2 Chronicles 27

Amharic Gamo (ጋሞ ማጻፋ)

1ኢዮኣታሜይ ካዎቲዛ ዎዴ ኢዛስ ላይይ 25፤ ኢዚ ዬሩሳላሜን 16 ላይ ካዎቲዴስ፤ ኢዛ ኣያ ሳዶቄ ቢዮ ኢዬሩሶ ጌቴታዉስ።

2ካሴ ኢዛ ኣዋ ኦዚያይ ኦዳይሳ ማላ ኢዚካ ጎዳ ሲንን ሱሬ ሚሽ ኦዴስ፤ ጊዶ ኣቲን ኢዛ ኣዋይ ጾሳ ኬ ጌሊዳ ማላ ኢዚ ጌሊቤና፤ ኣሳይ ጊዲኮ ናጋራ ኦሶ ኣጊቤና።

3ኢዮኣታሜይ ጾሳ ኬ ጌሊዛሶ ቆሞ ባጋ ፔንጌ ዛሬዲ ኦዴስ፤ ቃሴ ኦፌሌ ባጋራ ዲዛ ጊምቤዛ ዳሮ ሎኤ ኦሶ ኦዴስ።

4ዩሁዳ ዙምቡላታ ቦላ ካታማታ ኦዴስ፤ ዎራታ ጊዶን ሚጻታኔ ኣዱሳ ጊምቤታ ጊምቢዴስ።

5ኢዮኣታሜይ ኣሞኔ ካዎራ ኦሌቲዲ ጾኒዴስ፤ ኣሞኔቲ ሄ ላይ 3,400 ኪሎ ጊራሜ ዴጺዛ ቢራ፥ 10,000 ኮንታሌ ጊዲዛ ጊስቴኔ 10,000 ኮንታሌ ጊዲዛ ባንጋ ኢዛስ ጊሪዳ። ኣሞኔቲ ናምኣን ላይኔ ሄን ላይ ሄሳካ ኤሂዲ ኢዛስ ጊሪዳ።

6ኢዮኣታሜይ ባ ጎዳ ሲንን ኣማኔቴን ሲሜሬቲዳ ጊሻስ ኬሂፔ ሚኒ ሚኒ ቢዴስ።

7ኢዮኣታሜ ካዎቴ ላይን ሃኒዳ ሃኖቲ፥ ኢዚ ኦሌቲዳ ኦላቲ ኡባይኔ ኢዚ ኦዳ ኦሶ ኡባይ ኢስራኤሌ ካዎታኔ ዩሁዳ ካዎታ ታሪኬ ማጻፋን ጻፌቲ ኡቲዴስ።

8ኢዚ ካዎቲሺን ኢዛስ ላይይ 25፤ ኢዚ ዬሩሳላሜን 16 ላይ ካዎቲዴስ።

9ኢዮኣታሜይ ባ ኣዋታ ሃይቂዴስ፤ ዳዊቴ ካታማን ሞጌቲዴስ፤ ኢዛሶሆን ኢዛ ና ኣካዜይ ካዎቲዴስ።

← Chapter 26 Chapter 28 →