Job 36

Amharic Gamo (ጋሞ ማጻፋ)

1ኤሊሁይ ባ ሃሳያ ጉጂዲ ሂዝጊዴስ፤

2«ጾሳ ጊሻስ ታኒ ሃሳያና ሃራይ ዲዛ ጊሻስ ጉ ዳንዳያዳ ታ ጊዛይሳ ሲያ።

3ታኒ ዳሮሶፔ ዴሚዳ ኤራቴን፥ ታና ሜዳ ጾሲ ጺሎ ጊዲዳይሳ ታኒ ኔስ ኤሪሳይስ።

4ታ ቃላይ ዎርዶ ጊዶንታይሳ ኔኒ ሎኤ ኤራ፤ ኔናራ ሃሳያና ታስ ኩሜ ኤራቴ ዲዛይሳ ኤራ።

5«ቱሙካ ጾሲ ዎልቃማ፤ ጊዶ ኣቲን ኦናካ ካና፤ ኢዚ ኡባካ ኣኬኬስ።

6ኢዚ ኢታ ኣሳታ ፓጻ ዎና። ሜቶቲዳ ኣሳታስ ጊዲኮ ሱሬ ፒርዳ ፒርዴስ።

7ጾሲ ጺሎ ኣሳታ ናጌስ፤ ካዎታ ማላ ቦንቾ ኣልጋን ኡቲሴስ፤ ሜርናስ ኢስታ ቁ ቁ ሂስቴስ።

8ጊዶ ኣቲን ኣሲ ሳንሳላታን ቃሼቲኮ፥ ዎይኮ ሜቶ ጊቴን ኦይኬቲኮ፥

9ኢስቲ ባ ኦቶሬቴን ኦዳ ናጋራ ቆንጪሴስ።

10ኢስቲ ሴራ ሲያና ማላ ኢስታ ሃይ ዶዬስ፤ ኢስቲ ባንታ ኢታ ኦሳፔ ሲሚዲ ማሬታና ማላ ኣዛዜስ።

11ኢስቲ ጾሳስ ኣዛዜቲዲ ኦኮ፥ ባንታስ ኣቲዳ ላይ ዱሬቴኒኔ ኡፋይሳን ኦንጋና።

12ጊዶ ኣቲን ኢዛ ሲዮንታ ኢጺኮ ኢስቲ ኦላን ዉራና፤ ኢስቲ ባንታ ኤያቴን ዲሼ ሃይቃና።

13«ባንታ ዎዚናራ ጾሳ ካዲዛይቲ ቃጻዬቲዳ ማላ ዳና፤ ኢዚ ኢስታ ቃጻይሺንካ ኢስታ ካሌዛይቲ ዎሴቴና።

14ኢስቲ ባ ፖሊዛ ኢታ ላይማቴ ቦሻን ያና፤ ባንታ ዬላጋቴ ላይንካ ሙልቄቲ ሃይቃና።

15ጾሲ ሜቶን ኡንኤቲዛይታ ኢስታ ሜታፔ ኣሻና፤ ኢስታ ጋኪዳ ሜታን ኢስታስ ቲሚርቴ ኢማና።

16«ሃይሳ ሃ ዎዴዛን ጾሲ ኔስ ቆፒዛይ ኔና ኔ ዲዛ ሜታፔ ኬሲዲ ሎኦ ካ ኩሚዳ ማዳን ኤፋናሳ።

17ሃኢ ጊዲኮ ኔ ኦዳ ሞራፔ ዴንዶይሳን ኔ ቦላ ፒርዴቲዳ ጊሻስ፥ ኔስ ቤሲዛ ቂጻቴ ኤኮ ቦላ ዳሳ።

18ኦኒካ ኔና ዱሬቴ ዳሮን ጪሞንታ ማላ፤ ማታኤንካ ኔና ባሌንታ ማላ ናጌታ።

19ኔስ ዲዛ ኣቆታይኔ ጎዳቴ ዳሮ ጊዲኮካ ኔና ሜቶፔ ኣሼቴና።

20ዴራ ዲዛሶፔ ይሲዛ ማ ዎዴይ ያና ማላ ኣሞቶፋ።

21ኔኒ ሜቶ ጊዶን ፓጬቲዛይ ሄሳ ጋሶን ጊዲዳ ጊሻስ ሲማዳ ናጋራ ኦንታ ማላ ናጌታ።

22«ጾሳ ዎልቃይ ኣይ ማላ ጊታኮ ኣኬካ፤ ጾሲ ኡባፌ ኣ ኣስታማሬ።

23‹ሃይሳ ኦ› ጊዲ ጾሳ ኣዛዚዛ ኣሲ ዎይኮ፥ ‹ኢታ ኦሶ ኦዳሳ› ጊዲ ኢዛ ዋላሲዛይ ኦኔ?

24ኢዚ ኦዛ ኦሳ ጊሻስ ኣሳይ ኡባ ዎዴ ዬን ጋላቲዛይሳ ማላ፥ ኔኒካ ኢዛ ኦሳስ ዬን ጋላታ።

25ኣሳ ዜሬ ኡባይ ጾሳ ኦሳ ቤዪዴስ፤ ኣሳይ ቲሺ ኦ ሃኮን ቤዪዴስ።

26ጾሳ ጊታቴ ፒልጊዲ ጋካናስ ኑኒ ዳንዳዮኮ፤ ኢዛ ላይ ቆዳይካ ኑ ኤራፔ ቦላ።

27«ጾሲ ሃ ኣባፌ ፑዴ ሳሎ ኤፌስ፤ ዛሪዲካ ኢራ ሳሎፔ ዱጌ ቡኪሴስ።

28ኢራ ሻራፔ ኬሲዲ ዎልቃማ ኢራ ኣሳስ ቡኪሴስ።

29ጊዶ ኣቲን ጾሲ ሻራ ዎስቲ ሚጪዛኮ፥ ዎልቃን ጊዶን ኡቲዲ ኢዚ ዋኒ ሃሳይዛኮ ኦኒ ኤራናዉ ዳንዳይዜ?

30ጾሲ ኣባ ጪማቴ ካሚዲ ኢዚ ባ ዩሾን ዎልቃን ዎስቲ ላሊዛኮ ጼላ።

31ሃይሳ ማላ ኦዲ ጾሲ ባ ዴራ ኣይሴስ፤ ኣሳይ ሚዛ ዳሮ ካካ ሞኪሴስ።

32ዎልቃን ኢዚ ባ ኩሼን ኦይኬስ፤ ኦይኪዲ ባ ዶሲዳ ባጋ ባና ማላ ኣዛዜስ።

33ዳዳይ ዎልቃማ ኢራይ ያናይሳ ማላቴስ፤ ሜሄቲካ ኢራ ኡሾይ ዪዛይሳ ኤሬቴስ።

← Chapter 35 Chapter 37 →