Job 14

Amharic Gamo (ጋሞ ማጻፋ)

1«ኣሾ ማይኢዳ ኣሳስ ላይይ ቃን፤ ሄሲካ ሜቶን ኩሚዴስ።

2ጪሻ ማላ ቤቲዲ ሄራካ ቆኬስ፤ ኤሾ ማላ ዳሮ ጋምኦንታ ሄራ ኣስ።

3ሂስቲን ኔኒ ሃይሳ ማላ ኣሳ ሜቴ ካሌታይ? ኔ ሲንካ ፒርዳስ ሺሻኔ?

4ቱና ሚሻፌ ጌሻ ሚሽ ዴማናስ ዳንዳይዛዴይ ኦኒካ ዴና።

5ኣሳ ላይስ ዎዳ ዛዋይ ዴስ፤ ኣሲ ዳና ኣጊናቲካ ኔ ማታን ቆዳን ዴቴስ፤ ኔኒካ ዎዳ ላይ ዛዋፔ ኣዛዴይ ዴና።

6ኡኔቲ ኣቂዛዴይ ባ ኦና ጋላሳ ኦሶዮ ፖሊዲ ኡፋዬቲዛ ማላ፥ ኣሲካ ባ ዳቡራ ጋላሳን ኡፋዬታና ማላ ኔ ኣይፌ ኢዛ ቦላፌ ዴን።

7ቃንጼቲዳ ሚ ኡስካ ሂዶታይ ዴስ፤ ናምኣን ሲሚ ኣጫናሲኔ ሃጋታ ኬሳናስ ዳንዳዬስ።

8ኣይኮካ ጻጶቲ ቢታ ጊዶን ጪሚኮካ፥ ኣኖይካ ቢታ ጊዶን ሙሲኮ፥

9ኢርጻ ዴሚኮ ናምኣን ኣጬስ፤ ኦራ ቶኬቲዳ ሚ ማላ ሃጋታ ኬሴስ።

10ኣሲ ጊዲኮ ሃይቂዲ ካሴ ባይንዳ ማላ ሃኔስ፤ ሃይቂዳፔ ጉዬ ኣዋን ቤታኔ?

11ኣባ ሃ ዉሪዛ ማላ፥ ሻፋ ሃካ ሜሊዛ ማላ፥

12ኣሲካ ሄሳ ማላ ሃይቂዳፔ ጉዬ ሃ ሲሜና፤ ሳሎይ ኣናሼ ጋካናስ ዴንዴና፤ ስኮፌካ ቤጌና።

13«ሃይቂዳይታ ጊዶን ኔ ታና ቆቲዳኮ ኣዜ ዲዛይ! ኔ ሃንቆዚ ኣና ዎዴይ ጋካናስ ኔ ታና ቆቲዳኮ! ቃጻሮ ጋላስ ቃቻዳ ኔ ታና ቆፒዳኮ!

14ኣሲ ሃይቂዳፔ ጉዬ ኣሾራ ፓጻ ዳናስ ዳንዳይዜ? ታስ ዎዴይ ላሜታና ጋካናስ፥ ታ ሃይሳ ባጼ ላይ ጌንጫ ኣና።

15ሄ ዎዴ ኔኒ ታና ጼይጋና፤ ታኒካ ኔስ፥ ‹ዬ› ጋና፤ ኔ ሜታ ጊዲዳ ታና ቤያናስ ኔ ላሞታና።

16ሄኮ ሃኢ ኔ ታ ሄሜታ ካሌታሳ፤ ጊዲኮካ ታ ናጋራ ቆፓካ።

17ታ ቆሆይ ካራጺቴን ጹንቴታና፤ ታ ናጋራካ ኔ ካማና።

18«ዙማይ ሃሮቲዛ ማላኔ ዎዲዛ ማላ፥ ዛላይካ ባ ዲዛሶፔ ቃሌቲዛ ማላ፥

19ሃ ሹች ዎጪዲ ኦንጊዛ ማላ፥ ዲኦይ ቢታ ሜጪዛ ማላ ኔኒካ ኣሳ ሂዶታ ይሳሳ።

20ኔ ዎልቃይ ሜርናስ ኢዛዴ ቦላ ሚኔስ፤ ኢዚካ ካሴ ባይንዳ ማላ ሃኔስ፤ ኔ ኢዛ ሜካ ላማዳ ኔ ሲንፌ ይሳሳ።

21ኢዛ ናይቲ ቦንቾ ዴሚዳኮካ ኢዚ ኤሬና፤ ካዉዪዛኮካ ኢዚ ጼሌና።

22ኢዛስ ኢዛ ኣሳቴ ዋዬዚ ሲዬቴስ፤ ኢዚካ ባ ሜቶዛ ጊሻስ ጻላ ዬኬስ።»

← Chapter 13 Chapter 15 →