1 Chronicles 10

Amharic Gofa GFBEVF (ጌሻ ማፃፋ)

1ፍልስፄመት እስራኤለ አሳራ ኦለትዶሶና። እስራኤለት ፍልስፄመታ ስንፈ ባቃትዶሶና። ሄ ዎደ ዳሮ እስራኤለ አሳይ ግልቦአ ደርያ ቦላ ሀይቅዶሶና።

2ፍልስፄመት ሳኦላነ እያ አደ ናይታ ጎድ ኤፍድ ሳኦላ ናይታ ዮናታና፥ አብናዳባነ ማልክሳ ዎዶሶና።

3ኦላይ ሳኦላ ተቅድ ኡንኤስ፤ ዶንገን ዱከይሳት ሳኦላ ደምድ ማዱንፅስዶሶና።

4ሳኦል ባ ኦላ ሚሽያ ቶከይሳኮ፥ “ሀ ቃፃረትቦና ፍልስፄመት ታና ካኦና መላ ነ ማሻን ታና ዎ” ያግስ። ሽን እያ ኦላ ሚሽያ ቶከይስ ዳሮ ያይዳ ግሾ እፅስ፤ ሄሳ ግሾ፥ ሳኦል ባ ማሻ ሳአን ኤስድ እያ ቦላ ኩንድድ ሀይቅስ።

5እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ እያ ቦላ ኩንድድ ሀይቅስ።

6ሄሳዳ ሀንድ ሳኦል፥ እያ ሄ ናይትነ እያ ሶ አሳ ኡባይ ሄ ጋላስ ሀይቅዶሶና።

7ዛንጋራን ደእያ እስራኤለት ኡባይ ባንታ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእዳ ዎደ ባንታ ካታማታ አግድ ባቃትዶሶና። ፍልስፄመት ይድ ሄ ካታማታን ደእዶሶና።

8ዎንተ ጋላስ ፍልስፄመት አሀታ ቦላፈ ኦላ ሚሸታ ቃር ኤካናዉ ይድ፥ ሳኦልነ እያ ናይት ግልቦአ ደርያን ሀይቅድ፥ ዝንእዳይሳታ ደምዶሶና።

9ኤንቲ ሳኦላ ቆያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃታ ኬንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ አሰ ኪትዶሶና።

10ኤንቲ ሳኦላ ኦላ ሚሽያ ባንታ ፆሳታ ኬታፐ እሱዋን ዎዶሶና፤ እያ ሁጵያ ባንታ ፆሳ ዳጎና ኤቃ ኬን ካቅዶሶና።

11ፍልስፄመት ሳኦላ ቦላ ኦዳባ ኡባ ጋላዳን ደእያ ያበሳ ካታማ አሳይ ስእዳ ዎደ፥

12ምኖ አሳት ኡባይ ብድ፥ ሳኦላ አሃነ እያ ናይታ አሀ ኤክድ ያበሳ ካታማ ኤህዶሶና። ያበሳን ደእያ ዎላ ጋርሳን ኤንታ ሞግዶሶና፤ ያትድ ላፑን ጋላስ ፆምዶሶና።

13ሳኦል ጎዳስ አማነትቦና ግሾ ሀይቅስ። ጎዳ ቃላ እ ናግቤና፤ ጎዳ ዞረ ኦይቸይሳ አግድ፥

14ሞይትለ ፄግያ አስ ዞረ ኦይችስ። ሄሳ ግሾ፥ ጎዳይ እያ ዎድ እያ ካዎተ እሰየ ናኣ ዳዊታስ አድ እሚስ።

← Chapter 9 Chapter 11 →