Psalms 56

Amharic Gamo (ጋሞ ማጻፋ)

1ኣቤት ጾሳዉ! ኣሳይ ታና ኡንኤስ፤ ታ ሞርኬቲ ታና ኡባ ዎዴ ዬዴቴስ፤ ሄሳ ጊሻስ ኔ ታስ ቃታ።

2ታ ሞርኬቲ ኡባ ጋላስ ታና ዬዴቴስ፤ ዳሮቲ ኦቶሬቴን ታና ኦሌቴስ።

3ታና ባቢሲዛ ዎዴ ታ ኔናን ኣማኔታይስ።

4ታኒ ጾሳን ኣማኔቲዛ ጊሻስ ባቢኬ፤ ኢዚ ኢሚዳ ሂዶታ ቃላ ጊሻሲካ ኢዛ ጋላታይስ፤ ታ ጾሳን ኣማኔታይስ፤ ኣሲ ታና ኣይ ኦኔ?

5ኡባ ጋላስ ታ ሞርኬቲ ታፔ ሞሮ ዴማናስ ዎጼቴስ፤ ኢስቲ ኡባ ዎዴ ታና ቆሃናስ ዞሬቴቴስ።

6ሺቂዲ ታ ቦላ ማቄቴቴስ፤ ዛማዲ ኡቲዲ ታና ካሌቴቴሲኔ ታ ጌዶን ኤቄቴቴስ፤ ታና ዎናስካ ኮዬቴስ።

7ጾሶ! ኢስታ ኢታቴ ጊሻስ ኢስታ ዬዶፋ፤ ሄ ካዎቴታ ኔ ሃንቆን ካዉሻ።

8ኔኒ ታ ዬሆ ቤያዳሳ፤ ታ ኣፉን ማካዳሳ፤ ኡባቲካ ኔ ማዝጋባን ጻፌቲዳ።

9ታኒ ኔና ጼይጊዛ ዎዴ ታ ሞርኬቲ ጉዬ ሲሜቴስ፤ ጾሲ ታናራ ዲዛይሳ ታኒ ሄሳን ኤራይስ።

10ታ ኢዛ ቃላ ጋላቲዛ ጾሳን፥ ታ ኢዛ ቃላ ሳቢዛ ጎዳን፥

11ታኒ ሄ ጾሳን ኣማኔቲዛ ጊሻስ ባቢኬ፤ ኣሲ ታና ኣይ ኦኔ?

12ኣቤት ጾሳዉ! ታኒ ኔስ ኣዲና ኣዲኔታዲስ፤ ታ ኣዲኔቶይሳ ጋላታ ያርሾ ኔስ ጋና።

13ኔኒ ታ ሼምፖዮ ሃይቆፔ ታ ቶሆታ ጴፔ ኣሻዳሳ። ሄሳ ጊሻስ ኢዚ ሼምፖራ ፓጻ ዲዛይታስ ፖኢሲዛ ፖኦን ጾሳ ሲንን ታ ሲሜሬታና።

← Chapter 55 Chapter 57 →