Hebrews 4

Amharic Gamo 2011 New Testament

1ጌዴ ሼምፖሶ ጌላናስ ኢሜቲዳ ሂዶታይ ሃዒካ ናጌቲ ዲዛ ጊሽ ኢንቴ ጊዶፌ ኦኒካ ሄሳስ ቤሶንታዴ ጊዶንታ ማላ ኣኔ ናጌቶስ።

2ሄይታንታስ ሳባኬቲዳ ማላ ኑስካ ሚሺራቾ ቃላይ ሳባኬቲዴስ። ጊዲኮካ ሲዪዳ ኣሳታራ ሲዪዳ ቃላይ ኢስታራ ኣማኖን ዋላኬቶንታ ኣጊዳ ጊሽ ኢስታ ማዲቤና።

3ኑ ቃስ ኣማኒዛይቲ ሄ ሼምፖሶዛ ጌላና። ፆሲ “ሄሳ ጊሽ ታኒ ታ ሃንቆን ‘ኢስቲ ታ ሼምፖሶ ሙሌካ ጌሌቴና’ ጋዳ ታ ጫቃዲስ” ጊዴስ። ጊዶ ኣቲን ሃይሲ ኣላሜይ ሜꬌቶሳፔ ሃ ሲሚን ኢዛ ኦሶይ ፖሌቲዴስ።

4ኢሲ ሶን ላፑንꬆ ጋላሳ ጊሽ “ላፑንꬆ ጋላሲ ፆሲ ኦሶ ኡባፌ ሼምፒዴስ” ጌቴቲ ጌሻ ማፃፋን ፃፌቲዴስ።

5ቃሴካ ሄ ሶዛን “ቱማፔ ኢስቲ ታ ሼምፖሶ ሙሌካ ጌሌቴና” ጌስ።

6ኢዛ ሼምፖሶ ቡሮ ጌላና ኢሲ ኢሲ ኣሳቲ ዴቴስ። ካሴ ኢስታስ ሚሺራቾ ቃላይ ሳባኬቲዳይቲ ኣዛዜቶንታ ኢፂዳ ጊሽ ኢዛ ሼምፖሶ ኢስቲ ጌሊቤቴና።

7ሄሳ ጊሽ ፆሲ “ሃች” ጊዲ ቃሴካ ሃራ ጋላስ ዎꬂዴስ፤ ሄሲካ ዳሮ ላይꬃታፔ ጉዬ ዳዉቴ ባጋራ “ሃች ኢንቴ ኢዛ ቃላ ሲዪኮ ኢንቴ ዎዝና ሙሚሶፒቴ” ጌቴቲ ካሴ ዮቴቲዳ ማላ ሃኒዴስ።

8ኢያሶይ ኢስታስ ሼምፖ ኢሚዳኮ ፆሲ ሃራ ጋላስ ጊዲ ዮቴናኮሺን።

9ሄሳ ጊሽ ሳምባታ ጋላስ ሼምፖይ ፆሳ ዴሬስ ሃዒካ ዴስ።

10ጋሶይካ ፆሳ ሼምፖሶ ጌሊዛይ ዉሪ ፆሲ ኦꬂ ሼምፒዳ ማላ ኢዚካ ባ ኦሶፔ ሼምፓና።

11ሄሳ ጊሽ ኦኒካ ሄይታንታ ማላ ኣዛዜቶንታ ኢፂዳይሳ ሌሚሶ ካሊዲ ኩንዶንታ ማላ ሄ ሼምፖሶዮ ጌላናስ ኣኔ ሚኖስ።

12ፆሳ ቃላይ ፓፃ ዲዛይሳኔ ኦꬂዛ ቃላ። ናምዑ ባጋ ቃራ ማሻፌካ ኣꬊ ቃራ፤ ሼምፖኔ ኣያና፥ ሻያኔ ኮልꬔካ ሻካና ጋካናስ ጫዴስ፤ ዎዚና ቆፋኔ ኣሞቴꬃካ ፓጪ ፄሌስ።

13ፆሳ ኣይፌፔ ጌሜቲዳ ሜꬌታይ ሙሌካ ዴና። ኑ ኢዛስ ኑ ጊሽ ዛሮ ኢማናስ ቤሲዛ ኢዛ ሲንꬃን ሃኖይ ዉሪካ ካሎ ቆንጬን ቤታና።

14ሄሳ ጊሽ ፑዴ ሳሎ ቢዳ ቄሴታ ሃላቃ ፆሳ ና ዬሱሲ ኑስ ዲዛ ጊሽ ኣኔ ኑኒ ኑ ኣማኖ ሚንꬂ ኦይኮስ።

15ኑ ዳቡሪሺን ኑስ ቃꬌታና ዳንዳዪዛ ቄሴታ ሃላቃይ ኑስ ዴስ። ኢዚ ኑ ማላ ኡባ ሚሻን ፓጬቲዴስ፤ ጊዲኮካ ኢዚ ኣይኮ ናጋራካ ኦꬂቤና።

16ሄሳ ጊሽ ኑኒ ማሮቴꬅ ኤካናሲኔ ኑና ኮሺዛ ዎዴ ኑና ማዲዛ ኢዛ ኪያቴꬅ ኑ ዴማና ማላ ጌዴ ኢዛ ማሮቴꬃ ኣልጋኮ ኣኔ ኣማኖን ሺቆስ።

← Chapter 3 Chapter 5 →