Isaiah 17

Amharic Gamo (ጋሞ ማጻፋ)

1ዳማስቆ ጊሻስ፥ «ቤኢቴ፥ ሃይሳፌ ሲንን ዳማስቆ ካታማቴ ኣታና፤ ላሌ ዶሬ ጊዳና።

2ኣሮኤሬ ካታማቲ ካይስ ጊዳና፤ ሜሄ ሄንሶሆ ጊዳና፤ ኢስታ ባቢሲዛ ሚሺካ ዴና።

3ጊምቤቲዳ ካታማይ ኤፍሬሜፔ፥ ካዎቴ ማታይ ዳማስቆፌ ያና፤ ኣራሜፔ ጫሻ ኣቲዳይታ ቦንቾይ ኢስራኤሌታይሳ ማላ ካዉያና» ጌስ ኡባፌ ዎልቃማ ጎዳይ።

4«ሄ ዎዴ ያቆቤ ቦንቾይ ሻሩማታና፤ ኢዛ ሞቴይካ ሹማና።

5ካ ማጺዛዴይ ኤቂዳ ካ ሺሺዲ ሞ ባ ኩሼን ማጺዛ ማላ ኤራፋይሜ ሾባፌ ማጼቲዛ ፑሹሎ ማላ ጊዳና።

6ዎጋራ ሚ ሾጪን ናምኡ ዎይኮ ሄ ኣይፌቲ ሃጋ ጼራ ቦላ ኣቲዛ ማላ ኦይዱ ዎይኮ ኢቻሽ ኣይፌቲ ፒ ጊዳ ሃጋታ ቦላ ኣቲዛ ማላ ጉ ሃጋቲ ኣታና» ጊ ጎዳ ኢስራኤሌ ጾሳይ ሃሳይዴስ።

7ሄ ዎዴ ኣሳይ ባና ሜዳይሳኮ ጼላና፤ ኢስታ ኣይፌይ ኢስራኤሌ ጌሻኮ ጼላና።

8ኢስቲ ባንታ ኩሼን ኦዳ ያርሾሶሆታ ጼሌቴና፤ ኢስቲ ባንታ ኤቃታስ ኤጻኔ ጩኣሲዛሶሆታሲኔ ኣሼሪስ ጎይናና ኤሲዳ ቱሳታስ ቦንቾ ኢሜቴና።

9ሄ ዎዴ ኢስራኤሌ ኣሳ ጋሶን ቦሼቶንታ ኣቲዳ ሚኖ ካታማቲ ዎራኔ ኣይኮይ ባይንዳሶ ጊዳና።

10ኔና ኣሺዛ ጾሳ ባላዳሳ፤ ኔ ኢዛን ቆቴታ ኣቲዛ ኔ ዛላካ ኣኬካቤካ፤ ሄሳ ኔኒ ዶሬቲዳ ኣታኪልቴ ቶኪኮካ፥ ኦራ ዜሬ ኔ ዜሪኮካ፥

11ኔ ቶኪዳ ጋላስ ኢዚ ሞካና ማላ ኔ ኦኮካ፥ ኔ ዜሪዳ ዎንቴ ጋላስ ኢዚ ጪያና ማላ ኔ ኦኮካ ሄ ካይ ሃርጌኒኔ ፓጾንታ ሳኮን ሙሌራ ያና።

12ቤኣ፥ ዳሮ ኣሳ ሃንቆ ጊሪሲ ኣባ ዳምባላ ማላ ጊሬስ፤ ቤኣ፥ ኣሳ ዋሶ ዳሮይ ዎልቃማ ሃ ማላ ጉሜስ።

13ኣሳይ ዎልቃማ ሃ ማላ ጉሚኮካ፥ ኢዚ ኢስታ ሴሪኮ ዙምቡላ ቦላራ ጫርኮን ቢዛ ጉዱላ ማላ ጎቴ ጫርኮይ ላሊዛ ሃፓ ማላ ላሌታና።

14ሄኮ ሳኣይ ቃሚሺን ቆፋይ ባይንዳ ሺሮ ጊዲዴስ፤ ሳኣይ ዎንታናፔ ካሴቲዲ ኦኒካ ቤቲቤና። ኑ ኣቆታ ቦንቂዳይታ፥ ኡባ ዎልቃን ኤኪዛይታ ቃዳይ ሄሳ።

← Chapter 16 Chapter 18 →