Song of Solomon 6

Amharic Gamo (ጋሞ ማጻፋ)

1«ማጫሳ ኡባፌ ሎኦዬ! ኔ ሲቆ ላጌዚ ኣዋ ቢዴ? ኑኒካ ኔናራ ኢሲፌ ኮያናስ፥ ኢዚ ኣዋ ባጋራ ቢዳኮ ኑስ ዮታ» ጊዳ።

2«ታ ሲቆዚ ዶርሳ ዉዴ ሄማናስ ሎኦ ጪሻታ ማጻናስ ሺቶስ ጎኢዛ ሳዎ ማታይ ዲዛሶ ዱጌ ኣታኪልቴ ጊዶ ዎዴስ።

3ታኒ ታ ሲቆዛሳ፤ ኢዚካ ታሳ፤ ኢዚ ዉዴዛ ጪሊላ ማታን ሄሜስ» ጋዱስ።

4«ታ ጎዴ! ኔኒ ቲርጻ ካታማይ ሎኢዛ ማላ ሎኣሳ፤ ዬሩሳላሜ ማላ ኬሃ ካይሻሳ፤ ባንዲራ ቶኪዲ ቢዛ ኦላንቻ ማላ ያሺሲዛ ቴማራ ዳሳ።

5ዎዜ ኔና ኔ ኣይፌ ታፔ ዴንርኪ! ኢስቲ ታና ዲኢዲ ቃሾ ኣስ ኬሲዳ፤ ኔ ቢናናይ ጋላኣዴ ዙማፔ ዱጌ ዎዛ ዴይሻ ዉዴ ሚሳቴስ።

6ኢስታ ጊዶን ማይኔይ ባይንዳ ሜንቴ ሜንቴ ዬሊዛ ኢስኬይ ዲሬቲን ሜጬቲ ኬዚዛ ቦ ዶርሳ ዉዴታ ማላ ኔ ኣቻቲ ታና ኡፋይሴቴስ።

7ኔ ሻጋላቲ ኣይፌሶ ካሚዛ ቁራጬ ጊዶራ ጼሊዛ ዎዴ ኦሮማኔ ናምኡ ኬሲ ጳልቂዳ ሚሳቴቴስ።

8ኡሱፑን ታሙ ማጫ ካዎቲ፥ ኦስፑን ታሙ ላጌ ማጫሳቲ፥ ቃሴ ቆዳይ ባይንዳ ጌላኦቲ ዴቴስ።

9ታኒ ጊዲኮ ኢሲኒዮ ጻላ ዶሳይስ፤ ኢዚ ቦላ ኣይ ዎሶይ ዴና፤ ኢዛ ሃራጴ ማላ ካይሻ ኡታዱስ፤ ኢዛ ባ ኣዬይስካ ሜጺ ኢሲኖ፤ ኢዞ ዬሊዳ ኣያ ኢዞ ኡባፌ ኣ ሲቃዉስ። ጌላኦቲካ ኢዞ ጼሊዲ ጼሊዲ ሳቤቴስ፤ ካዎ ማቼቲኔ ኢዛ ላጌቲ ኢዞ ናሼቴስ።

10ሃና ማላዶ ጻልቄ ማላ ሞኪዛራ፥ ኣጊና ማላ ጶሊዛራ፥ ኣዋ ማላ ፖኢዛራ፥ ባንዲራ ቶኪዲ ቢዛ ኦላንቻ ማላ ያሺሲዛራ ኢዛ ኦኔ?» ጌቴስ።

11«ታኒ ሾባን ቶኬቲዳ ኣታኪልቴታ ቤኣናስ፥ ዎይኔይ ኣጪዳኮ፥ ኦሮማኔይካ ጪዪዳኮ ጼላናስ ዱጌ ኦቾሎኔይ ቶኬቲዛሶ ዎዲስ።

12ታኒ ቆፖንታ ዲሺን፥ ታ ኣሞይ ታና ኤፊዲ ካዎ ፓራ-ጋሬታ ቦላ ኡቲሲዴስ» ጊዴስ።

13«ሃኔ ሹላሜ ማጫሳዬ! ሃ ሲማ፤ ኔና ኑ ሎኤ ጼላና ማላ ሃ ሲማ» ጊዳ። «ዳሮ ኣሳ ሲንን ዬጺዛ ኣሳ ማላ፥ ታና ሹላሜ ማጫሳዮ ኣይስ ጼሌቲ?» ጋዱስ።

← Chapter 5 Chapter 7 →