Isaiah 46

Amharic Gamo (ጋሞ ማጻፋ)

1ቤሌይ ካዉዪዴስ፤ ኔቦይ ኬሂ ጉጺዴስ፤ ኢስታ ኤቃ ጾሳቲ ጫና ሜሄታን ጫኔቲዳ፤ ኢስቲ ኦይኪ ዩዪዛ ሚስሌቲ ቶሆ፤ ዳቡርዳ ሜዶሳታስ ዴጾ ባኦ።

2ኢስቲካ ኢሲ ቦላ ዱጌ ጉፋናና፤ ጫናካ ኣሻና ዳንዳዬቴና፤ ኢስቲካ ዲኤቲዲ ባና።

3ጎዳይ፥ «ኢንቴኖ ያቆቤ ሶ ኣሳቶ! ኢስራኤሌፔ ኣቲዳ ኡባቶ! ኢንቴ ኢንቴ ኣዪ ኡሎን ሻራ ኣቶሳፌ ሃ ሲሚን ኢንቴና ታ ኦይኪዳይቶ! ኢንቴ ዬሌቶሶፌ ዶማዳ ታ ቶኪዳይቶ! ታ ጊዛ ሲዪቴ።

4ኢንቴ ጪሚዲ ፑሉማና ጋካናስካ ኢንቴና ቶኪዛይ ታና፤ ታኒ ታና፤ ታኒ ኢንቴና ሜዲስ፤ ታኒ ኢንቴና ቶካና፤ ታኒ ኢንቴና ካፋና፤ ታ ኢንቴና ኣሻና።

5«ታና ኦናራ ጊኒሴቲ? ታና ኦናራ ሊኪሴቲ? ኑኒ ኢሲኖ ሚሳታና ማላ ታና ኦናራ ጌዳሬቲ?

6ኣማርዳ ኣሳቲ ዎርቃ ባንታ ካራጺቴፔ ቆሌቴስ፤ ቢራካ ሜዛኔን ጌዳሬቴስ፤ ኢስቲ ሴሪሲ ቲጊዛ ሂላንቻ ቃጻሬቴስ፤ ኢዚካ ኢስታስ ጾሳ ሂስቲ ሜስ። ኢስቲካ ኢዛስ ጎይኔቴሲኔ ያይኔቴስ።

7ዴንዲ ባንታ ሃሼን ቶኬቴስ፤ ዛሪዲ ሄ ዴንዳ ሶሆን ዎቴስ፤ ኢዚካ ሄን ኤቃ ጌስ፤ ሄፔ ኣዋካ ቃጼና፤ ኦኒካ ኢዛኮ ዋሲኮ ዛሮ ኢሜና፤ ሜቶፔካ ኢዛ ኣሼና።

8«ኢንቴኖ ሞራንቻቶ! ሃይሳ ኣኬኪቴ፤ ዩሺካ ቆፒቴ፤ ኢንቴ ዎዚናን ቁምኢ ኦይኪቴ።

9ካሴ ቤኒ ዎዴ ሃኒዳ ዮኦታ ኣኬኪቴ፤ ታኒ ጾሳ፤ ታፔ ሃራይ ዴና፤ ታኒ ጾሳ፤ ታ ማላይ ኦኒካ ዴና።

10ዉርሴን ሃናናይሳ ኮይሮታ፥ ቡሮፔ ያናይሳ ቤኒ ዮታዲስ፤ ‹ታ ሃልቾይ ሚኖ፤ ታና ኡፋይሲዛዝ ኡባ ታ ኦና› ጋዲስ።

11ኣርሼይ ሞኪዛ ባጋፌ ቦንቂዛ ኣርጋን፥ ሃሆ ቢታፌ ታ ቆፋ ፖሊዛ ኣስ ታኒ ጼይጋና። ታ ዮቲዳይሳ ታ ኦና፤ ታ ሃልቺዳይሳ ታ ፖላና።

12«ኢንቴኖ ዎዚና ሹቻቶ፥ ጺሎቴፌካ ሃኪዳይቶ፥ ታና ሲዪቴ።

13ታኒ ታ ጺሎቴ ኤሆን ዳይስ፤ ሃሆ ጊዴና። ታ ኣቶቴይ ጋምኤና፤ ታኒ ጺዮኔ ኣቶቴ። ኢስራኤሌ ቦንቾ ማይዛና» ጌስ።

← Chapter 45 Chapter 47 →