Hosea 12

Amharic Gamo (ጋሞ ማጻፋ)

1ኤፍሬሜይ ጫርኮ ሄንንቻ፤ ጋላስ ኩሜ ኣርሼይ ሞኪዛ ባጋ ጫርኮ ካሌስ፤ ዎርዶኔ ማካላ ዳሪሴስ። ኣሶሬ ዴራራ ጫቆ ቃላ ጌሌስ፤ ዎጋራ ዛይቴ ጊብጼ ቢታ ዬዴስ።

2ጎዳይ ዩሁዳ ዴራ ቦላ ሺሺዛ ሞቶይ ዴስ፤ ኢዚ ያቆቤ ኢዛ ሃኖታ ማላ ቃጻያና። ኢዛ ኦሶ ማላ ኢዛስ ኢማና።

3ያቆቤይ ቡሮ ባ ኣዬይ ኡሎን ዲሼ ባ ኢሻ ቶሆ ቂርጴ ኦይኪዴስ፤ ኣሳ ዛዋ ጋኪዳፔ ጉዬ ጾሳራ ባጼቲዴስ።

4ኪታንቻራ ባጼቲዲ ኢዛ ጾኒዴስ፤ ኢዛ ሲንን ቴማ ዴማናስ ዬኪ ዎሲዴስ፤ ኢዛካ ቤቴሌን ዴሚዴስ፤ ሄን ኢዛራ ሃሳዬቲዴስ።

5ጎዳይ ኡባፌ ዎልቃማ ጾሳይ ኢዛስ ኤሬቲዳ ሱንይ ጎዳ።

6ሄሳ ጊሻስ ኔ ጾሳኮ ሲማ፤ ሲቆኔ ቱሙ ፒርዳ ሎኤ ኦይካ፤ ኡባ ዎዴ ኔ ጾሳን ኣማኔታ።

7«ዛልኣንቻቲ ዎርዶ ጌዳራን ባይዜቴስ፤ ሾጬቾካ ዶሴቴስ።

8ኤፍሬሜይ፥ ‹ታኒ ዱሬ፤ ታ ዱሬታዲስ፤ ታስ ሃይሲ ኡባይ ዲሺን ኣይ ቆሆይካ ዎይኮ ናጋራይ ታ ቦላ ጋኬና› ጊ ጬቄቴስ።

9«ኢንቴና ጊብጼ ቢታፌ ኬሲዳ ጎዳ ኢንቴ ጾሳይ ታና፤ ላይ ባኣሌ ጋላስ ካሴ ኢንቴ ኦዛ ማላ ኢንቴ ኢንቴ ዱንካኔን ዳና ማላ ታ ኦና።

10«ታኒ ካሴታዳ ናቤታስ ዮታዲስ፤ ዳሮ ኣጁታ ታ ኢስታ ቤሳዲስ፤ ኢስታ ባጋራ ሌሚሶን ዮታዲስ።

11ጋላኣዴን ኢታቴ ኩሚዴስ፤ ኣሳይካ ሹፉሮ ጻላ። ጌልጌላን ሚርጎታ ያርሾስ ሺሺዞ? ኢስታ ያርሺዛሶይ ሜቄሬቲዲ ጎሻ ጊዶን ኮሬቲዳ ሹቻ ማላ ጊዳና» ጌስ።

12ያቆቤይ ሜስጴጾሚያ ባቃቲዴስ፤ ኢስራኤሌይ ማቾ ኤካናስ ሄን ሃጋዚዴስ፤ ኢዚስ ኢማና ጪሎሻ ጊሻስ ዶርስ ሄሚዴስ።

13ጎዳይ ናቤ ባጋራ ኢስራኤሌ ጊብጼፔ ኬሲዴስ፥ ናቤዛ ባጋራ ኢስታ ኢሻልሲ ኦይኪዴስ።

14ጊዶ ኣቲን ኤፍሬሜይ ኢዛ ኬሂ ሃንቄዴስ፤ ኢዛ ጎዳይ ኢዚ ሱ ጉሲዳ ማላ ቆሆዛ ኢዛ ቦላ ጋና፤ ኢዚ ሌቂዛ ሌቆዛ ጊሻስ ኢዛስ ቤሲዛዝ ቃንጻና።

← Chapter 11 Chapter 13 →