Psalms 34

Amharic Gamo (ጋሞ ማጻፋ)

1ታኒ ጎዳ ኡባ ዎዴ ጋላታና፤ ኢዛ ጋላታይ ኣይ ዎዴንካ ታ ዶናፔ ፓጬና።

2ታኒ ጎዳን ጬቄታይስ፤ ናቄቲዳይቲ ሄሳ ሲዪዲ ኡፋዬቴቶ።

3ኣኔ ታናራ ኢሲፌ ጎዳ ቦንቾስ፤ ኢዛ ሱንካ ቁ ቁ ኦስ።

4ታኒ ጎዳ ኮያዲስ፤ ኢዚካ ታስ ዛሪዴስ፤ ታኒ ያዪዛ ሚሽ ኡባፌ ታና ኣሺዴስ።

5ኢዛኮ ጼሊዛ ኡባ ሲንይ ፖኤስ፤ ኢስቲ ሙሌካ ዬላቴቴና።

6ሃ ሂዬሳይ ዋሲዴስ፤ ጎዳይ ኢዛ ዋሶዛ ሲዪዴስ፤ ሜቶ ኡባፌ ኢዛ ኣሺዴስ።

7ጎዳ ኪታንቻይ ጎዳስ ያዪዛይታ ናጌስ፤ ኢዚ ኢስታ ዩሾዛን ጊዲዲ ኢስታ ኣሼስ።

8ጎዳይ ኪያ ጊዲዳይሳ ዩሺ ቆፒቴ፤ ኢዛኮ ሺቂዳይ ኣንጄቲዳዴ።

9ኢንቴኖ ጌሻ ኣሳቶ! ጎዳስ ያዪቴ፤ ኣይስ ጊኮ ኢዛስ ያዪዛ ኡባታስ ኣይኮይካ ፓጬና።

10ጋሞቲ ሚዛዚ ዪን ኮሻቴቴስ፤ ጎዳ ኮይዛይታስ ጊዲኮ ሎኦ ሚሺ ኣይኮካ ፓጬና።

11ናይቶ! ሃ ዪቴ፤ ታ ጊዛዝ ሲዪቴ፤ ታኒ ኢንቴና ጎዳስ ያሻቴ ታማርሳና።

12ኣዱሳ ላይ ዳናስ ዶሲዛይኔ ሎኦ ሚሽ ቤያናስ ኮይዛይ ኦኔ?

13ኔ ኢንጻርሳ ኢታ ሃሳዮንታ ማላ ናጋ፤ ኔ ዶናፔ ዎርዶይ ኬዞንታ ማላ ናጌታ።

14ኢታፔ ሻኬታ፤ ሎኦ ሚሽ ኦ፤ ሳሮቴ ኮያዳ ካላ።

15ጎዳ ኣይፌይ ጺሎታኮ ጼሌስ፤ ቃሴ ኢዛ ሃይ ኢስታ ዎሳ ኤዝጌስ።

16ኢስታ ሃሳኢሲዛ ሚሽ ቢታፌ ይሳና ማላ፥ ጎዳይ ኢታ ኦዛይታ ባ ሃንቆ ኣይፌን ጼሌስ።

17ጺሎቲ ዋሴቴስ፤ ጎዳይ ኢስታ ዋሶ ሲዬስ፤ ኢዚካ ኢስታ ሜቶ ኡባፌ ኣሼስ።

18ጎዳይ ዎዚናይ ሜቂዳይታስ ማታን ዴስ፤ ቃሴ ሂዶታ ቃንጺዳይታካ ኣሼስ።

19ጺሎ ኣስ ጋኪዛ ሜቶይ ዳሮ፤ ጊዶ ኣቲን ጎዳይ ኢዛ ሄ ኡባፌ ኣሼስ።

20ጎዳይ ኢዛ ሚን ናጌስ፤ ኢዛ ሜቄታፔ ኢሶይካ ሜቄና።

21ኢታታ ኢስታ ኢታቴ ዎና፤ ጺሎታ ኢጺዛይቲ ፒርዴታና።

22ጎዳይ ባ ኦሳንቻታ ኣሼስ፤ ኢዛኮ ባቃቲዳ ኦኒኔ ፒርዴቴና።

← Chapter 33 Chapter 35 →