Psalms 20

Amharic Gamo (Geeshsha Maxaafa)

1Neni metotida wode GODAY ne woosa siyo; Yaaqoobe Xoossa sunththi nena minththi esso.

2Ba Keeththafe nees maado kiitto; Xiyooneppe maadoy yo.

3Ne yarsho ubbaa izi akeeko; ne xuuggiza yarshon izi ufayetto.

4Ne wozina amo nees immo; ne halchcho ubbaa polo.

5Ne xoonida gishshas nuni ufayssan hombocana; nu Xoossa sunththan nu bandira dhoqqu ooththana; ne woosa ubbaa GODAY nees immo.

6GODAY ba doorida kawozas xoono immizayssa tani ha7i eradis; ba ushachcha kushezan izi gita xoonon kunththana; ba geeshsha saloppeka izas zaaro immana.

7Issoti issoti bantta ola para-gaaren ammanetteettes; harati bantta paran ceeqetteettes; nuni gidikko nu GODAA wolqqan ceeqettoos.

8Istti dhuphettidi kundana; nuni gidikko dendidi minni eqqana.

9Abeet GODAWU! Kawozas xoono imma; nunikka nena xeygiza wode siya.

← Chapter 19 Chapter 21 →