Psalms 19

Amharic Gamo (ጋሞ ማጻፋ)

1ሳሎቲ ጾሳ ቦንቾ ዮቴቴስ፤ ሳሎ ጉፋንይ ኢዛ ኩሼ ኦሶ ኣዋጄስ።

2ኢሲ ጋላሳይ ሃራ ጋላሳስ ሄሳ ዮቴስ፤ ኢሲ ቃማይካ ካሊዛ ቃማስ ኤራቴ ቆንጪሴስ።

3ኢስታስ ሃሳያይ ዎይኮ ቃላይ ባዋ፤ ኢስታ ጬንጉርሲካ ሲዬቴና።

4ጊዶ ኣቲን ኢስታ ሃሳያ ጬንጉርሲ ሳኣ ኡባን ላሌታና፤ ኢስታ ቃላይካ ቢታ ጋጻ ጋካና። ጾሲ ኣርሼስ ሳሎን ሶሆ ጊግሲዴስ።

5ኣርሼይ ሚሺራይ ባ ኬፌ ኬዚዛ ማላ ፖኢ ኬኤስ፤ ጋዴ ዎጺዛ ፒላታ ኣሳ ማላ ኡፋዬቴስ።

6ኣርሼይ ኬሳሶፔ ዉሎሶ ጋካናስ ቤስ፤ ኢዛ ሴላፔ ጌሚ ኣታና ሚሺ ዴና።

7ጎዳ ዎጋይ ሱሬ፤ ሼምፖ ዛሪ ጪልኢሴስ፤ ጎዳ ኣዛዞይ ኣማኔቲዛይሳ፤ ኣኬካይ ፓጪዳይታስ ኣ ኤራቴ ኢሜስ።

8ጎዳ ዎጋይ ሊኬ፤ ዎዚና ኡፋይሴስ። ጎዳ ኣዛዞይ ጌሻ፤ ኣይፌ ፖኢሴስ።

9ጎዳስ ያሺ ጌሻቴ፤ ኢዚ ሜርናስ ኤቂዲ ዴኣና። ጎዳ ፒርዳይ ሙሌራ ቱማኔ ጺሎ።

10ዎርቃፌኔ ሙሩታ ዎርቃፌ ኣ ዶሴቴስ፤ ኤሳፌኔ ኤሳ ኢሊሎፔ ኣ ማልኤስ።

11ቃሴ ታና ኔ ኣይሌዛ ናጌታና ማላ ዞሬስ፤ ኔ ዎጋ ናጎይ ዳሮ ጎኤስ።

12ባ ባላ ዴሚዛይ ኦኔ? ኣቤት ጎዳዉ! ጌሚዳ ናጋራፔ ታና ጌሻ።

13ታኒ ኔ ኣይሌይ፥ ጻላቴን ናጋራ ኦንታ ማላ ኔኒ ታና ናጋ። ናጋራይ ታና ሃሮፖ፤ ሄ ዎዴ ታኒ ሱሬ ጊዳና፤ ጊታ ሞሮፔካ ጌያና።

14ኣቤት ጎዳዉ! ታ ዜምፒዛ ዎጋ ዛላዉ! ታና ዎዚዳ ታ ጎዳዉ! ታ ዶናፔ ኬኢዛ ቃላይኔ ታ ዎዚና ቆፋይ ኔና ኡፋይሲዛይሳ ጊዶ።

← Chapter 18 Chapter 20 →