2 Chronicles 28

Amharic Gofa GFBEVF (ጌሻ ማፃፋ)

1አካዝ ካዎትያ ዎደ እያዉ ላይ ላታማ፤ እ የሩሳላመን ታማነ ኡሱፑን ላይ ካዎትስ። አካዝ ባ ማይዛይ ዳዊቲ ሱረባ ኦዳይሳዳ ጎዳ ስንን ሱረባ ኦቤና፤

2እ ካሰ ደእዳ እስራኤለ ካዎታ ኦግያን ሄመትስ። ጉጅድ፥ ባኣለ ኤቃ ጎይናናዉ ምስለታ መስ።

3ህኖማ ዛንጋራን እፃነ ጩይስስ፤ ጎዳይ እስራኤለ አሳ ስንፈ ጎድድ ከስዳ አሳ፥ እፀትዳ ኦግያ ካልድ ባ አደ ናይታ ታማን ፁግድ ኤቃስ ያርሽስ።

4አካዝ ቃ ጎይኖ በሳታን፥ ደረ ሁጰነ ም ኩያ ጋርሳን ያርሾ ያርሽስነ እፃነ ጩይስስ።

5ሄሳ ግሾ፥ ጎዳይ እያ ፆሳይ እያ ሶረ ካዋ ኩሸን አድ እሚስ። ኤንቲ እያ ፆንድ፥ እያ አሳፐ ዳሮታ ድእድ፥ ዳማስቆ ኤፍዶሶና። ቃስ፥ ጎዳይ እያ እስራኤለ ካዋ ኩሸን አድ እምን፥ ካዎይ ኢታ ሾች ሾጭስ።

6ይሁዳ አሳይ ጎዳ፥ ባንታ ማይዛታ ፆሳ አግዳ ግሾ ራማላ ናአይ ፓቁሄይ ይሁዳ ኦላንቾታፐ እስ ፄታነ ላታሙ ሙኩሉ ምኖ አሳታ እስ ጋላስ ዎስ።

7ኤፍሬማ ኮቸ ግድዳ ምኖ ኦላንቾይ ዝክር፥ ካዋ ናኣ ማእሰያ፥ ካዎ ጋ ሹማ አዝርቃማነ ካዋ ካልድ ደእያ ኤልቃና ዎስ።

8እስራኤለ አሳይ ባንታ ዳቦታፐ ናምኡ ፄቱ ሙኩሉ ማጫሳ፥ አደ ናይታነ ማጫ ናይታ ድእዶሶና፤ ኤንቲ ዳሮ ድኡዋ ኤክድ ሳማረ ብዶሶና።

9ጎዳ ናበይ ኦዴዳ ጌተትያ አደይ ሳማረን ደኤስ። ኦዴድ ሳማረ ብያ ኦላንቾታራ ጋሄታናዉ ከይድ፥ “ጎዳይ፥ ህንተ አዋታ ፆሳይ ይሁዳ ሀንቀትዳ ግሾ ህንተ ኩሸን አድ እሚስ። ሽን ህንተ ኤንታ ሳሎ ጋክዳ ሀንቆን ዎደታ።

10ሄስ ግዶና እፅን ይሁዳነ የሩሳላመ ማጫነ አድያ ህንተ አይለ ኦናዉ ቆፔታ። ያትን፥ ህንተ ኤንታዳ ሀንድ ጎዳ፥ ህንተ ፆሳ ቦላ ናጋራ ኦደታ ግደከቲ?

11ሀእ ታ ህንተዉ ኦደይሳ ስእተ። ጎዳ ሀንቆይ ህንተ ቦላ ዎዳ ግሾ ህንተ ድእድ፥ ቃችዳ ህንተ ዳቦታ የድተ” ያግስ።

12ሄሳፈ ጉየ፥ ኤፍሬማ ኮቻ ሀላቃታፐ ዮሃናና ናአይ አዛርያስ፥ ማሽልሞታ ናአይ ባራክ፥ ሳሎማ ናአይ ይዝቃነ ሀድላያ ናአይ አማስ ኦላፐ ስምዳይሳታ ቦላ ደንድዶሶና።

13ኤንቲ “ሄ ድኤትዳ አሳታ ኑኮ ኤሆፕተ! ካሰ ኑኒ ጎዳ ቦላ ኦዳ ናጋራነ ናቁዋ ቦላ ሀራ ጉጄታ። ኮይሮካ ኑ ናጋራይ ዳሮ ግድያ ግሾ እስራኤለ ቦላ ጎዳ ሀንቆይ ዎስ” ያግዶሶና።

14ሄሳ ግሾ፥ ኦላንቾት ድኤትዳ አሳታነ ሚሽያ ሀላቃታ ስንንነ ደሪያ ስንን እምዶሶና።

15ሱንይ ሀይሳፈ ቆሞን ፃፈትዳ አሳት ደንድ ኤቅድ፥ ድኤትዳ አሳ ኤክዶሶና። ኤንታ ግዶን ካሎ ደኤይሳታስ ድኡዋፐ ማኦነ ጫማ እምዶሶና። ኤንታ ሙዝዶሶናነ ኡሽዶሶና፤ ኤንታ ማዱን ቦላ ዛይተ ትይዶሶና። ዳቡርዳይሳታ ሀረ ቶግስድ ኤንታ እሻታኮ ዛምብ ደእያ እያርኮ ካታማ ኤፍዶሶና። ሄሳፈ ጉየ፥ ኤንቲ ሳማረ ስምዶሶና።

16ሄ ዎደ ካዎይ አካዝ አሶረ ካዎይ ባና ማዳና መላ ኪታ የድስ።

17ኤዶመ አሳት ናምአን ይሁዳ ቦላ ደንድድ፥ ዳሮ አሳ ድእድ ኤፍዶሶና።

18ፍልስፄመት ዙማ ፃጶንነ ይሁዳ ጋን፥ ነገበ መላ ቢታን ደእያ ካታማታ ኦልድ ቤት-ሳሜሳ፥ ኤሎና፥ ጋደሮታ፥ ሶኮ፥ ትምና፥ ግምዞነ ኤንታ ሄራን ደእያ ጉታታ ኦይክድ ያን ደእዶሶና።

19ይሁዳ ካዎይ አካዝ ይሁዳ አሳ ናጋራ ኦስስዳ ግሾነ ጎዳስ አማነትቦና ግሾ ጎዳይ ይሁዳ ካዉሽስ።

20አሶረ ካዎይ ተልገልተልፈልሶር አካዛኮ ይድ እያ መቶ በስስፐ አትሽን፥ ማድቤና።

21አካዝ ፆሳ ኬፈ፥ ካዎ ጋፐነ ሀላቃታፐ ዳሮባ ኤክድ፥ አሶረ ካዋስ እሚስ። ሽን ሄስ እያ አይኮካ ማድቤና።

22ካዎይ አካዝ ኡንኤትዳ ዎደ ጎዳስ አማነቶና እፅድ መቶ ቦላ መቶ ጉጅስ።

23ባና ፆንዳ ዳማስቆ ፆሳታስ ያርሽሸ፥ “ሶረ ካዎታ ፆሳት ኤንታ ማድዳ ግሾ ታናካ ኤንቲ ማዳና መላ ታኒ ኤንታዉ ያርሻና” ያግስ። ሽን ሄ ፆሳት እያዉነ እስራኤለ አሳ ኡባስ ዮ ኤህዶሶና።

24አካዝ ፆሳ ኬ ሚሸታ ኡባ ሺሽድ ትንቸረስ። ፆሳ ኬ ፐንገታ ጎርድስ። የሩሳላመን ዱማ ዱማ በሳን ባዉ ያርሾ በሲ ኬፅስ።

25አካዝ ሀራ ፆሳታስ እፃነ ጩይሳናዉ ይሁዳን ደእያ ካታማታ ኡባን ቃ ጎይኖ በሳታ መስ። ያትድ ጎዳ፥ ባ አዋታ ፆሳ ሀንቀስ።

26ሄኮ፥ አካዛ ዎደን ኦሰትዳ ሀራ ኦሶት ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ።

27አካዝ ሀይቅድ፥ ባ ማይዛታ ጋክስ። የሩሳላመ ካታማን እያ ሞግዶሶና፤ ሽን እያ እስራኤለ ካዎታ ዱፉዋን ሞግቦኮና። እያ በሳን እያ ናአይ ህዝቅያስ ካዎትስ።

← Chapter 27 Chapter 29 →