1 Peter 4

Amharic Gofa GFBEVF (ጌሻ ማፃፋ)

1ሄሳ ግሾ፥ ክርስቶስ ባ አሹዋን ኑስ ዋየትዳ ግሾ ህንተካ ሄ ቆፋን ህንተና ዳንጭስድ ምንድ ኤቅተ። ክርስቶሳ ግሾ ግድ ባ አሹዋን ዋየ ኤክዳ ኡራይ ናጋራ ኦከ ግድ ቃንፅዳ አስ።

2ሄ ኡራይ ባ አትዳ ላይን ፆሳ ሸነ ኦናዉ ኮዬስፐ አትሽን፥ ኢታ አሾ አሞን ዴና።

3ካሰ ህንተ አማኖና አሳይ ደእዳይሳዳ ደእደታ። ህንተ ኢታ አሞን፥ ላይማተን፥ ማን፥ ቱናተ ደንያ የን፥ ፖክያ ኤቃ ጎይኖን ካሰ ደእዳ ዱሳይ ግዳና።

4አማኖና አሳራ ህንተ ሾር ባይና ኦሱዋ ኦና ግሾ ማላለትድ ህንተና ጫዮሶና።

5ሽን ኤንቲ ፓፃታ ቦላነ ሀይቅዳ አሳ ቦላ ፕርዳናዉ ደእያ ፆሳስ ዛሮ እማና።

6ሀይቅዳ አሳስ ዎንገላይ ሳባከትዳይ ሀይሳ ግሾሳ። ኤንቲ አሳ ባንታ አሹዋን ፕርደታና ቃስ ባንታ አያናን ፆሳ ደኦን ዳና።

7ህዛ፥ ኡባባስ ዉርሰይ ማታትስ። ሄሳ ግሾ፥ ዎሳናዉ ዳንዳኤታና መላ ዎፑ ግዳ ዎዛን ደኦ፤ ማራራ ደእተ።

8ሲቆይ ዳሮ ናጋራ ካምያ ግሾ፥ ኡባፈ አድ እሶይ እሱዋራ ዎዛናፐ ሲቀትተ።

9ዙዙሞና እሶይ እሱዋ እማተን ሞክተ።

10ህንተ ፆሳፈ ዱማ ዱማ አ ኬሀተ እሞታ ኤክዳይሳዳ ህንተ እሶይ እሶይ ሄ እሙዋ በሲያዳ ኦይክድ እሶይ እሱዋ ሀጋዝተ።

11የሱስ ክርስቶሳ ባጋራ ኡባባን ፆሳይ ጋላተታና መላ ኦንካ ኦድያባ ግድኮ ፆሳፈ ቃላ ኤክዳዳ ኦዶ። ቃስ ኦንካ ማድያባ ግድኮ ፆሳይ እያዉ እምያ ዎልቃዳ ማዶ። ቦንቾይነ ዎልቅ መርናፐ መርና ጋካናዉ እያዉ ግዶ። አምንእ።

12ታ እሻቶ፥ ህንተ ታማዳ ፁግያ ዋየ ፓጭያ ግዶራ አያ ዎደ ኦራባይ ሀንዳዳ ማላለቶፍተ።

13ሽን እያ ቦንቾይ ቆንጭያ ዎደ ህንተ ኡፋይሳይ ግታ ግዳና መላ ክርስቶሳ ዋይያ ህንተ ኤከይሳን ኡፋይትተ።

14ክርስቶሳ ሱን ግሾ አስ ህንተና ጫይያ ዎደ፥ ፆሳ ቦንቾ አያናይ ህንተ ቦላ ሸምፕያ ግሾ ህንተ አንጀትዳይሳታ።

15ህንተፈ ዋየ ኤክያ ኦንካ ሸምፖ ዎዳዳ ዎይኮ ካይሶትዳዳ ዎይኮ ኢታ ኦዳዳ ዎይኮ ገልሶናባን ገልዳዳ ሀንድ ዋየቶፎ።

16ግዶሽን፥ ክርስታነ ግድያ ግሾ ዋየትኮ ክርስቶሳ ሱን ግሾ ፆሳ ጋላቶፐ አትሽን፥ ዬላቶፖ።

17ፕርድ ፆሳ አሳ ቦላ ዶምያ ዎደይ ጋክስ። ህዛ፥ ሄ ፕርዳይ ኮይሮ ኑ ቦላ ዶምያባ ግድኮ፥ ፆሳ ዎንገላስ ኪተቶና አሳ ዉርሰይ አይ ግዳኔ?

18ፅሎይ ኡንአን አትያባ ግድኮ፥ ማካላንቾይነ ናጋራንቾይ ያትን ዋናኔ?

19ሄሳ ግሾ፥ ፆሳ ሸነዳ ዋየ ኤከይሳት ባንታ ሸምፑዋ ባንታና መዳ፥ አማንያ ፆሳስ ሀዳራ እምሸ ሎኦባ ኦ።

← Chapter 3 Chapter 5 →