Isaiah 35

Amharic Gamo (ጋሞ ማጻፋ)

1ባዞይኔ ሜላ ቢታይ ኡፋዬታና፤ ኣይኮይ ባይንዳ ባዞይ ኡፋዬታና፤ ጪሻ ማላካ ጪያና።

2ኢዚ ዳሮ ኡፋዬታናኔ ሚጫና፤ ሊባኖሴ ቦንቾይ ኢዛስ ኢሜታና፤ ቃርሜሎሴኔ ላሻሮኔ ቴማ ኢዚ ማይኣና፤ ኑ ጎዳ ቦንቾኔ ጾሳ ጊታቴ ኢስቲ ቤኣና።

3ዳቡርዳ ቄሴታ ሚንቴ፤ ኣርጋጪዳ ጉልባታታ ሚንቴ።

4ዎዚናን ያሻይ ዲዛይታ «ሚኒቴ! ያዮፍቴ! ኢንቴ ጾሲ ዪዲ ሃሎ ኬሳና፤ ኢዚ ኢንቴና ኣሻናሲኔ ሃሎ ኬሳናስ ያና» ጊቴ።

5ሄ ዎዴ ቆቄታ ኣይፌይ ጼላና፤ ቱሌታ ሃይ ሲያና።

6ዎቤይ ጌኔሳ ማላ ጉፓና፤ ዱዴ ዶናይ ኡፋይሳን ዬጻና፤ ባዞፌ ሃ ኬዛና፤ ፑልቶይ ባዞ ቢታፌ ፑልታና።

7ጹጊዛ ቢታን ኤሌ ሃ ኩማና፤ ሜላ ቢታቲ ሃ ፑልታና፤ ዎራካናቲ ኣቂዛ ኦላን ማታይ፥ ማቃይኔ ሻጫይ ሞካና።

8ሄን ዎጋ ኦጌይ ኦሴታና፤ ኢዚካ፥ «ጌሻቴ ኦጌ» ጌቴታና። ቱናቲ ሄ ኦጌራ ቤቴና፤ ኦጌዚ ሄ ኦጌራ ቢዛይታስ ጻላ ጊዳና፤ ጌላቲ ሄ ኦጋራ ባና ዳንዳዬቴና።

9ሄን ጋሞይ ዴኤና፤ ዳፊ ሚዛ ዶኣይካ ኢዛን ኬዜና፤ ሄይታንቲ ሄን ቤቴቴና፤ ዎዜቲዳይቲ ጻላ ሄራ ባና።

10ጎዳይ ማዲዳይቲ ሲማና፤ ኢስቲ ዬጺሼ ጺዮኔ ጌላና፤ ሜርና ኡፋይሳ ካላቻ ማላ ጎጻና፤ ኢንጄኔ ኡፋይስ ዴማና፤ ጬጬይኔ ካዮይ ሄፔ ባቃታና።

← Chapter 34 Chapter 36 →