Psalms 132

Amharic Gamo (Geeshsha Maxaafa)

1Abeet GODAWU! Dawitenne izi dandayda metoza ubbaa ne qoppa.

2GODAWU! Izi nees caaqqida qaala, wolqqama Yaaqoobe Xoossaska adinettida adinaa qoppa.

3Izikka, «Hayssafe sinththan tani taso gelikke; ta hiixankka kezikke;

4dhiskoka dhiskike; ta ayfetakka liiphikke.

5Hessika tani GODAAS duussaso, wolqqama Yaaqoobe Xoossas aqoso giigsana gakkanaassa» gides.

6Hekko nuni Taabotaza gishshas Efraatan dishe siyidos; Qiriyaate-Yi7aarime biittan iza demmidos.

7Nuni, «Ane izi dizaso boos; iza tohoy yedhdhizason gufannidi izas goynnoos.

8«Abeet GODAWU! Denda! Ne minoteththas malata gidida Taabotaara ne Keeth gelada shempa.

9Ne qeeseti xilloteth may7etto; geesh gidida ne asati ililetto» gidos.

10Ne aylle Dawite gishshas gaada neni tiydayssa yeggofa.

11GODAY Dawites qanththafe caaqqides; laamettontta qaalan, «Ne naytappe issaa tani ne araatan utissana.

12Ne nayti ta caaqo qaalanne tani tamaarsida qaala istti naagikko istta naytikka ne kawoteththa araatan mernaas uttana» gi caaqqides.

13GODAY Xiyoono doorides; baas de7izaso ooththanaas amottidi,

14«Hanna taas mernaas shempposo gidana; tani izo dosida gishshas izin de7ana.

15Tani izo keeha anjjana; izin de7iza manqotakka kath kalssana.

16Tani izin diza qeeseta atoteth mayzana; izin de7iza Xoossa asatikka ufayssan yexxana.

17«Ha sohon Dawite zereththafe kawo kessana; tani tiydayssas poo7o giigsana.

18Tani iza morkketa yeellachchana; gido attiin iza hu7aan de7iza kawoteththa kallachchay phoollana» gides.

← Chapter 131 Chapter 133 →