Song of Solomon 3

Amharic Gamo (ጋሞ ማጻፋ)

1«ኦማርስ ኩሜ ታ ሂጻን ኢቻዳ፥ ታ ሲቆዛ ዴማናስ ኣሞታዲስ፤ ሚንዳካ ኮያዲስ፤ ጊዶ ኣቲን ዴማናስ ዳንዳያቤኬ።

2ካታማ ጊዶን ዲዛ ኦጌታኒኔ ዱቡሻታ ኡባን ዩያዲስ፤ ታ ሲቆዛ ዴማናስ ኣሞታዲስ፤ ሚንዳካ ኮያዲስ፤ ጊዶ ኣቲን ዴማናስ ዳንዳያቤኬ።

3ካታማ ዩዪ ናጊዛይቲ ታና ዴሚዳ፤ ታኒ ኢስታስ፥ ‹ታ ሲቆዛ ቤዪዴቲ?› ጋዳ ኦይቻዲስ።

4ኢስታፌ ጉ ኣ ባዳ ታ ሲቆዛ ዴማዲስ፤ ኢዚ ታፔ ኬሲ ኤኮንታ ማላ ሚንዳ ኦይካዲስ፤ ታ ኣዬይ ኬ ኤካ ኤፋዲስ፤ ታ ዬሌቲዳ ኪፊሌ ጌልዲስ።

5ኢንቴኖ ዬሩሳላሜ ጌላኦቶ! ሲቆዚ ባስ ዶሲዲ ዴንዳና ጋካናስ፥ ኢዛ ኢንቴ ቤጎንታ ማላ፥ ታኒ ኢንቴና ጌኔሳታኒኔ ባዞ ዉሻታን ኣማታይስ» ጋዱስ።

6«ካርቤፌ፥ ኤጻኔፔኔ ዛልኣንቻታ ሳዎፔ ጊጌቲዳ ሺቶ ማላ ሳዎ ቱኑ ጋሼኔ ጩዋ ማላ ቱሉ ጋሼ ባዞራ ዪዛራ ሃና ኢዛ ኦኔ?

7ሄኮ ቤኢቴ፥ ሶሎሞኔ ፓራ-ጋሬያ ዩሳን ዳዉስ፤ ኢስራኤሌፔ ዶሬቲዳ ኡሱፑን ታሙ ኦላ ኣሳቲ ኢዞ ኣዣቢዳ።

8ኢስቲ ኡባይካ ማሻ ኦይ ሜዜቲዳ፥ ኦላ ኤሪዛይታኔ ኦማርስ ዪዛ ሜቶ ኤቄታናስ ኢሶይ ኢሶይ ማሻ ጊጺዳ ማላ ኣቄቴስ።

9ካዎ ሶሎሞኔይ ፓራ-ጋሬ ጊዶን ኡቲዛ ኣራታይ ሊባኖሴ ሚፌ ኦሴቲዴስ።

10ኢዛ ኣራታ ቱሳቲ ቢራን ቲዬቲዳ፤ ዜምፖዚ ዎርቃን ኣሌቄቲዴስ፤ ኡቲዛሶዚ ኦቻ ቴራ ሚሳቲዛ ቃጪናፔ ኦሴቲዴስ፤ ጊዶዛ ዬሩሳላሜ ጌላኦቲ ሲቆስ ዳዲዳ ኣፋላን ኣሌቂሲዳ» ጊዳ።

11«ኢንቴኖ ጺዮኔ ጌላኦቶ! ኢዚ ኬሂ ኡፋዬቲዳ ኢዛ ቡላቻ ጋላስ ኢዛ ኣያ ኢዛ ሁኤን ዎዳ ካላቻ ጎጺ ኡቲዳይሳ ቤኣናስ ካዎ ሶሎሞኔኮ ሃ ዪቴ» ጋዱስ።

← Chapter 2 Chapter 4 →