Psalms 60

Amharic Gamo (ጋሞ ማጻፋ)

1ኣቤት ጾሳዉ! ኔኒ ኑና ኣጋዳሳ፤ ኑና ሜንሬ ዬጋዳሳ፤ ኔኒ ኑና ሃንቄታዳሳ፤ ሃኢ ጊዲኮ ሲማዳ ኑና ጊጊሳ።

2ኔኒ ቢታዮ ቃዳ ዛኢሳዳሳ፤ ኢዛ ኮኮሪዛ ጊሻስ ኔኒ ኢዚ ዛኣ ኩን።

3ኔኒ ኔ ኣሳ ሜቶ ቤሳዳሳ፤ ኔኒ ኑና ማሲዛ ዎይኔ ኡሹ ኡሻዳሳ።

4ኔስ ያዪዛይቲ ባንታ ሞርኬታ ዎንዳፌፔ ኣታና ማላ ማላታ ኢማዳሳ።

5ኔኒ ሲቂዛይቲ ኣታና ማላ ኔ ዎልቃን ኑና ኣሻ፤ ኔኒ ኑኮ ኣላ።

6ጾሲ ባ ኬን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ሾባ ጊሻና።

7ጋላኣዴይኔ ሚናሴይ ታይታ፤ ኤፍሬሜይ ታስ ሁኤ ቆቤ፤ ዩሁዳይ ታስ ካዎቴ ጉፌ።

8ሞኣቤይ ታ ሜጬቲዛሶ፤ ኤዶሜይ ታስ ጫማ ዎዛሶ፤ ታኒ ፊሊስጼሜ ጾናዳ ጌሬራና» ጊዴስ።

9ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌናይ?

10ኣቤት ጾሳዉ! ኑና ኣጊዳይ ኔና ጊዲኪ? «ኔኒ ኑ ቶራንቻታራ ኦላስ ኬዚኬ» ጋዳሳ።

11ኣሳፔ ጊዲዳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ።

12ጾሳ ዎልቃን ኑ ሞርኬታ ኑኒ ጾናና፤ ኢዚ ኑ ሞርኬታ ዬታና።

← Chapter 59 Chapter 61 →