲ እያ ራብላ ካታማን ደእያ ናቡካዳናፆራኮ ኤፍዶሶና። ባብሎነ ካዎይ ሰደቅያሳ ቦላ ፕርድስ።

7ሰደቅያሳ ናይታ፥ ሰደቅያስ ፄልሽን ዎዶሶና። እያ አይፈታ ዎጭ ከስድ፥ ሳንላታን ቃችድ፥ ባብሎነ ቢታ ኤፍዶሶና።

8ናቡካዳናፆር ባብሎነን ካዎትዳ ታማነ ኡዱፉን ላይን፥ እቻሻን አጌናን፥ ላፑን ጋላሳን፥ ካዋ ሞርናታፐ እሶይ፥ ካዋ ናገይሳታ ሀላቃይ ናቡዛርዳን የሩሳላመ ገልስ።

9ፆሳ ኬ፥ ካዎ ጋነ የሩሳላመን ደእያ ኬ ኡባ፥ ግታ ኬ ጌተትያ ኡባ ፁግስ።

10ባብሎነ ኦላንቾት ኡባይ ካዋ ናገይሳታ ሀላቃ ኪታን የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና።

11ናቡዛርዳን ካታማንነ ይሁዳን አትዳ አሳታ፥ ካድድ ባብሎነ ኦላንቾታን ጋሄትዳ አሳታ ኡባ ኦይክድ፥ ድእድ ኤፍስ።

12ሽን ናቡዛርዳን ዉርሰ ማንቆታፐ ጉታ ዎይነ ቶካናዳነ ጋደ ጎያናዳ ይሁዳን አሽስ።

13ባብሎነ አሳት ፆሳ ኬን ደእያ ናሰ ብራታፐ መዳ ቱሳታ፥ ጫና ጋረታነ ግታ ከረታ መንረዶሶና፤ ናሰ ብራታ ኡባ ባብሎነ ኤፍዶሶና።

14ከረታ፥ አካፋታ፥ ፆምፐ ፄራ ፕትያባታ፥ ጭልፓታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና።

15ካዋ ናገይሳታ ሀላቃይ ናቡዛርዳን ዎርቃፈ ኦሰትዳ ሚሸታ ዎርቃ፥ ብራፐ ኦሰትዳ ሚሸታ ብራ ኦ ኤክድ፥ እፃነ ጩይስያ ሻተታነ ፃሮታ ኡባ ኤፍስ።

16ካዎይ ሶሎሞነይ ፆሳ ኬ ኦሶስ ጊግስዳ ናምኡ ቱሳታ፥ ግታ ከረታነ ጫና ጋረታ፥ ናሰ ብራታ ምዛነን ልካናዉ ዳንዳኤትቤና።

17ናምኡ ቱሳት እስ መላ ግድድ፥ እሱዋ እሱዋ ጌሳይ ታማነ ሆስፑን ዋ፤ ቃስ እስ እስ ቱሳ ሁጰን ደእያ ጉምቦት ሄ ዋ አዱሰ። ሄ ጉምቦታ ዩሾይ ናሰ ብራታ ግተንነ ኦሮማነ ቴራ ምስለን አሌቀትስ።

18ካዋ ናገይሳታ ሀላቃይ ናቡዛርዳን፥ ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሀራ ሄ አሳታ ኦይክስ።

19ሄ ዎደይ ጋካናዉ፥ ካታማን ደእያ አሳፐ ይሁዳ ቶራ ሞጮና፥ ካዋ ዞረይሳታፐ እቻሹ አሳታ፥ ቶራ ሞጮናታ ፃፍያ፥ ኦላንቾታ ዶርያ ሀራ ኡሱፑን ታሙ አሳታ ኤፍስ።

20ሀላቃይ ናቡዛርዳን ኤንታ ኡባ፥ ባብሎነ ካዋኮ ራብላ ካታማ ኤፍስ።

21ባብሎነ ካዎይ ኤንታ ኡባ ሀማታ ቢታን ራብላ ካታማን ዎስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።

22ካዎይ ናቡካዳናፆር ሳፋና ናኣ ናኣ፥ አክቃማ ናኣ ጎዶልያ ይሁዳን አትዳ አሳ ቦላ ሹምስ።

23ኩሸ እምቦና ይሁዳ ቶራ ሞጮናትነ ኦላንቾት ሄሳ ስእዳ ዎደ፥ ምፅጳን ደእያ ጎዶልያራ ጋሄትዶሶና። ሄ ሀላቃት ናታና ናኣ እስማኤላ፥ ቃረያ ናኣ ዮሃና፥ ናፆፋ አድያ ታንሁመታ ናኣ ሳራያነ ማካታ አድያ ያዛና ናኣ።

24ጎዶልያ ኤንታዉነ ኤንታ ኦላንቾታስ “ሀይሳታስነ ኤንታ ሀላቃታስ ያዮፍተ። ሀ ቢታን ደእተ፤ ባብሎነ ካዋስ ሃረትተ፤ ሄሳ ህንተ ኦኮ ኡባባይ ህንተዉ እንጀታና” ያግድ ኤንታዉ ጫቅስ።

25ሽን ላፑን አጌናን፥ ካዎ ኮች ግድዳ ኤልሳማ ናኣ ናታና ናአይ እስማኤል ታሙ አሳራ ምፅጳ ብድ፥ ጎዶልያ፥ ይሁዳ አሳነ እያራ ደእያ ባብሎነ አሳ ኡባ ዎስ።

26ሄሳፈ ጉየ፥ ባብሎነ አሳስ ያይድ፥ ይሁዳ አሳይ፥ ጉ ግት አቶናሽን፥ ቶራ ሞጮናት ኡባይ ግብፀ ቢታ ባቃትዶሶና።

27ዮአክን ድኤትድ ብዳ ሀስታማነ ላፑን ላይን፥ ታማነ ናምአን አጌናን፥ ላታማነ ላፑን ጋላሳን፥ ዮር-ማሮዳክ ካዎትዳ ላይ፥ ይሁዳ ካዋ ዮአክና ማርድ ቃሾፐ ብልስ።

28ዮር-ማሮዳክ፥ ዮአክናራ ሎኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አድ፥ እያ ቦንችስ።

29ሄሳ ግሾ፥ ዮአክን ቃሾ ኬን ማእዳ ማኡዋ ላምድ፥ አትዳ ባ ደኦ ላይ ኡባን ካዎ ጋይታፐ ምስ።

30ጋላስ ጋላስ እያዉ ኮሽያባ ኡባ ባብሎነ ካዎይ እሚስ።