Psalms 24

Amharic Gamo (ጋሞ ማጻፋ)

1ሳኣይኔ ሳኣን ኩሚዳ ኡባይ ጎዳሳ፤ ሳሎ ጉፋንን ዲዛ ኡባይ ጾሳሳ።

2ሳኣ ጊታ ኣባታ ቦላ ሚጪዴስ፤ ሃ ቦላካ ሚንዲ ኤሲዴስ።

3ጎዳ ዙማ ቦላ ኬዛናይ ኦኔ? ኢዛ ጌሻሶሆን ኤቃናይ ኦኔ?

4ኢዛ ኩሼይ ናጋራፔ ጌዪዳይ፥ ኢዛ ዎዚናይ ጌሻ ጊዲዳይ፥ ኤቃ ጾሳታስ ጎይኖንታይ፥ ዎርዶ ጫቆንታይ፥

5ኢዚ ጎዳፔ ኣንጆ ኤካና፤ ባና ኣሺዛ ጾሳፌ ጺሎ ፒርዳ ዴማና።

6ጾሳኮ ጼሊዛ ኣሳይኔ ያቆቤ ጾሳ ሲን ኮይዛ ኣሳይ ሄይታንታ ማላ።

7ካሬቲ ዶዬቴቶ፤ ቦንቾ ካዎይ ጌሎ፤ ቤኒ ፔንጌቲ ኢዛ ኡፋይሳን ሞኪቴ!

8ሄ ቦንቾ ካዎይ ኦኔ? ሚኖኔ ዎልቃማ ጎዳ! ኦላስካ ኢዚ ዎልቃማ ጎዳ!

9ካሬቲ ዶዬቴቶ፤ ቦንቾ ካዎይ ጌሎ፤ ቤኒ ፔንጌቲ ኢዛ ኡፋይሳን ሞኪቴ!

10ሃ ቦንቾ ካዎይ ኦኔ? ሄ ቦንቾ ካዎይ ሳሎ ሜቴ ጎዳ!

← Chapter 23 Chapter 25 →