Job 23

Amharic Gamo (Geeshsha Maxaafa)

1Iyoobikka hizgi zaarides;

2«Ha7ikka ta wozinay camo qofaninne zuuzunththan kumides; gencecan ta woossiinkka iza kushey ta bolla deexxida mala dees.

3Izi dizasota eridaakko ay mala dosazinaashin; gede izi dizaso gakkidaakko ta ay mala ufayettaneeshin;

4ta maganaa ta izas shiishshanakkoshin; ta mishaza maarara ta izs shiishshanakkoshin.

5Taas imettiza zaarozakka ta eranakkoshin; tana izi ay gaanaakko ta eranakkoshin.

6Histtiin Xoossi ba gita wolqqara tana pirdandeshaa? Akkay; ta gizayssa izi ezgana.

7Heenkka suure asi izara marshettana; taas pirdiza Xoossay mernaas tana naxa kessana.

8«Gido attiin ta arshey mokkiza bagga biikko heen izi deenna; arshey wulliza baggaka simmiko iza demmanawu dandaykke.

9Izi gidikko pudehan ba oosaa ooththees; tani gidikko iza beyanawu dandayabeekke; duge bagga simmadakka iza demmanawu dandayabeekke.

10Izi ta tanggo ubbaa erees; tana izi paaccikokka tani worqqa mala geesh gida dishin izi tana demmana.

11Ta tohoti izi dosiza ogetara beettes; baleththon hadirsika ushachchika giikke.

12Tani iza azazotappe ke7ikke; iza qaalaakka ta miza qumappeka aaththada ta wozinan naagadis.

13«Izi barkka bana danday dees; izara eqettanay deenna; izi ba dosidayssa ubbaa ooso dandayees.

14Ta bolla izi qoppidayssa ubbaa polana; hayssa misatiza daro qofati deettes.

15Hessa gishshas iza sinththan eqoy keehi tana keehi yashshees; ta hayssa qoppada yayyadis.

16Xoossi taas wozinay daaburana mala ooththides; Ubbaa Dandayza Xoossay tana daganththides.

17Girdi gida dhumay ta ayfeta goozikkoka; sakkanna dhumay ta haasayontta mala tana diggibeenna.

← Chapter 22 Chapter 24 →