Psalms 81

Amharic Gamo (ጋሞ ማጻፋ)

1ኑስ ዎልቃ ጊዲዳ ጾሳስ ኡፋይሳን ዬጺቴ፤ ያቆቤ ጾሳስ ኢሊሊቴ!

2ማዛሙሬ ዶሚቴ፤ ካራቤ ባቂቴ፤ ዲኒኔ ማሲንቆን ሎኦ ማዛሙሬ ዬጺቴ።

3ኣጊናይ ጼሪዛ ዎዴኔ ማን ጌሊዛ ዎዴ ባኣሌስ ዛዬ ፑኒቴ።

4ሃይሲ ኢስራኤሌስ ዎጋ፤ ያቆቤ ጾሳይ ኢሚዳ ኣዛዞ።

5ጊብጼ ቢታ ኢዚ ዬዲ ኬዚዳ ዎዴ ዮሴፌ ዛሬታስ ዎጋ ሂስቲ ዎዴስ፤ ታኒ ኤሮንታ ቃላራ ኢዚ ታስ፥

6«ኢንቴ ሃሼፔ ቶሆ ዎዲስ፤ ኢንቴ ኩሼ ዴጾ ጎሾፔ ሼምፒሳዲስ።

7ኢንቴ ሜቶ ዎዴ ታና ጼይጊዴታ፤ ሂስቲን ታኒ ኢንቴና ኣሻዲስ፤ ታኒ ሻራ ጊዶራ ዳዳን ኢንቴና ኣላዲስ፤ ማሪባ ጌቴቲዛ ፑልቶ ሃ ማታን ታኒ ኢንቴና ፓጫዲስ።

8«ታ ዴሬዞ! ታኒ ኔና ሴሪዛይሳ ሲያ! ኢስራኤሌ ኣሳዉ! ኔ ታና ኤዝጋ ሲዪዳኮ ኣዜ ዲዛይ!

9ኢንቴ ጊዶን ኣላጋ ጾሲ ዶፖ፤ ሃራ ጾሳስ ጎይኖፍቴ።

10ታኒ ጎዳ ኢንቴ ጾሳ፤ ኢንቴና ጊብጼ ቢታፌ ኬሳዳ ኤሂዳይ ታና ኢንቴ ጎዳ፤ ኔ ዶና ኬሃ ሃንጋ፤ ታኒ ኔና ቱና።

11«ጊዶ ኣቲን ታ ኣሳቲ ታ ቃላ ሲዪቤቴና፤ ኢስራኤሌቲ ታስ ኩሼ ኢሚቤቴና።

12ሄሳ ጊሻስ ታኒ ኢስቲ ባ ዎዚና ሙሜቴ ባ ዶሶይሳ ሃናና ማላ ኣጋጋዲስ።

13«ታ ዴሬይ ታና ሲዪዳኮ! ኢስራኤሌ ኣሳይ ታ ኦጌ ካሊዳኮ!

14ታኒ ኢስታ ሞርኬታ ኢስታስ ጉልባቲሳና፤ ኢስታ ባሊጋራታካ ታ ሾጫናኮሺን።

15ጎዳ ኢጺዛይቲ ኢዛ ሲንን ኩንዳና፤ ኢስቲ ሜርናስ ቃጻዬታና።

16ጊዶ ኣቲን ታኒ ኢንቴና ሙሩታ ጊስቴ ሚዛና፤ ቃሴ ዛላፌ ኢንቴና ኤስ ካልሳና» ጊሺን ሲያዲስ።

← Chapter 80 Chapter 82 →