Isaiah 60

Amharic Gamo (ጋሞ ማጻፋ)

1ጎዳይ፥ «ኔ ፖኦይ ዪዳ ጊሻስ ዴንዳዳ ፖኢሳ፤ ጎዳ ቦንቾይ ኔ ቦላ ፖኢዴስ።

2ቤኣ፥ ማይ ሳኣ ካማና፤ ሳካና ማይ ዴራ ጎዚ ኦይካና፤ ጊዶ ኣቲን ጎዳይ ኔስ ጋካና፤ ባ ቦንቾካ ኔ ቦላ ፖኢሳና።

3ካዎቴቲ ኔ ፖኦኮ፥ ካዎቲካ ኔ ዎንታ ጻልቄኮ ያና።

4«ቁ ጋዳ ኔ ዩሾ ጼላ፤ ኢስቲ ኡባይ ኢሲፌ ሺቂዲ ኔኮ ያና፤ ኔ ኣቱማ ናይቲ ሃሆፔ፥ ኔ ማጫ ናይቲካ ኢዲሞን ኔኮ ያና።

5ሄ ዎዴ ኔ ቤኣናኔ ጶላና፤ ኔ ዎዚናይ ኡፋይሳን ኩማና፤ ኣባን ዲዛ ኣቆታይ ኔኮ ያና፤ ካዎቴታ ዱሬቴ ኔስ ጊዳና።

6ጋሜላ ማራቲ፥ ሚዲያሜፔኔ ኤፋፔ ዪዳ ጋሜላ ማራቲ ኔ ቢታ ካማና። ዎርቃኔ ኤጻኔ ኤኪዲ ሳባፔ ዪዛይቲ ጎዳ ጋላታ ኣዋጃና።

7ቄዳሬፔ ዶርሳታ ዉዴይ ኡባይ ኔኮ ሺቃና፤ ኔባዮቴ ዴሬ ርሾቲ ኔና ጎኣና፤ ሃይታንቲ ታስ ያርሾ ያርሺዛሶዛ ቦላ ኤኬቲዳ ያርሾታ ጊዳና፤ ታኒካ ታ ቦንቾ ኬ ፑላሳና።

8«ሃራጴይ ባ ኣቂዛሶ ቢዛ ማላኔ ሻራ ማላ ቢዛይቲ ሃይታንቲ ኦኔ?

9ቱሙካ ሃሩሮቲ ታናን ሂዶታ ኦቴስ፤ ኢዚ ኔና ባ ቦንቾ ማይዚዳ ጊሻስ፥ ጎዳ ኔ ጾሳ ቦንቾስ፥ ኢስራኤሌ ጌሻስ ሃኮፔ ኔ ኣቱማ ናይታ፥ ኢስታ ቢራራኔ ዎርቃራ ጋ ኤሃናስ ታርሴሴ ማርካቤቲ ሲንቲ ኬዛና።

10«ኣላጋቲ ኔ ጊምቤ ጊምባና፤ ኢስታ ካዎቲ ኔስ ሃጋዛና፤ ታ ሃንቆን ታ ኔና ሾጪዳ ጊዲኮካ፥ ታ ቃታ ሲቆ ኔና ቤሳና።

11ኔ ፔንጌቲ ኡባቶ ዶያ ዴኣና፤ ጋላስ ጊዲን ኦማርስ ሙሌካ ጎርዴቴቴና፤ ሄሲካ ኣሳይ ካዎቴታ ዱሬቴ ኔኮ ኤሃናሳ፤ ኢስታ ካዎቲካ ጾኖን ኔኮ ጌላና ማላሳ።

12ኔስ ሃሬቶንታ ካዎቴኔ ዴሬይ ሙሌካ ዲፒ ጋና።

13ታ ኬይ ዲዛሶ ኣሌቂሳናስ፥ ሊባኖሴ ቦንቾይ ጉጋን፥ ጺዳይኔ ባርሴኔቴይ ኔኮ ያና፤ ታ ቶሆይ ኤቂዛሶዛ ታ ቦንቻና።

14ኔና ኡንኤዳይታ ኣቱማ ናይቲ ዚጊሼ ኔኮ ያና፤ ኔና ካዳ ኡባቲ ኔ ቶሆ ቦላ ኩንዳና፤ ‹ሃኔ ጎዳ ካታማዬ! ኢስራኤሌስ ጌሻ ሚሽ ጊዲዳ ጺዮኔ› ጊ ጼይጋና።

15«ሃኔ ኢጼታዳ ዬጌቲዳሬ፥ ኦኒካ ኔ ጊዶራ ካን ቢዛሮ ጊዶንታ ኣጊኮካ ታኒ ኔና ሜርና ጬቆሲኔ ዬሌታ ኡባስ ኡፋይስ ሂስታና።

16ኔኒ ካዎቴታ ማ ኡያና፤ ካዎታ ንካ ማና። ሄሳፌ ጉዬ ታኒ ጎዳይ ኔና ኣሺዛይሳ፥ ኔና ዎዚዛይሳኔ ያቆቤ ዎልቃማ ጊዲዳይሳ ኔኒ ኤራና።

17ጻርቂማላ ሶሆን ዎርቃ፥ ቢራታ ሶሆን ቢራ ኤሃና፤ ሚ ሶሆን ጻርቂማላ፥ ሹቻ ሶሆን ቢራታ ኤሃና፤ ሳሮቴ ኔና ኣይሲዛዴ፥ ጺሎቴካ ኔስ ሃላቃ ሂስታና።

18ሃይሳፌ ጉዬ ኔ ቢታን ሺሮይ፥ ኔ ዛዋንካ ላሌቴኔ ባሺ ሲዬቴና። ጊዶ ኣቲን ኔ ዲርሳ ጊምቤ ኣቶቴ፥ ኔ ፔንጌታካ ጋላታ ጋዳ ኔ ጼይጋና።

19«ሄሳፌ ጉዬ ጋላስ ኣዋ ፖኦይ ኔስ ኮሼና፤ ኦማርሲካ ኣጊናይ ፖኤና፤ ጋሶይካ ጎዳይ ኔስ ሜርና ፖኦ ጊዳና፤ ኔ ጾሳይ ኔስ ቦንቾ ጊዳና።

20ኔ ኣርሼይ ሃይሳፌ ጉዬ ጌሌና፤ ኔ ኣጊናይካ ፖኦ ኢሞ ኣጌና። ጎዳይ ኔስ ሜርና ፖኦ ጊዳና፤ ኔ ጬጪዳ ጋላሳቲ ጊዳና።

21ኔ ኣሳይ ኡባይ ጺሎ ጊዳና፤ ቢታዮካ ሜርናስ ላታና፤ ኢስቲ ታ ቦንቾ ቆንጪሳናስ ታኒ ቶኪዳ ፑቴታኔ ታ ኩሼ ኦሶታ።

22ኔፔ ካሎዚ ሺ፥ ኡባፌ ዉርሴ ካሎዚ ዎልቃማ ካዎቴ ጊዳና፤ ታኒ ጎዳ፤ ዎዴይ ጋኪዛ ዎዴ ታኒ ሄሳ ኤሶን ፖላና» ጌስ።

← Chapter 59 Chapter 61 →