Psalms 96

Amharic Gamo (ጋሞ ማጻፋ)

1ጎዳስ ኦራ ማዛሙሬ ዬጺቴ፤ ሳኣን ዴኢዛ ኣሳዉ! ኡባይ ጎዳስ ዬጺቴ።

2ጎዳስ ዬጺቴ፤ ኢዛ ሱን ሳቢቴ፤ ኢዚ ኣሺዛይሳ ሃች ሃች ዮቲቴ።

3ካዎቴታ ጊዶን ኢዛ ቦንቾ ቆንጪሲቴ፤ ኣሳ ኡባ ጊዶን ማላሊሲዛ ኢዛ ኦሶ ኣዋጂቴ።

4ጎዳይ ጊታ፤ ጊታ ጋላታይካ ኢዛስ ቤሴስ፤ ኡባ ጾሳታፔ ኣዲ ኢዚ ያዬታናስ ቤሴስ።

5ዴሬ ኣሳይ ጎይኒዛ ጾሳቲ ኡባይ ኤቃ ጾሳታ፤ ጊዶ ኣቲን ጎዳይ ሳሎታ ሜዳ ጾሳ።

6ቦንቾይኔ ቴማይ ኢዛ ዩሾን ዴስ፤ ሚኖቴይኔ ፑላይ ኢዛ ኬን ዴስ።

7ኢንቴኖ ቢታ ቦላ ዲዛ ዴሬ ኡባቶ! ጎዳ ቦንቾ ጊሻሲኔ ኢዛ ዎልቃ ጊሻስ ጋላቲቴ።

8ኢዛ ሱንስ ቤሲዛ ቦንቾ ጎዳስ ኢሚቴ፤ ያርሾ ኤኪዲ ኢዛ ኬ ዛጎ ጌሊቴ።

9ኢዛ ጌሻቴ ፑላን ጎዳስ ጎይኒቴ፤ ቢታን ዴኢዛ ኣስ ኡባይ ኢዛ ሲንን ኮኮሪቴ።

10ካዎቴታ ጊዶን፥ «ጎዳይ ካዎቲዴስ! ሳኣይ ሚኒ ኤቂዴስ፤ ሙሌካ ቃጼና፤ ኢዚ ኣስ ኡባስ ኢሲ ጊና ፒርዳና» ጊቴ።

11ሳሎይኔ ሳኣይ ኡፋዬቴቶ! ኣባይኔ ኢዛ ጊዶን ዲዛ ኡባቲ ጉሜቶ!

12ጎሻ ጋዴይኔ ኢዛ ቦላ ዲዛ ኡባይ ኡፋዬቶ! ዎራን ዲዛ ሚ ኡባይ ኢዛ ሲንን ኡፋይሳን ዬጻና።

13ኣይስ ጊኮ ጎዳይ ያና፤ ኢዚ ሳኣ ቦላን ፒርዳናስ ያና፤ ኢዚ ሃ ሳኣ ቦላ ጺሎቴን፥ ኣሳ ቦላካ ቱማቴን ፒርዳና።

← Chapter 95 Chapter 97 →