Psalms 62

Amharic Gamo (ጋሞ ማጻፋ)

1ታ ሼምፖያ ጾሳን ጻላ ሼምፖ ዴማዉስ፤ ታስ ኣቶቴ ኢዛፔ ዬስ።

2ኢዚ ጻላ ታስ ዛላኔ ታና ኣሺዛይሳ፤ ታ ቆቴታ ኣቲዛሶ ጊዲዳ ጊሻስ ሙሌካ ሂርጊኬ።

3ጪሚዲ ኩንዳና ማቲዳ ጎዳ ማላኔ ሙሲዳ ላሻ ማላ ዎልቃይ ባይንዳ ኣስ ይሳናዉ ሱጊሼ ኣዉዴ ጋካናስ ዴኣንዴቲ?

4ኢስቲ ኢዛ ቦንቾ ሶሆፔ ካዉሻናስ ጻላ ኮዬቴስ፤ ኢስቲ ዎርዶን ኡፋዬቴቴስ፤ ባንታ ዶናን ኣንጄቴስ፤ ጊዶ ኣቲን ባንታ ዎዚናን ቃንጌቴስ።

5ታ ሼምፖዬ! ዎፑ ጋዳ ጾሳ ጻላ ናጋ፤ ታስ ሂዶታይ ኢዛፔ ያና።

6ኢዚ ጻላ ታስ ዛላኔ ታና ኣሺዛይሳ፤ ታ ቆቴታ ኣቲዛሶ ጊዲዳ ጊሻስ ሙሌካ ሂርጊኬ።

7ታስ ኣቶቴኔ ቦንቾይ ቤቲዳይ ጾሳፌ፤ ኢዚ ታ ቆቴታ ኣቲዛሶኔ ታስ ሚኖ ዛላ።

8ኣሶ! ኡባ ዎዴ ጾሳን ኣማኔቲቴ፤ ኢዚ ኑስ ቆቴቲ ኣቲዛሶ ጊዲዳ ጊሻስ ኢንቴ ዎዚና ቆፋ ኢዛስ ዮቲቴ።

9ቦንቾሶፔ ዬሌቴ ማዴና፤ ካቲዳሶፔ ዬሌቴካ ኡባይ ሃዳ። ኢስቲ ሜዛኔ ዴንንታ ጫርኮ ማላ፤ ኢስቲ ኢሲ ቦላ ጫርኮ ማላ ካዉሻ።

10ቦንቃን ኣማኔቶፍቴ፤ ካይሲ ሺሺዳ ዱሬቴን ሂዶታ ኦፍቴ። ኢንቴስ ዱሬቴ ዳሪኮካ ኢንቴ ዎዚና ኢዛ ቦላ ዎፍቴ።

11ጾሳይ ኢሲቶ ሃሳይዴስ፤ ታኒ ናምኡ ዮኦታ ሲያዲስ፤ ሄይቲካ፥ «ዎልቃይ ጾሳሳ፤

12ሜርና ሲቆይ ጾሳሳ።» ኣቤት ጎዳዉ! ኔኒ ኣስ ኡባስ ኢዛ ኦሶ ኦሶ ማላ ኢማና።

← Chapter 61 Chapter 63 →