Proverbs 27

Amharic Gamo (ጋሞ ማጻፋ)

1ዎንቶይሳን ጬቄቶፋ፤ ዎንቶ ኣዚ ሃናናኮ ኔ ኤራካ።

2ኔና ሃራ ኣሲ ጋላቶፔ ኣቲን ኔርካ ኔና ጋላቶፓ፤ ሃራ ኣሲ ኔና ሳቦፌ ኣቲን ኔኒ ኔርካ ኔና ሳቦፋ።

3ሹቺ ዴጾ፤ ኣንጮይ ቶኮ፤ ጊዶ ኣቲን ኤያ ኣሲ ዴንዛ ኦሺ ናምኣታፔካ ዴጼስ።

4ሼኔይ ሜንጼ ኢታ፤ ሃንቆይ ሜንጼ ኢታ፤ ቃናቴ ሲንን ኤቂ ዳንዳያናይ ኦኔ?

5ጌሚዳ ሲቆፔ ቆንጬን ሴሪዛ ሴራይ ሎኦ።

6ሞርኬይ ኔና ዳሮቶ ዬራናፔ ሲቆይ ኔና ዴቺዛይሲ ኪያ።

7ካሊዳ ኣስ ኤሳ ኢሊሎይ ኢቴስ፤ ጊዶ ኣቲን ጋፊዳ ኣስ ጋራ ማላ ጫሚዛ ሚሺካ ማልኤስ።

8ባ ሶ ኣጊዲ ዩዪዛ ኣሲ፥ ባ ኬፌ ሃካ ፓሊዛ ካፎ ማላ።

9ሺቶይኔ ኤጻኔይ ኣስ ኡፋይሲዛይሳ ማላ፥ ሲቆ ላጌ ዞሬይካ ኡፋይሴስ።

10ኔ ላጌኔ ኔ ኣዋ ላጌ ኣጎፋ፤ ኔ ኢሻኮ ቦፓ። ሃሆን ዲዛ ኢሻፔ ኔስ ማታን ዲዛ ሾሮይ ኪያ።

11ታ ናዞ! ኔኒ ኣ ኤራንቻ ጊዳ፤ ታ ዎዚና ኡፋይሳ፤ ሂስቲኮ ታና ካዛይታ ኦይሻካ ዛራና።

12ጪንጫ ኣሲ ሜቶይ ዪዛ ዎዴ ቤኢዲ ቆቴቴስ፤ ጊዶ ኣቲን ኣኬካይ ፓጪዳ ኣሲ ሜቶ ጋርስ ቢ ጌሌስ፤ ሂስቲዲ ጉዬፔ ቆሄቴስ።

13ኤሮንታ ኣሳስ ሁርቡታ ጌሊዛ ኣሳ ማይኦ ቃራ ኤካ፤ ሃዉሻ ማጫሳስ ዋሴ ጌሊዛ ኣሳ ማይኦ ኦይካ።

14ማላዶ ዎንታራ ባ ቃላ ቁ ሂስቲዲ ባ ሾሮ ኣንጆይ ቃንጌ ማላ ቆዴቴስ።

15ኡባ ዎዴ ኦሽ ኦዬቲዛ ማቻ ኢራ ጋላስ ፓጬይ ባይንዳ ኣዛ ኬ ማላ።

16ጫርኮ ቴቃናስ ዎይኮ ዛይቴ ጩጩሚዲ ኦይካናስ ዳንዳዬቶንታይሳ ማላ ኢዞ ጮኡ ኦናስ ዳንዳዬቴና።

17ቢራታይ ቢራታ ቃራሲዛ ማላ ኣሲካ ኢሶይ ኢሳ ቃራሴስ።

18ባላሴ ሚዮ ኢሻልሲዲ ናጊዳ ኣሲ ኢዚ ኣይፌ ማና፤ ባ ጎዳስ ኦዛ ኣሲ ቦንቼታና።

19ሃይ ሄሬጋ ሲን ቤሲዛ ማላ ኣሳ ዎዚናይ ኢዛዴ ካንዶ ቤሴስ።

20ሃይቆይኔ ባሺ ካሊ ኤሬቴና፤ ሄሳካ ኣሳ ኣይፌይ ካሌና።

21ቢራይኔ ዎርቃይ ታማን ፓጬቲዲ ጌይዛ ማላ ኣሲካ ባ ኤኪዛ ጋላታን ፓጬቴስ።

22ኤያ ኣስ ካ ማላ ኡዱላን ዬጋዳ፥ ኡዱላ ሚን ጫዲዛኮካ ኢዛፔ ኤያቴ ኪቼና።

23ኔ ዶርሳቲ ዴኢዛ ሃኖታ ሎኤዳ ኤራ፤ ኔ ዉዴካ ዎዚናፔ ሄማ።

24ኣይስ ጊኮ ዱሬቴ ሜርናስ ዴኤና፤ ካላቻይካ ዬሌታፔ ዬሌታ ጋካናስ ሚኒ ዴኤና።

25ሜላ ማታይ ቡጬቲዳፔ፥ ኣጫ ማታይ ኬኢዳፔ፥ ዙምቡላታ ቦላን ዴኢዛ ማታይ ሺቂዳፔ ጉዬን፥

26ዶርሳታ ኢስኬፌ ኔኒ ኔስ ማይኦ ኬሳና፤ ዴይሻታን ኔስ ጎሻ ጋዴ ሻማና።

27ኣቲዳ ዴይሻታ ማ ኔሲኔ ኔ ሶ ኣሳስ፥ ኔ ማጫ ኣይሌታስካ ቁማ ጊዳናስ ኩሚ ፓላሃና።

← Chapter 26 Chapter 28 →