Proverbs 12

Amharic Gamo (ጋሞ ማጻፋ)

1ሴራ ዶሲዛ ኣሲ ኤራቴ ዶሴስ፤ ጊዶ ኣቲን ሴራ ኢጺዛ ኣሲ ዳማ።

2ሎኦ ኣሲ ጎዳፔ ሳባ ዴሜስ፤ ጊዶ ኣቲን ጎዳይ ጌናንቻታ ፒርዴስ።

3ኣሲ ኢታቴን ኤቂዲ ሚኒ ካንናዉ ዳንዳዬና፤ ጺሎቲ ጊዲኮ ባ ዲዛሶፔ ቃጼቴና።

4ዎዚናማ ማጫሳያ ባ ኬዋስ ካላቻ ማላ፤ ዬላቺዛ ማቻ ባ ኣዚናስ ሜቄ ጋርሳን ዲዛ ዎይዛዚሬ ሃርጌ ማላ።

5ጺሎታ ቆፋይ ሱሬ፤ ኢታታ ዞሬይ ጊዲኮ ጪሞ።

6ኢታታ ሃሳያይ ኣስ ዎስ፤ ጺሎታ ሃሳያይ ጊዲኮ ኣስ ኣሼስ።

7ኢታ ኣሳቲ ኩንዳና፤ ኢስታስ ዜሬካ ኣቴና፤ ጺሎታ ዜሬ ጊዲኮ ሚኒ ዳና።

8ኣሲ ባ ኣ ኤራቴ ማላ ጋላቴቴስ፤ ጊዶ ኣቲን ጌላ ቆፋይ ዴኢዛ ኣሲ ካቴስ።

9ኣይኮይ ባይንዳ ዲሺን ዱሬ ኣሳ ማላ ጬቄቲዛ ኣሳፔ ባና ዚቂ ሂስቲ ባስ ኦ ኣቂዛ ኣሲ ኪያ።

10ጺሎ ኣሲ ባ ሜሄስ ቃቴስ፤ ኢታ ኣሲ ኪያቴስ ጊኮካ ሜንጼ ኢታ።

11ባ ቢታ ሚን ኦዛ ኣሲ ካ ካሌስ፤ ኣኬካይ ፓጪዳ ኣሲ ጎኣይ ባይንዳ ሂዶታ ጎዴስ።

12ናጋራንቻቲ ኢታቲ ዲኢ ኤሂዳይሳ ኣሞቴቴስ፤ ጺሎታ ዜሬ ጊዲኮ ዳያና።

13ኢታ ኣሲ ባ ሃሳይዳ ኢታ ሃሳያን ኦይኬቴስ፤ ጺሎይ ጊዲኮ ሜቶፔ ኬሲ ኤኪ ኣቴስ።

14ኣሲ ባ ዶናፔ ኬኢዛ ቃላን ሎኦ ሚሽ ካሌስ፤ ባ ኦዳ ኦሶ ዋጋካ ዴሜስ።

15ኤያ ኣሳስ ኢዚ ቢዛ ኦጌይ ኢዛስ ሎኦ ሚሳቴስ፤ ኣ ኤራንቻይ ዞሬ ሲዬስ።

16ኤያ ኣሳ ሃንቆይ ሄራካ ኤሬቴስ፤ ጪንጫ ኣሲ ጊዲኮ ጫሼ ዉዱ ጌና።

17ሱሬ ማርካይ ቱማ ማርካቴስ፤ ዎርዶይ ጊዲኮ ዎርዶ ማርካቴስ።

18ኣኬኮንታ ሃሳይዛ ሃሳያይ ቶራ ማላ ጫዴስ፤ ኣ ኤራንቻ ኢንጻርሲ ጊዲኮ ፓስ።

19ዎርዶ ሃሳያይ ጉ ዎዴሳ፤ ቱማ ሃሳያይ ጊዲኮ ሜርናሳ።

20ኢታ ቆፒዛይታ ዎዚናን ባሌይ ዴስ፤ ጊዶ ኣቲን ሳሮ ሚሽ ቆፒዛይታ ዎዚናን ኡፋይሲ ዴስ።

21ጺሎታ ቆሆይ ጋኬና፤ ኢታቲ ጊዲኮ ሜቶ ካላና።

22ጎዳይ ዎርዶ ሃሳያ ሃራሴቴስ፤ ቱማንቻታን ጊዲኮ ኡፋዬቴስ።

23ኣኬካራ ዲዛ ኣሲ ባ ኤራቴ ቆቴስ፤ ዎዚናይ ባይንዳ ኣሲ ባ ኤያቴ ናሼስ።

24ሚኒ ኦዛ ኣሲ ዴሬ ሃሬስ፤ ኣዛላይ ኣይሌ ጊዴስ።

25ሂርጋን ኩሚዳ ዎዚናይ ኣስ ጬጬን ዬጌስ፤ ሾንጋራ ዲዛ ሃሳያይ ጊዲኮ ኡፋይሴስ።

26ጺሎ ኣሲ ባ ላጌ ሎኦ ዞሬ ዞሬስ፤ ኢታታ ዞሬይ ጊዲኮ ቱማ ኦጌፔ ሃሴስ።

27ኣዛላ ኣሲ ሻንካቲዲ ኤሂዳ ኣሾዛ ጺጼና፤ ሚኒ ኦዛ ኣሲ ጊዲኮ ባ ኣቆታስ ሚሼቴስ።

28ጺሎቴ ኦጌን ዴኦይ ዴስ፤ ሄ ኦጌን ሃይቆይ ዴና።

← Chapter 11 Chapter 13 →