Psalms 99

Amharic Gamo (ጋሞ ማጻፋ)

1ጎዳይ ካዎቲዴስ! ሄሳ ጊሻስ ኣሳይ ኮኮሮ! ኪሩቤታ ጊዶን ካዎቴ ኣራታን ኡቲዴስ፤ ሄሳስ ቢታይካ ቃጾ።

2ጎዳይ ጺዮኔን ጊታ፤ ካዎቴ ኡባፌ ኢዚ ቁ ቁ ጊዴስ።

3ጊታኔ ኬሂፔ ያሺሲዛ ኔ ሱን ኢስቲ ኡባይ ሳቤቶ! ኢዚ ዱማ!

4ቱማ ፒርዳ ዶሲዛ ዎልቃማ ካዎ! ኔኒ ሱሬቴስ ዮች ዬጋዳሳ፤ ኔኒ ያቆቤስ ቱሙ ፒርዳኔ ጺሎቴ ኤሳዳሳ።

5ኢዚ ዱማ ጊዲዳ ጊሻስ ጎዳ ኑ ጾሳ ቁ ቁ ሂስቲቴ፤ ኢዛ ቶሆ ጋርሳንካ ጉፋኒዲ ኢዛስ ጎይኒቴ።

6ኢዛ ቄሴታ ጊዶፌ ሙሴይኔ ኣሮኔይ ዴቴስ፤ ሳሜሊካ ኢዛ ሱንን ዎሲዳይታፔ ኢሳ፤ ኢስቲ ጎዳስ ዋሲዳ፤ ኢዚካ ኢስታ ዋሶ ኣሊዴስ።

7ኢዚ ሻራ ቱሳ ጊዶራ ኢስታስ ሃሳይዴስ፤ ኢስቲ ኢዚ ኢሚዳ ማራኔ ዎጋ ናጊዳ።

8ኣቤት ጎዳዉ፥ ኑ ጾሳዉ! ኔኒ ኢስታ ዎሳ ሲያዳሳ፤ ኔኒ ኢስታ ኢታቴ ጊሻስ ቃጻይዳ ጊዲኮካ ኢስታስ ኣቶ ጊዳ ጾሳ።

9ጎዳ ኑ ጾሳ ቁ ቁ ሂስቲቴ፤ ኢዛ ጌሻ ዙማ ቦላን ኢዛስ ጎይኒቴ፤ ኣይስ ጊኮ ጎዳ ኑ ጾሳይ ጌሻ ጾሳ።

← Chapter 98 Chapter 100 →