Isaiah 58

Amharic Gamo (ጋሞ ማጻፋ)

1ጎዳይ፥ «ኔ ቃላ ቁ ሂስታ ዋሳ፤ ኣይኮካ ኣሾፋ። ኔ ጬንጉርሳ ዛዬ ማላ ሲሳ። ታ ዴራስ ኢስታ ማካላቴ፥ ያቆቤ ኬ ኣሳሲካ ኢስታ ናጋራ ዮታ።

2ኢስቲ ታና ሃች ሃች ኮዬቴስ፤ ታ ኦጌዛ ኤራናስ ላሞቲዛ ሚሳቴቴስ። ሱሬ ሚሽ ኦዳ ካዎቴ ማላኔ ባ ጾሳ ኣዛዞ ዬጊ ኣጎንታ ዴሬ ማላ፥ ኢስቲ ታና ሱሬ ፒርዳ ኦይቼቴስ፤ ጾሲ ኢስታኮ ሺቃናይሳ ኢስቲ ዶሲዛ ሚሳቴስ» ጌስ።

3ኢስቲ ሺቂዲ፥ «ኔ ኤኮንታሺን ኑ ኣዛስ ጾሚዶኒ? ኔ ዉዱ ጎንታሺን ኣይስ ኑና ካዉሺዶኒ?» ጋና። ጎዳይ ዛሪዲ ኢስታስ፥ «ጊዲኮካ ኢንቴ ጾሚዛ ጋላስ ኢንቴ ዎዚና ቆፋ ማላ ኦታ፤ ኢንቴስ ኦዛይታፔ ቦንቄታ።

4ኢንቴ ጾማይ ኦሻኒኔ ፓላማን፥ ጌኔ ኦሶኒኔ ዋታን ፖሌቴስ፤ ሃይሳፌ ሲንን ኢንቴ ጾሚዛይሳ ማላ ሃቺፌ ጉዬ ኢንቴ ዎሳይ ሳሎን ሲዬታና ጊዲ ሂዶታ ኦፍቴ።

5ታኒ ዶሪዳይ ሃይሳ ማላ ጾማ? ኣሲ ባና ካዉሻናይ ሃይሳ ማላ ጋላስ ጻላ? ሻጫ ማላ ባና ዚቂ ሂስቴ? ዎይኮ ማቃ ማይኢዲ ቢዲን ቦላ ቡሉሌቴ? ሂስቲን ኔ ጾማ ጋ ጼይጊዛይሲ ሃይሴ? ጎዳይ ሄሳ ማላን ኡፋዬቲዜ?

6«ቤኢቴ ታኒ ዶሪዳ ጾማይ፥ ኡንኤቲዳይታ ሳንሳላታ ኢንቴ ዱና ማላ፥ ቃምባራ ዎዶሮ ኢንቴ ቢርሻና ማላ፥ ኡንኤቲዳይታ ኢንቴ ላኣ ዬዳና ማላ፥ ቶሆ ጊዲዳ ቃምባራ ኢንቴ ሜንና ማላ ጊዴኔ?

7ቃሴካ ኔ ቁማፔ ጋፊዳዴስ ሻካናስ፥ ቶይላቲዳ ማንቆዛ ኔሶ ጌልናስ፥ ካሎቲዳ ቤኣዳ ማይዛናስ፥ ኔስ ኣሾ ዳቦዛስ ኔ ሲን ኔ ቱኮንታ ማላ ጊዴኔ?

8ኔ ሄሳ ኦኮ ኔ ፖኦይ ዎንታ ጻልቄ ማላ ጫራና፤ ፓጻቴ ኔስ ኤሶን ጋካና፤ ጺሎቴ ኔፔ ሲንራ ባና፤ ጾሳ ቦንቾይ ኔና ጋራዳና።

9ሄ ዎዴ ኔኒ ጼይጋና፤ ጎዳይካ ኔስ ኮያና። ኔኒ ማዶ ዴማናስ ዋሳና፤ ኢዚካ፥ ‹ታ ኔስ ዳይስ› ጋና። «ኔ ኔፔ ሜቶዛ ቃምባራ፥ ኢታ ሃሳያኔ ቢራን ማላታ ቤሲዛይሳ ኣጊኮ፥

10ጋፊዳዴስ ኔ ቃቲኮ፥ ቆሄቲዳይቲ ካላና ማላ ኔ ሂስቲኮ ኔስ ፖኦይ ማ ጊዶን ፖኣና፤ ኔስ ሚዳይሲካ ሴታ ጋላሳ ማላ ጊዳና።

11ጎዳይ ኔና ኡባቶ ካሌና፤ ኣዋይ ጹጊዳ ቢታን ኔ ኣሞ ኢዚ ኩንና፤ ኔ ሜቄታካ ኢዚ ሚንና። ኔኒ ሃ ኣላዳ ኣታኪልቴሶሆኔ ሙሌካ ቶኦንታ ፑልቶ ማላ ጊዳና።

12ኔ ዳቦቲ ቤኒ ዮቻታ ዬጋና፤ ካሴ ላሌቲዳይታ ዛሪ ኬጻና፤ ኔኒ ላሌቲዳ ጊምቤ ዛሪ ኦራጺሲዛዴ፥ ዎጋ ኦጌቲ ዲዛ ካታማታ ዛሪ ጊግሲዛዴ ጌቴታና» ጌስ።

13ቃሴካ፥ «ኔ ቶሆቲ ሳምባታ ሻሮንታ ማላ ኔ ሼምፒሲኮ ዱማቲዳ ታ ጋላሳን ኔ ዎዚና ቆፋ ኦንታ ኣጊኮ፥ ሳምባታ ጋላሳ ኡፋይስ፥ ጎዳስ ዱማቲዳ ጋላሳ ኔኒ ቦንቾ ጋላስ ጋ ጼይጊኮ፥ ኔ ሼኔ ማላ ኔ ኦዛይሳፌኔ ሃዳ ዮኦፔ ኔ ናጌቲኮ፥

14ሄ ዎዴ ኔ ጎዳን ኡፋዬታና። ቢታ ቦላን ቃሶሆታን ታ ኔና ቶጊሳና፤ ኔ ኣዋ ያቆቤ ጺንጾ ኔ ካላ ማና ማላ ኦና» ጊዲ ጎዳይ ሃይሳ ባ ዶናን ሃሳይዴስ።

← Chapter 57 Chapter 59 →