Psalms 86

Amharic Gamo (ጋሞ ማጻፋ)

1ኣቤት ጎዳዉ! ታኒ ሂዬሳኔ ሜቶታንቻ ጊዲዳ ጊሻስ ታ ዋሶዛ ሲያዳ ታስ ዛሮ ኢማ።

2ታኒ ኔስ ዱማ ኣስ ጊዲዳ ጊሻስ ኔ ታ ሼምፖ ናጋ፤ ኔኒ ታ ጾሳ፤ ኔናን ኣማኔቲዛ ኔ ኣይሌዛ ታና ኣሻ።

3ኣቤት ጎዳዉ! ኩሜ ጋላስ ታ ኔኮ ዋሲዛ ጊሻስ ኔ ታና ማራ።

4ኣቤት ጎዳዉ! ታኒ ዎዚናፔ ኔና ዎሲዛ ጊሻስ ታና ኔ ኣይሌዛ ኡፋይሳ።

5ኣቤት ጎዳዉ! ኔኒ ኑስ ኪያኔ ኣቶ ጊዛዴ፤ ኔና ዎሲዛ ኡባስ ኔ ሜርና ሲቆ ቤሳሳ።

6ኣቤት ጎዳዉ! ታ ዎሳ ሲያ፤ ታ ሾባ ዎሲዛይሳ ኤዝጋ።

7ኔ ታስ ዛሮ ኢሚዛ ጊሻስ ታኒ ሜቶ ጋላሳን ኔኮ ዋሳይስ።

8ኣቤት ጎዳዉ! ኔ ማላይ ጾሳታ ጊዶን ባዋ፤ ኔ ኦሶራ ጊናቲዛ ኦሶይካ ዴና።

9ኣቤት ጎዳዉ! ኔኒ ሜዳ ካዎቴይ ኡባይ ኔኮ ዪዲ ኔስ ጎይናና፤ ኔ ሱንካ ቦንቻና።

10ኔኒ ጊታ፤ ማላሊሲዛ ሚሽ ኦሳ። ኔኒ ጻላ ጾሳ።

11ኣቤት ጎዳዉ! ታኒ ኔ ቱማን ባና ማላ ታና ኔ ኦጌ ታማርሳ፤ ታኒ ኔ ሱንስ ያያና ማላ ታስ ኢሲ ዎዚና ኢማ።

12ኣቤት ጎዳ ታ ጾሳዉ! ታኒ ኔና ታ ኩሜ ዎዚናፔ ጋላታና፤ ኔ ሱንካ ሜርናስ ቦንቻና።

13ኣይስ ጊኮ ኔ ታና ቤሲዳ ሜርና ሲቆይ ኬሂ ጊታ፤ ኔኒ ታ ሼምፖዮ ዱፎፔ ኣሻዳሳ።

14ኣቤት ጾሳዉ! ኦቶራንቻቲ ታ ቦላ ዴንዲዳ፤ ታና ዎና ኮዪዲ ፓንጋቲ ዱላቴቴስ፤ ኔና ዉዳንካ ዬጊቤቴና።

15ጊዶ ኣቲን ኣቤት ጎዳዉ! ኔኒ ቃቲዛዴኔ ማሪዛ ጾሳ፤ ሃንቄታናስ ጋምኢዛ ጾሳ፤ ኔ ሲቆይኔ ኔ ኣማኔቴይ ኬሂ ዳሮ።

16ታኮ ሲማዳ ታስ ቃታ፤ ታስ ኔ ኣይሌዛስ ዎልቃ ኢማ፤ ኔ ኣይሌይ ናዛ ታና ኣሻ።

17ኣቤት ጎዳዉ! ኔ ታና ማዲዛይሳኔ ሚንዛይሳ ታና ኢጺዛይቲ ቤኢዲ ዬላታና ማላ ኔ ኪያቴ ማላታ ታና ቤሳ።

← Chapter 85 Chapter 87 →