Job 42

Amharic Gamo (Geeshsha Maxaafa)

1Hayssafe guyen Iyoobi Xoossas hizgi zaarides;

2«Ta Godawu! Neni ubba miish ooththanaas dandayzayssa ta eradis; ne qofaakka dhuphi digganay deenna.

3Ta erizaara keehi guuth gidishin ta daro haasayzayssa aazas gididaakko ne oychchadasa; tumukka tani eronttayssanne akeekontta ubbaa haasayadis.

4‹Ta oyshaa ezga siyada taas zaaro imma› gadasa.

5Ta hanno gakkanaas ne gishshas erizayssi asappe siyoyssan xalla; ha7i gidikko ta ayfetan ta nena beyadis.

6Hessafe dendidayssan ta haasayda miishshati tana yeellachchida gishshas bidinththaninne gudullan uttada ta neeppe maarettana.»

7Xoossi Iyoobera haytantta ubbaa haasayettidaappe guye Temaane dere as Elfaazes, «Intte ta aylle Iyoobe mala ta gishshas likke haasayontta gishshas tani ne bollanne ne laggeta bolla hanqettadis.

8Hessa gishshas ha7i laappun wofanotanne laappun dharshota ekkidi ta oosanchcha Iyoobekko biite. Heen intte nagara gishshas xuugettiza yarsho shiishshite. Ta oosanchcha Iyoobi inttes woossana; tanikka iza woosa siyada inttena intte nagara mala qaxxaykke. Intte taas Iyoobe mala lo7o miish haasaybeekketa» gides.

9Hessafe guye Temaane dere as Elfaazey, Shuha dere as Belidaadinne Na7imaane dere as Zoofaarey biidi Xoossi istta azazida mala ooththida. Xoossika Iyoobe woosa siyides.

10Iyoobi ba heedzdzu laggetas woossidaappe guye Xoossi izi zaari durettana mala ooththides. Kase izas dizayssafe aaththidi dakko izas immides.

11He wode Iyoobe ishati, iza michchetinne kase iza erizayti ubbay iza beyanaas yida. Izara issife izason kath mida; istti izas mishettizayssa qonccisidi Xoossi iza bolla gaththida metoza gishshas iza minththeththida. Issoy issoy birappenne worqqafe oosettida midiga izas imota immida.

12Xoossi Iyoobes wurseththa de7oza koyroyssafe aaththi anjjides. Hessa gishshas Iyoobes 14,000 dorsi, 6,000 gaamellati, 1,000 waaththa boorati, 1,000 macca hareti deettes.

13Qasseka laappun attuma naytanne heedzdzu macca nayta zaari yelides.

14Macca naytappe koyroro Yimima, nam7anththayo Qexi7o, heedzdzanththoyo Qerene-Hafiko giidi sunththides.

15Biitta bolla Iyoobe macca nayta mala medha lo7o maccay beettibeenna. Istta aaway isttas istta ishatara biitta laattana mala shaakki immides.

16Hessafe guye Iyoobi 140 de7ides. Ba nayta oydanththo yeleta gakkanaas be7ides.

17Iyoobi daro layth diidi lo7o cima cimmidi hayqqides.