Psalms 16

Amharic Gamo (ጋሞ ማጻፋ)

1ኣቤት ጎዳዉ! ታ ባቃታ ኣቲዛሶይ ኔና፤ ኔ ኪኦን ታና ቆታ።

2ታኒ ጎዳስ፥ «ኔኒ ታ ጎዳ፤ ኔፔ ኣቲን ሃራ ሎኦይ ታስ ዴና» ጋዲስ።

3ሳኣን ዴኢዛ ጌሻቲ ኣይ ማላ ቦንቼቲዳይቴ! ታኒ ኢስታን ኡፋዬታይስ።

4ዎርዶ ጾሳታ ካሊዛይቲ ባንታ ቦላ ሜቶ ዳርሴቴስ። ጊዶ ኣቲን ታኒ ኤቃ ጾሳታስ ሹኪኬ፤ ኢስታስ ሱንካ ጼይጊኬ።

5ጎዳዉ! ታስ ላታ ጺንጾይኔ ቃዳይ ኔና፤

6ኔ ታስ ዋዳ ዛዋይ ሎኦ ጊዲዴስ፤ ኬሂፔ ሎኦ ጺንጾይ ታና ጋኪዴስ።

7ታና ዞሪዛ ጎዳ ጋላታይስ፤ ኦማርስ ታ ዎዚናይ ታና ታማርሴስ።

8ታኒ ኡባቶ ጎዳ ሲንሳይስ፤ ኢዚ ታ ኡሻቻን ዲዛ ጊሻስ ታኒ ኮኮሪኬ።

9ሄሳ ጊሻስ ታ ዎዚናይ ኡፋዬቴስ፤ ታ ሼምፖይካ ዎፑ ጌስ፤ ታ ኣሳቴይካ ሂርጋይ ባይንዳ ሼምፒ ዴስ።

10ኔ ታና ሲኦሌን ኣጋካ፤ ኔ ጌሻዛ ዎቃና ማላ ኣጋካ።

11ኔኒ ታና ዴኦ ኦጌ ቤሳሳ፤ ኔ ማታን ኩሜ ኡፋይሲ፥ ኔስ ኡሻቻን ሜርና ኡፋይሲ ዴስ።

← Chapter 15 Chapter 17 →