1 Timothy 6

Amharic Gofa GFBEVF (ጌሻ ማፃፋ)

1ፆሳ ሱንይነ ኑ ትምርተይ ጫየቶና መላ አይለተን ደኤይሳት ባንታና ሃርያ ጎዳታ ቦንቾ።

2አማንያ ጎዳት ደእያ አይለት፥ ኤንታ ጎዳት ኤንታዉ እሻ ግድያ ግሾ ኤንታ ካፖ። ኤንታ ኦሱዋን ማደትያ ጎዳት፥ አማነይሳታነ ዶሰትዳይሳታ ግድያ ግሾ ኤንቲ ካሰፐ አድ ኦናዉ በሴስ። ኔኒ ሀይሳ ታማርሳናዉነ ኤንቲ ኦና መላ ዞራናዉ በሴስ።

3ኦንካ ዱማ ትምርተ ታማርስያባ ግድኮ፥ ኑ ጎዳ የሱስ ክርስቶሳ ቱማ ቃላራነ ኑ አማኖ ትምርትያራ ጋሄተና።

4ሄ ኡራይ ኦቶሮን ሱገቴስፐ አትሽን፥ አይኮካ ኤረና። ኤንታዉ እስ ቆፋ ቦላ ፓላማናዉነ ኦየታናዉ ኢታ አሞይ ደኤስ። ሄስ ቃናተ፥ ኦሽ፥ ጫሸ፥ ኢታ ስነ፥

5ጊጎና ፓላማ ካለስ። ቃስ ኤንታዉ ኢታ ዎዛን ደኤስ፤ ቱማ ባልዶሶና፤ ኤንቲ ፆሳ አማኖይ ዱረተስ ኦገ ግድ ቆፖሶና።

6ሽን ታዉ ደእያባይ ግዳና ግያ አሳስ ቱማ አያና ደኦይ ግታ ዎ።

7ኑኒ ሀ አላምያ አይኮካ ኤህቦኮ፤ ቃስ እያፐ አይኮካ ኤክድ ቦኮ።

8ኑስ ካነ ማኦይ ደእኮ ሄስ ግዳና።

9ሽን ዱረተ ኮየይሳት ፓጨንነ ፅሄን ገሎሶና። ቃስ ኤንታና ዱገ ዳፍያነ ይስያ ኤያተነ ቆህያ አሞን ኩንዶሶና።

10ሚሸ ሲቆይ ኢታተ ኡባስ ፑልቶ። እሶት እሶት ሚሸ አሞትሸ አማኖፐ ባለትድ ዳሮ መቶን ባንታና የግዶሶና።

11ሽን ነኖ፥ ፆሳ አሶ፥ ሄሳፈ ባቃታ። ፅሎተ፥ ፆሳ ዳኖ፥ አማኖ፥ ሲቆ፥ ዳንዳአነ አሽከተ ካላ።

12አማኖ ባፅያ ሎይ ባፀታ። ዳሮ አሳ ስንን ነ ማርካትዳ ነ አማኑዋባ፥ ፆሳይ ነና እያዉ ፄግዳ መርና ደኡዋ ኦይካ።

13ኡባስ ደኦ እምያ ፆሳ ስንንነ፥ ጰንፀ ጵላፆሳ ስንን ሎኦ ማርካ ማርካትዳ ክርስቶስ የሱሳ ስንን ታ ነና ኪታይስ።

14ኑ ጎዳ የሱስ ክርስቶሲ ቆንጫና ጋካናዉ ሀ ኪታ ባልነ ቦረይ ባይና ናጋ።

15ባ ፃላላ ኡባ ሃርያ ቦንቾ ፆሳይ፥ ካዎታ ካዎይ፥ ጎዳታ ጎዳይ፥ ባ ቆፕዳ ቃማን የሱስ ክርስቶሳ ዛር ኪታና።

16እስ እያ ፃላል ሀይቀና። ኦንካ ሺቃናዉ ዳንዳኦና ፖኦን ደኤስ። ኦንካ እያ በእቤና፤ ቃስ በአናዉካ ዳንዳኤና። ቦንቾይነ መርና ዎልቃይ እያዉ ግዶ። አምንእ።

17ሀ አላምያ ዱረት ጮ ይያ ሻሎን ኦቶርቶና መላነ ጬቆና መላ ኦዳ። ኑስ ኮሽያባ ፓላህስድ እምያ ኑና አንጅያ፥ ዱረ ፆሳን አማነታና መላ ኤንታ ኪታ።

18ኤንቲ ሎኦ ኦሶ ኦናዳ ሎኦ ኦሶን ዱረታናዳ፥ ኬሀታነ ሀራታስ ሻከይሳታ ግዳና መላ ኪታ።

19ሄስ ኤንታዉ ስንስ ምኖ ባሶ ግድያ ግሾ፥ ሄ ዎደ ኤንቲ ቱማ ደኦይ አይ ዳንያኮ ኤራና።

20ፅሞትዮሳ፥ እስ እስ አሳይ፥ “ኤራተ” ግያ ኤያ ፓላማፐነ ሀዳ ኦዳፐ ባቃታ፤ ነዉ እመትዳ ሀዳራ ናጋ።

21እሶት እሶት ኑስ ኤራተ ደኤስ ያግሸ አማኑዋ አግዶሶና። ፆሳ አ ኬሀተይ ህንተ ኡባራ ግዶ።