1 Chronicles 18

Amharic Gofa GFBEVF (ጌሻ ማፃፋ)

1ሄሳፈ ጉየ፥ ዳዊቲ ፍልስፄመታ ፆንድ ሃርስ፤ ጌተ ካታማነ እያ ጉታታ ፍልስፄመታ ኩሸፐ ኤክስ።

2ዳዊቲ ሞአበ አሳ ፆንን፥ ኤንቲ እያዉ ሃረትድ ጊርዶሶና።

3ሀማታ ካታማ ማታን ደእያ ሱባ ካዎይ አድራዛር፥ ባ ካዎተ ኤፍራፂሳ ሻፋ ጋካናዉ አሳናዉ ብሽን ዳዊቲ እያ ኦልስ።

4ዳዊቲ አድራዛራፐ እስ ሙኩሉ ፓራ ጋረታ፥ ላፑን ሙኩሉ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ፄቱ ጋረታስ ግድያ ፓራታ አሽድ ሀራ ፓራታ ኡባስ ገዳ ፃጱዋ ቃንፅስ።

5ዳማስቆ ካታማን ደእያ ሶረት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ 22,000 አሳ ዎስ።

6ሄሳፈ ጉየ፥ ሶረ ቢታን ዳማስቆ ካታማን ኦላ ሚፃ መስ። ሶረ አሳት ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።

7ዳዊቲ አድራዛራ ኦሳንቾት ቶክዳ ዎርቃ ጎንዳለታ ኤክድ የሩሳላመ ኤፍስ።

8ቃስ ዳዊቲ አድራዛር ሃርያ ፀባሀነ ኩና ካታማታፐ ዳሮ ናሰ ብራታ ኤክስ። ሄሳፈ ጉየ፥ ሶሎሞነይ ሄ ናሰ ብራታፐ ኦሰትዳ ከረታ፥ ቱሳታነ ዱማ ዱማ ሚሸታ ኦስ።

9ዳዊቲ ሱባ ካዋ አድራዛራ ኦላንቾታ ኡባ ፆንዳይሳ ሀማታ ካዎይ ቶይ ስእስ።

10ቶይ አድራዛራራ ኦለትሸ ጋምእዳ ግሾ ዳዊቲ አድራዛራ ኦልድ ፆንዳ ግሾ እያ ሀሹ ጋናዉነ ሳሮናዉ ባ ናኣ ሀዶራማ ካዋ ዳዊታኮ ኪትስ። ሀዶራም ዎርቃፈ፥ ብራፐነ ናሰ ብራታፐ ኦሰትዳ ሚሸታ እሞታ ኤክድ ብስ።

11ካዎይ ዳዊቲ ኤዶመፐ፥ ሞአበፐ፥ አሞነፐ፥ ፍልስፄመታፐነ አማለቃታፐ ድእድ ኤክዳ ብራነ ዎርቃ ሀ ሚሸታራ ጋድ ጎዳስ ዱማይድ ዎስ።

12ፃሩያ ናአይ አብስ ኤዶመ አሳፐ 18,000 አሳ፥ ማፅነ ዛንጋራን ዎስ።

13ዳዊቲ ኤዶመን ኦላ ሚፃ መስ፤ ያትን፥ ሄ ቢታ አሳ ኡባይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።

14ሄሳዳ ኦድ፥ ዳዊቲ እስራኤለ ኡባ ቦላ ካዎትድ ባ አሳ ኡባ ፅሎተንነ ሱረ ፕርዳን አይስስ።

15ፃሩያ ናአይ እዮኣብ ቶራ ሞጮና፤ አህሉዳ ናአይ እዮሳፈፅ ታርከ ፃፈ።

16አህፁባ ናአይ ሳዶቅነ አብያታራ ናአይ አብመለከይ ካህነ፤ ሳራይ ዋና ፃፈ።

17ዮዳሄ ናአይ ባናይ ዳዊቲ ናግያ አሳ ሀላቃ፤ ዳዊታ አደ ናይት እያ ካዎተን ቃ በሳ ኦይክዳ ሀላቃታ።

← Chapter 17 Chapter 19 →