Psalms 103

Amharic Gamo (ጋሞ ማጻፋ)

1ታ ሼምፖዬ! ጎዳ ጋላታ! ታ ኩሜ ኣሳቴይ ኢዛ ጌሻ ሱን ጋላቶ።

2ታ ሼምፖዬ! ጎዳ ጋላታ! ኢዚ ኔስ ኦዳ ኪያቴ ኡባ ዶጎፓ።

3ኢዚ ኔ ናጋራ ኡባ ኣቶ ጌስ፤ ኢዚ ኔ ሃርጌ ኡባፌ ኔና ፓስ።

4ኢዚ ኔና ዱፎን ጌሎንታ ማላ ኣሼስ፤ ሜርና ሲቆኒኔ ማሮታን ኔና ኣንጄስ።

5ጎሌ ካፎ ኔኒ ኦራጻና ማላ ኢዚ ኔ ኣሞ ኡባ ሎኦ ሚሻን ኩንና።

6ጎዳይ ናቄቲዳይታስ ጺሎ ኦሲኔ ሱሬ ፒርዳ ፒርዴስ።

7ኢዚ ባ ኦጌ ሙሴ ቤሲዴስ፤ ባ ኦሶካ ኢስራኤሌ ኣሳ ኤሪሲዴስ።

8ጎዳይ ቃቲዛዴኔ ማሪዛዴ፤ ኢዚ ሃንቄታናስ ኤሶቶንታዴ፤ ኢዛ ሲቆይ ኬሂፔ ዳሮ።

9ኢዚ ኡባ ዎዴ ኑ ሞሮስ ሞቴና፤ ሜርናስካ ሃንቄቴና።

10ኢዚ ኑ ናጋራ ማላ ኑስ ኦቤና፤ ኑ ኢታቴ ማላ ኑስ ዛሪቤና።

11ሳሎይ ሳኣፔ ቂዛ ማላ ጎዳስ ያዪዛይታስ ኢዛ ሲቆይ ጊታ።

12ኣርሼይ ሞኪዛሶፔ ዉሊዛሶይ ሃኪዛ ማላ ጎዳይ ኑ ሞሮዛ ኑፔ ሃሲዴስ።

13ኣዋይ ባ ናይታስ ቃቲዛ ማላ ጎዳይ ባስ ያዪዛይታስ ቃቴስ።

14ኑኒ ኣዛፔ ሜቲዳኮ ኢዚ ኤሬስ፤ ኑኒ ቢታ ጊዲዳይሳካ ኢዚ ኣኬኬስ።

15ኣሳ ዴኦይ ጊዲኮ ማታ ማላ፤ ኢዚ ባዞ ጪሻ ማላ ጪዬስ።

16ጫርኮይ ጫርኪዛ ዎዴ ቆቆፌቲ ዬስ፤ ኢዚ ካሴ ዲዛሶይ ሙሌካ ኤሬቴና።

17ጊዶ ኣቲን ጎዳስ ያዪዛይታስ ኢዛ ሲቆይ ሜርናፔ ሜርና ጋካናሳ፤ ኢዛ ጺሎቴይካ ዬሌታፔ ዬሌታ ጋካናሳ።

18ሄሲ ሃናናይ ኢዛ ጫቆ ቃላ ናጊዛይታሲኔ ኢዛ ኣዛዞ ፖላናስ ሚኔቲዛይታሳ።

19ጎዳይ ባ ኣራታ ሳሎን ኤሲዴስ፤ ኢዛ ካዎቴይ ኡባ ሃሬስ።

20ኢንቴኖ ኢዛ ኪታንቻቶ! ኢዛ ኣዛዞ ፖሊዛ ዎልቃማቶ! ኢዚ ጊዛይሳ ኤዝጊዛይቶ! ጎዳ ጋላቲቴ።

21ኢንቴኖ ሳሎን ዴኢዛ ሚኖቶ! ኢዛ ሼኔ ኦዛ ኣይሌቶ! ጎዳ ጋላቲቴ።

22ኢንቴኖ ኢዚ ሃሪዛ ሶሆ ኡባን ዴኢዛ ሜታቶ! ኡባይካ ጎዳ ጋላቲቴ። ታ ሼምፖዬ! ጎዳ ጋላታ።

← Chapter 102 Chapter 104 →