Psalms 71

Amharic Gamo (ጋሞ ማጻፋ)

1ኣቤት ጎዳዉ! ኔኒ ታስ ታ ባቃታ ኣቲዛሶ፤ ሙሌካ ኔ ታና ዬላሶፓ።

2ኔ ጺሎቴን ታና ኬሳ ኤካ፤ ኔ ሃይ ታኮ ዬጋዳ ታና ኣሻ።

3ኔ ታስ ኡባ ዎዴ ጌሜታ ኣቲዛ ሚኖ ዛላ ጊዳ፤ ታና ኣሻናስ ኔ ኣዛዛ፤ ታስ ሚኖ ሚጻይኔ ዛላይ ኔና።

4ኣቤት ታ ጾሳዉ! ኢታታ ኩሼፔ፥ ጌናንቻታፔኔ ሜንጼ ኢታታፔ ታና ኣሻ።

5ኣቤት ኡባ ሃሪዛ ጎዳዉ! ታ ሂዶታይ ኔና፤ ዬላጋቴ ዎዴፔ ዶማዳ ታ ኣማኔቲዛይ ኔና።

6ታኒ ዬሌቶሶፌ ዶማዳ ታ ኔናን ዜምፓዲስ፤ ታ ኣዬይ ኡሎፔ ታ ዬሌታና ማላ ኦዳይ ኔና፤ ኡባ ዎዴ ታ ኔና ጋላታይስ።

7ዳሮ ኣሳይ ታና ዱማ ኣይፌን ጼሊዴስ፤ ኔኒ ጊዲኮ ታ ባቃታ ኣቲዛ ዎጋ ዛላ።

8ጋላስ ኩሜ ኔ ቦንቾ ታ ዮታናስ፥ ታ ዶናን ጋላታይ ኩሚዴስ።

9ታኒ ጪሚዳ ዎዴን ታና ኦሎፓ፤ ታ ዎልቃይ ኢጺዳ ዎዴን ታና ኣጎፋ።

10ኣይስ ጊኮ ታ ሞርኬቲ ታና ሂሊዳ፤ ታና ዎናዉ ኮይዛይቲ ታ ቦላ ኢታ ማቄቲዳ።

11ኢስቲ፥ «ጾሲ ኢዛ ኣጊዴስ፤ ኢዛ ኣሻናይካ ዴና፤ ሄሳ ጊሻስ ኣኔ ኢዛ ጎዲ ኦይኮስ» ጊዳ።

12ኣቤት ጾሳዉ! ታፔ ሃኮፋ። ኣቤት ታ ጾሳዉ! ታና ማዳናስ ኤሌላ።

13ታና ሞቲዛይቲ ዬላቲዲ ዬቶ። ታና ቆሃናዉ ኮይዛይቲ ዬላኔ ካዉሻቴ ማይኤቶ።

14ታኒ ጊዲኮ ኡባቶ ኔና ሂዶታ ኦይስ። ታኒ ጋላታ ቦላ ጋላታ ኔስ ጉጃና።

15ታኒ ኣይ ሊኬ ሃሳያናኮ ኤሮንታ ኣጊኮካ ጋላስ ኩሜ ታ ዶናይ ኔ ጺሎቴ ጊሻሲኔ ኔ ኣቶቴ ጊሻስ ሃሳዬስ፤

16ኣቤት ጎዳዉ፥ ጾሳዉ! ታኒ ያዳ ኔ ዎልቃማ ኦሶ ኣዋጃና፤ ቃሴካ ኔ ጺሎቴ ጻላ ዮታና።

17ኣቤት ጾሳዉ! ኔኒ ታና ዬላጋቴፌ ዶማዳ ታማርሳዳሳ፤ ታኒካ ሃኖ ጋካናዉ ማላሊሲዛ ኔ ኦሶዛ ኣዋጃይስ።

18ኣቤት ጾሳዉ! ኔ ማታ ጉዬፔ ያና ዬሌታስ፥ ኔ ዎልቃ ጉዬፔ ያና ዴሬ ኡባስ፥ ታ ቆንጪሳና ጋካናሲኔ ታ ጪማዳ ፑሉማና ጋካናስ ኔ ታና ኣጎፋ።

19ኣቤት ጾሳዉ! ኔ ጺሎቴይ ሳሎ ጋኪዴስ፤ ኣቤት ጾሳዉ! ኔኒ ጊታ ሚሽ ኦዳሳ፤ ኔና ሚሳቲዛይ ኦኒካ ዴና።

20ኔኒ ታ ቦላ ዳሮ ሜቶ ኤሃዳሳ፤ ጊዲኮካ ኔኒ ታና ጪማ ኦላፌ ጎቻ ኬሳዳሳ፤ ታ ዴኦ ዛራ ኦራዳሳ።

21ኔኒ ታ ቦንቾ ካሴይሳፌ ዳርሳና፤ ኔኒ ታና ዛሬዳካ ሚንና።

22ኣቤት ታ ጾሳዉ! ኔ ቱማቴ ጊሻስ ታኒ ኔና ዲን ጋላታና፤ ኣቤት ኢስራኤሌ ጌሻዉ! ታኒ ማሲንቆን ኔና ሳባና።

23ታ ዎዚናይ ኡፋይሳን ኩሚዲ ኔስ ዬጺዛ ዎዴ፥ ኔኒ ዎዚዳ ታ ሼምፖያ ኔስ ኢሊላዉስ።

24ታ ኢንጻርሳይ ኔ ጺሎቴ ጊሻስ ጋላስ ኩሜ ሃሳዬስ፤ ታ ቆሄቴ ኮይዛይቲ ዬላቲዳኔ ካዉዪዳ።

← Chapter 70 Chapter 72 →