Psalms 78 — Amharic Gamo (ጋሞ ማጻፋ)

1ታ ዴሬዞ ታ ኔና ታማርሲዛይሳ ሲያ፤ ታ ዶናፔ ኬኢዛ ቃላ ኤዝጋ።

2ታኒ ሃሳይዛ ሃሳያ ሌሚሶን ዶማይስ፤ ቤኒሶፌ ቆታን ዲዛ ጹራ ዮኦ ቆንጪሳይስ።

3ኑ ሲዪዳይሲኔ ኑ ኤሪዳይሲ፥ ኑ ኣዋቲካ ኑስ ዮቲዳይሳ።

4ሄ ዮኦታ ኑኒ ኢስታ ናይታፔ ቆቶኮ፤ ጎዳስ ቤሲዛ ጋላታ፥ ኢዛ ዎልቃኔ ማላሊሲዛ ኢዛ ኦሶ ዪዛ ዬሌታታስካ ኑኒ ዮታና።

5ኢዚ ያቆቤ ዛሬታስ ኣዛዞ፥ ኢስራኤሌ ኣሳስ ዎጋ ኢሚዴስ፤ ባንታ ናይታ ሄ ዎጋታ ታማርሳና ማላ ኣዛዚዴስ።

6ሄሲካ ካሊዛ ዬሌታይ ኢስታ ኤራናሳ፤ ቃሴካ ቡሮ ዬሌታና ናይቲ ኤራናሳኔ ኢስቲካ ባንታ ናይታስ ዮታናሳ።

7ሄ ናይቲካ ጾሳን ኣማኔታና፤ ኢዚ ኦዳ ኦሶካ ዶጌቴና፤ ኢዛ ኣዛዞታካ ኢስቲ ናጋና።

8ኢስቲ ካሴ ባንታ ኣዋታ ማላ ዎዚና ሙሜኔ ማካላንቻ ጊዴቴና፤ ኢስቲ ጾሳ ሲንን ሱሬ ጊዴቴና፤ ጾሳስካ ኣማኔቲቤቴና።

9ኤፍሬሜ ናይቲ ኦላስ ዎንዳፌኔ ዪሽ ጊግሲ ኬዚዳ፤ ጊዶ ኣቲን ኦላ ጋላስ ጉዬ ሲሚዳ።

10ኢስቲ ጾሳ ጫቆ ቃላ ናጊቤቴና፤ ኢዛ ዎጋ ማላ ዶንታ ኢጺዳ።

11ኢስቲ ኢዚ ኦዳ ኦሶ ባሊዳ፤ ኢዚ ኢስቲ ቤሲዳ ማላሊሲዛ ሃኖታካ ዶጊዳ።

12ኢዚ ኢስታ ኣዋቲ ቤኢሺን ጊብጼ ቢታን ጻኖሴ ዴምባን ማላታ ኦዴስ።

13ኣባ ሻኪዲ ጊዶራ ኢስታ ፒንዴስ፤ ኢዚ ሃ ያኔ ሃ ሻኪዲ ጎዳ ማላ ኤሲዴስ።

14ኢዚ ኢስታ ጋላስ ሻራን፥ ኦማርስ ታማ ፖኦን ካሌዴስ።

15ኢዚ ባዞን ዛላ ጳልቂዲ ኣባ ማላ ዳሮ ሃ ኢስታ ኡሺዴስ።

16ዛላፌ ሃ ፑልቲሲዲ ሻፋ ማላ ዱጌ ጎጊሲዴስ።

17ጊዶ ኣቲን ኢስቲ ኢዛ ቦላ ናጋራ ኦሶ ጌዴ ጉጂዳ፤ ኡባፌ ቃ ጾሳ ቦላ ባዞን ማካሊዳ።

18ኢስቲ ኬሂ ኣሞቲዳ ካ ኦይቺዳ፤ ኤሪሼ ባ ዎዚናን ጾሳ ፓጪዳ።

19ኢስቲ ጾሳ ቦላ፥ «ባዞን ጾሲ ኑስ ማና ካ ኢማና ዳንዳይዜ?

20ዛላ ሾጪን ፑልቶይ ኬኢዲ ሻፋ ሃ ጎጊዴስ፤ ሂስቲን ኢዚ ኑስ ሚዛ ካ ኢማናዉ ዳንዳይዜ? ዎይኮ ባ ኣሳስ ኣሾ ኢማናዉ ዳንዳይዜ?» ጊ ሃሳይዳ።

21ጎዳይ ሄሳ ሲዪዳ ዎዴ ኢስታ ቦላ ዳሮ ሃንቄቲዴስ፤ ያቆቤ ዛሬታ ቦላ ታማይ ኤጺዴስ፤ ኢስራኤሌ ቦላ ኢዛ ሃንቆይ ዳሪ ዳሪ ቢዴስ።

22ኣይስ ጊኮ ኢስቲ ጾሳን ኣማኒቤቴና፤ ኢዚ ኣሺዛይሳካ ኣማኔቲቤቴና።

23ኢዚ ጊዲኮ ቦላፌ ሻራ ኣዛዚዴስ፤ ሳሎ ፔንጌታካ ዶይዴስ።

24ኢስቲ ማና ማላ ኢስታስ ማና ቡኪሲዴስ፤ ሳሎፔ ካ ኢስታስ ኢሚዴስ።

25ኪታንቻታ ካ ኣሳይ ሚዴስ፤ ጾሲ ኢስቲ ካሊ ሚን ቲርፒ ኣቲዛ ካ ኢሚዴስ።

26ኣርሼይ ሞኪዛ ባጋራ ሳሎፔ ጫርኮይ ጫርካና ማላ ኦዴስ፤ ባ ዎልቃን ዱጌሃ ባጋ ጫርኮ ዴንዴስ።

27ኢዚ ኣሳስ ኣሾ ጉዱላ ቢታ ማላ፥ ኣባ ዶናን ዲዛ ኣጬ ማላ ዳሮ ፒራዛ ካፎታ ዬዲዴስ።

28ኢስቲ ዱንካኒ ኡቲዳሶ ዱንካና ዩሾን ዎዳ።

29ኢስቲ ኣሞቲዳይሳ ኢስታስ ኢሚዴስ፤ ኢስቲካ ካሊ ሚዳ።

30ጊዶ ኣቲን ኢስቲ ባ ሞሳ ኣንታ ቡሮ ሙሳ ቦላ ዴኢሺን፥

31ጾሳ ሃንቆይ ኢስታ ቦላ ዎዴስ፤ ኢስታ ጊዶፌ ሚኖ ኣሳታ ዎዴስ፤ ኢስራኤሌፔ ፓያ ናቴታ ሙልቂዴስ።

32ሃይሲ ኡባይ ሃኒንካ ኢስቲ ናጋራ ኦዛይሳ ኣጊቤቴና፤ ማላሊሲዛ ኢዛ ኦሶታካ ቤኢዲ ኣማኒቤቴና።

33ሄሳ ጊሻስ ኢዚ ኢስታ ላይታ ፔኖ ማላ ኣዴስ፤ ኢስቲ ዲዛ ዎዴታ ሂርጋን ዉርሲዴስ።

34ጾሲ ኢስታፌ ጉታ ዎን ኣቲዳይቲ ባ ናጋራ ፓጺዳ፤ ዎዚናፔ ኮዪሼ ጾሳኮ ሲሚዳ።

35ኢስቲ ጾሲ ኢስታስ ዛላ ጊዲዳይሳኔ ኡባፌ ቃ ጾሲ ኢስታ ዎዚዳይሳ ሃሳኢዳ።

36ጊዶ ኣቲን ኢስቲ ባንታ ኢንጻርሳን ኢዛስ ዎርዶቲዲ ባንታ ዶናን ጪሚዳ።

37ኢስታ ዎዚናይ ጾሳን ሚኒ ኤቂቤና፤ ኢዚ ኢስታራ ጫቄቲዳ ጫቆን ኣማኔቲቤቴና።

38ጊዶ ኣቲን ኢዚ ኢስታ ማሪዛዴ ጊዲዳ ጊሻስ ኢስታ ኢታቴ ኣቶ ጊዴስ፤ ኢስታካ ይሲቤና፤ ዳሮ ዎዴ ባ ሃንቆዛ ኢስታ ቦላፌ ቴቂዴስ፤ ባ ሃንቆዛ ቦሻ ኡባ ኢስታ ቦላ ዬዲቤና።

39ኢሲኖ ጫርኪ ኣዳፔ ጉዬ ሲሞንታ ጫርኮ ማላ ኣሾ ማይኢዳ ኣስ ጊዲዳይሳ ኣኬኪዴስ።

40ኢስቲ ባዞን ኣፑንቶ ኢዛ ቦላ ማካሊዶ! ሜላ ባዞን ኣፑንቶ ኢዛ ላንጪሲዶ!

41ኢስቲ ዛሪ ዛሪዲ ጾሳ ፓጪዳ፤ ኢስራኤሌ ጌሻ ማዱንዳ።

42ኢዚ ኢስታ ሞርኬታፔ ዎዚዳ ጋላሳታኔ ኢዛ ዎልቃ ዶጊዳ።

43ኢዚ ጊብጼ ቢታን ማላታ፥ ጻኖሴ ዴምባን ማላሊሲዛዝ ኦዳይሳ ቆፒቤቴና።

44ኢስታ ሻፋ ሃ ሱን ላሚዴስ፤ ሄሳ ጊሻስ ጊብጼ ኣሳቲ ሄ ሻፋታፔ ኡያናስ ዳንዳይቤቴና።

45ኢስታ ኦላናስ ኡዱንጼታኔ ኢስታ ቢታ ይሳናስ ሾታ ኪቲዴስ።

46ኢስታስ ሞኪዳ ካ ጉምባሮስ፤ ኢስቲ ኦ ዳቡርዳ ካ ቦሌስ ኢሚዴስ።

47ኢስታ ዎይኔ ቱራ ሻቻን፥ ኢስታ ባላሴ ሚታካ ኬንቾን ይሲዴስ።

48ኢስታ ሚዛታ ሻቻን ዎዴስ፤ ኢስታ ሜሄታ ዎልቃንን ጹጊ ዉርሲዴስ።

49ባ ሚኖ ሃንቆ፥ ቦሻ፥ ባሺኔ ይሲዛ ኪታንቻታን ኢስታ ቦላ ዬዲዴስ።

50ባ ሃንቆዛስ ኦጌ ጊግሲዴስ፤ ኢስታ ኢታ ሃርጌስ ኣ ኢሚዴስ፤ ጊዶ ኣቲን ሃይቆፔ ኣሺቤና።

51ጊብጼን ዬሌቲዳ ባይራ ናይታ ኡባ ዎዴስ፤ ካሜ ዱንካኔን ኮይሮ ዬሌቲዳ ናይታ ዉርሲዴስ።

52ጊዶ ኣቲን ኢዚ ባ ኣሳ ዶርሳ ማላ ኬሲ ሄሚዴስ፤ ዉዴ ማላ ባዞን ካሌዴስ።

53ኢዚ ኢስታ ሳሮን ካሌዴስ፤ ኢስቲካ ሂርጊቤቴና፤ ኢስታ ሞርኬታ ጊዲኮ ኣባይ ሚቲዴስ።

54ሂስቲዲ ባ ጌሻ ቢታ፥ ባ ኡሻቻ ኩሼን ጾኒ ኦይኪዳ ዙማ ኤፊዴስ።

55ኢዚ ኢስታ ሲንፌ ካዎቴ ጎዲዲ ኢስታ ቢታ ኢስራኤሌ ዛሬታስ ጊሼሬ ኢሚዲ ኢስታ ላቲሲዴስ፤ ኢስራኤሌ ኣሳ ኢስታ ሞርኬታ ኬን ዎዴስ።

56ኢስቲ ጊዲኮ ኡባፌ ቃ ጾሳ ቦላ ማካሊዳ፤ ኢዛ ፓጪዲ ኢዛ ዎጋታካ ናጎንታ ኢጺዳ።

57ኢስቲ ቤኒ ባንታ ኣዋታ ማላ ማካላንቻታኔ ካዲዛይታ ጊዲዳ፤ ኣማንንታ ቦካ ቶማን ኤቂዳ ቶራ ማላ ጊዲዳ።

58ኢስቲ ጎይኒዛ ቃሶሆታን ኢዛ ዪሎቺዳ፤ ባንታ ኤቃ ጾሳታን ኢዛ ቃናቲሲዳ።

59ሂስቲን ጾሲ ሄሳ ሲዪዲ ኬሂ ሃንቄቲዴስ፤ ኢስራኤሌ ሙሌራ ዬጊ ኣጋጊዴስ።

60ኣሳ ጊዶን ኢዚ ቶኪዳ ዱንካና ሴሎን ባ ዲዛሶዛ ዬጊ ኣጊዴስ።

61ጾሳ ዎልቃሲኔ ቦንቾስ ማላታ ጊዲዳ ታቦታ ሞርኬታ ኩሼን ኣ ኢሚዴስ።

62ኢዚ ባ ዴራ ቦላ ሃንቄቲዴስ፤ ኢስታ ጊ ማሻስ ኣ ኢሚዴስ።

63ኢስታ ፓንታ ታማይ ሚዴስ፤ ሂስቲን ኢስታ ጌላኦቲ ኣዚና ጌሎንታ ኣቲዳ።

64ኢስታ ቄሴቲ ማሻን ዉሪዳ፤ ኢስታ ማቼቲካ ዬካናስ ዳንዳይቤቴና።

65ሄሳፌ ጉዬ ጎዳይ ስኮፌ ቤጊዛ ማላ ቤጊዴስ፤ ዎይኮ ዎይኔ ኡሹ ኡዪ ማቲዳ ቃራይ ማፌ ቤጊዛ ማላ ዴንዲዴስ።

66ኢዚ ባ ሞርኬታ ሾጪዲ ጉዬ ዛሪዴስ፤ ኢስቲ ሜርናስ ዬላታና ማላ ኦዴስ።

67ዮሴፌ ዱንካኔ ካዴስ፤ ኤፍሬሜ ቆሞታ ዶሪቤና።

68ጊዶ ኣቲን ኢዚ ዩሁዳ ዛሬኔ ባ ሲቂዛ ጺዮኔ ዙማ ዶሪዴስ።

69ሄሳን ኢዚ ጾሳ ኬ ሳሎ ኬሲ ቃን ኬጺዴስ፤ ሳኣ ማላ ሜርናስ ኤሲዴስ።

70ባ ኣይሌ ዳዊቴ ዶሪዲ ዶርሳ ዉዴ ሄሚዛሶሆፔ ኤኪዴስ።

71ኢዛ ዶርሳታ ሄሚዛሶሆፔ ኬሲዲ ባ ዴሬ ያቆቤኔ ባ ጺንጾ ኢስራኤሌ ሄንንቻ ኦዴስ።

72ሂስቲን ዳዊቲካ ኢስታ ሱሬ ዎዚናን ሄሚዴስ፤ ቃሴካ ሂላን ኢስታ ካሌዴስ።