Isaiah 31

Amharic Gamo (ጋሞ ማጻፋ)

1ፑዴ ኢስራኤሌ ጌሻኮ ጼሎንታይታስ፥ ጎዳፔ ማዶ ኮዮንታይታስ፥ ማዶ ዴማናስ ዱጌ ጊብጼ ዎዛይታስ፥ ፓራ-ጋሬታ ዳሮቴኒኔ ባ ፓራ ሚኖቴን ጬቄቲዛይታስ ኣዬ ኣና።

2ኢዚ ጊዲኮ ኣ ኤራንቻ፤ ኢዚ ባሽ ኤሃና፤ ባ ቃላካ ላሜና፤ ኢታ ኦዛይታ ቦላኔ ቆሆ ኦዛይታ ማዲዛይታ ቦላ ኢዚ ዴንዳና።

3ጊብጼ ኣሳይ ኣሳፔ ኣቲን ጾስ ዴቴና፤ ኢስታ ፓራቲካ ኣሾፔ ኣቲን ኣያና ጊዴቴና። ጎዳይ ባ ኩሼ ሚጪዛ ዎዴ ኢዛ ማዲዛዴይ ጴታና፤ ማዴቲዛዴይካ ኩንዳና፤ ናምኣይካ ኢሲፌ ያና።

4ጎዳይ ታስ፥ «ጋሞይ ዎይኮ ዎዳላ ጋሞይ ሜሄ ኦይኪዲ ዳሮ ሄንንቻቲ ጼይጌቲ ሺቂዲ ኢዛ ቦላ ዪኮ ኢስታ ዋሶይ ኢዛ ያሺሶንታይሳ ኢስታ ዋሶይ ኢዛ ዳጋንንታይሳ ማላ ኡባፌ ዎልቃማ ጎዳይ ዙማ ቦላኔ ዙምቡላታ ቦላ ኦላስ ዎና።

5ካፎይ ቦላራ ኣላንዛ ማላ ኡባፌ ዎልቃማ ጎዳይ ዬሩሳላሜ ካማና፥ ናጋናኔ ኣሻና፤ ኢዚ ቦላራ ኣዲ ኢዞ ኣሻና» ጌስ።

6ኢንቴኖ ኢስራኤሌ ኣሳዞ! ኢንቴ ኬሂፔ ማካሊዳይሳኮ ሲሚቴ።

7ሄ ዎዴ ናጋራይ ኩሚዳ ኢንቴ ኩሼቲ ቢራፔኔ ዎርቃፌ ኦዳ ኤቃ ጾሳታ ኢንቴ ኡባይካ ዎራ ዬጋና።

8«ኣሶሬይ ኣሳ ማሻ ጊዶንታ ማሻን ሃይቃና፤ ኣሾ ማይኢዳዴ ማሻ ጊዶንታ ሃራ ማሻይ ኢዛ ማና፤ ኢዚ ጊ ማሻ ሲንፌ ባቃታና፤ ናቴቲ ዶሳይ ባይንዳ ዎልቃን ኦና።

9ሚኖ ሚጻይ ሺሮ ጋሶን ኩንዳና፤ ኦላ ጋዳዋቲካ ኦላ ባንዲራ ቤኢዲ ዳጋማን ኩማና» ጌስ ታማይ ጺዮኔን፥ ታማ ጮጬይ ዬሩሳላሜን ዲዛ ጎዳይ።

← Chapter 30 Chapter 32 →