Psalms 73

Amharic Gamo (ጋሞ ማጻፋ)

1ዎዚና ጌሽ ጊዲዳ ኢስራኤሌ ኣሳስ ጾሲ ኣይ ማላ ኪያ!

2ጊዶ ኣቲን ታ ቶሆይ ጴቲን ታ ኩንዳይቻዳ ጉሶን ኣታዲስ።

3ኣይስ ጊኮ ኢታ ኣሳታኔ ማካላንቻታ ዱሬቴ ቤኣዳ ታኒካ ኢስታ ማላ ሃናናስ ኣሞታዲስ።

4ኢስታስ ቱጋይ ዴና፤ ኢስታ ኣሳቴይ ፓያኔ ሚኖ።

5ኢስቲ ሃራ ኣሳይ ቱጋቲዛ ማላ ቱጋቴቴና፤ ሃራ ኣሳ ማላካ ሜቶቲ ኤሬቴና።

6ሄሳ ጊሻስ ኢስቲ ኦቶሬቴ ኣሌቆ ማላ ቆን ኣቴስ፤ ማካላቴ ኣፋላ ማላ ማይኤቴስ።

7ኢስታ ዎዚናፔ ኢታ ቆፋይ ፑልቴስ፤ ባንታ ኣይፌ ኬሲ ዴሬቄቴስ።

8ኢስቲ ቂቴሲኔ ኢታ ሃሳዬቴስ፤ ኢስቲ ባንታ ኦቶሮን ሃራታ ኡንኤናዉ ማንዴቴስ።

9ኢስቲ ሳሎን ዲዛ ጾሳ ባንታ ዶናን ጫዬቴስ፤ ሳኣን ዴኢዛ ኣሳ ባንታ ኢንጻርሳን ዱኬቴስ።

10ሄሳ ጊሻስ ዴሬ ኡባይ ኢስታኮ ጎቼስ፤ ኢስቲ ዮቲዛይሳካ ኡባ ኤሶን ኣማኔቴስ።

11ኢስቲ፥ «ጾሲ ኣይ ኤሪዜ? ኡባፌ ቃ ጾሳስ ኤራቴ ዲዜ?» ጌቴስ።

12ሄኮ ኢታቲ ሃይሳ ሚሳቴቴስ፤ ኢስቲ ኡባቶ ዉዱ ጎንታይታ፤ ዱሬቴ ቆ ጋኪዳይታ።

13ሂስቲን ታኒ ዎዚና ጌሻቴን ናጊዳይሲ ታና ኣይ ማዲዴ! ታ ኩሼ ታ ጺሎቴን ሜጪዳይሲ ጮ ታና ሊቤና።

14ጋላስ ኩሜ ታኒ ሜቶ ቤያዲስ፤ ዎንቲን ዎንቲን ታኒ ቃጻዬታዲስ።

15ታኒ ኢስቲ ሃሳይዛይሳ ማላ ሃሳያና ቆፒዳኮ ኔ ዴራስ ታ ኣማኔቶንታ ኣስ ጊዳና።

16ታኒ ሃ ዮኦዛ ሻካ ኤራናስ ቆፓዲስ ጊዶ ኣቲን ታ ኤራፔ ቦላ ጊዲዴስ።

17ሄሲካ ታኒ ጾሳ ጌሻሶሆ ጌላና ጋካናሲኔ ኢታታ ዉርሴ ቤኣና ጋካናሳ።

18ኣዳካ ኔ ኢስታ ሃሊጺዛሶን ዎዳሳ፤ ኔኒ ኢስታ ዱጌ ባሻሶ ዬዳዳሳ።

19ኢስቲ ሃሳኦንታ ኤሶን ይዳ፤ ዳጋማን ኢሶይካ ኣቶንታ ዲፒ ጊዳ።

20ኣቤት ጎዳዉ! ኔኒ ዴንዲዛ ዎዴ ኣሲ ስኮፌ ቤጊን ይዛ ኣጉሞ ማላ ኢስቲ ያና።

21ታኒ ዪሎቲዳ ዎዴኔ ታ ዎዚናይካ ማዱንጺዳ ዎዴ፥

22ታኒ ቆፋይ ባይንዳ ዳማዲስ፤ ታኒ ኔ ሲንን ሚዛ ማላ ጊዳዲስ።

23ጊዶ ኣቲን ታኒ ኡባቶካ ኔናራ ዳይስ፤ ታ ኡሻቻ ኩሼዛካ ኔኒ ኦይካዳሳ።

24ኔ ዞሬን ታና ካሌዳሳ፤ ሄሳፌ ጉዬ ኔኒ ታና ቦንቾስ ኤፋና።

25ሳሎን ኔፔ ኣቲን ታስ ሃራይ ኦኒ ዲዜ? ሳኣንካ ኔፔ ሃራ ኦናካ ኮይኬ።

26ታ ዎልቃይኔ ታ ዎዚናይ ዳቡራናስ ዳንዳዬስ፤ ጊዶ ኣቲን ጾሲ ታ ዎዚናስ ሚኖቴኔ ታስ ሜርና ቃዳ።

27ኔፔ ሃኪዛይቲ ያና፤ ኔስ ኣማኔቶንታይታ ኡባ ኔኒ ይሳና።

28ጊዶ ኣቲን ታስ ጾሳኮ ሺቆይ ሎኦ፤ ኔ ኦሶ ኡባ ዮታና ማላ። ታኒ ኡባ ሃሪዛ ጎዳ ታ ባቃታ ኣቲዛሶ ኦዲስ።

← Chapter 72 Chapter 74 →