Isaiah 57

Amharic Gamo (Geeshsha Maxaafa)

1Xillo asi hayqqees; hessa oonikka wozinan woththenna; Xoossaas aqiza asata shemppoy ekettees; xilloti iitappe attana mala ekettidayssa oonikka akeekenna.

2Suureteththan bizayti saron gelana; hayqqidikka ba hiiththan saron shemppana.

3GODAY, «Intteno maro naytoo, intteno laggeththizayssanne laymatizaari zereththatoo, intte haa yiite.

4Intte oona bolla qilcceetii? Intte inxarsi oona bolla kesseetii? Intte makkallanchchata naytanne wordanchchata zare gidekketii?

5Intte wola garsaninne daashsha miththata garsan ziitan xuugettizayta gidekketii? zulletaninne zaalla za7ata garsan intte nayta yarshizayta gidekketii?

6Hanne zullen diza liiqo shuchchati nees eeqa xoossata; isttika ne qaadata; tumukka ne istta bolla ushsha yarsho gussadasa; kaththa yarshoka shiishshadasa; histtiin ha yo7ota gishshas ta co7u gaanee?

7Ne hiixa dhoqqu gida adussa zumbulla hu7en hiixxadasa; heen ne yarsho shiishshana kezadasa.

8Ne pengefenne qosilaththaafe soo baggara eeqa misleta essadasa. Tana aggada ne hiixaa qaaradasa; iza bolla kezada keeha qaaradasa; ne dosidaytara qaala giigadasa; istta kalloka be7adasa.

9Wogara zayte ekkada, shitto iza bolla gujjada Molooke geetettiza eeqa xoossaako badasa; nees kiitettizayta haako dere kiittadasa; duge si7oole gakkanaas kanththadasa.

10Ne oge daroppe dendidayssan daaburadasa; gido attiin, ‹Hidotay baawa› gabeekka. Ne wolqqay haa ooraxides; hessa gishshas argacabeekka.

11«Neni taas wordotiday, oonas yayyadaa? Oonas hirgadaa? Ne tana qoppontta aggiday, hayssaka ne wozinan qum7ontta aggiday, taas ne yayyontta ixxiday, tani co7u gida gishshas gidennee?

12Tani ne xilloteththinne ne ooso qonccisana; isttika nena go7ettenna.

13Neni maado demmanaas waassiza wode, ane ne shiishshida eeqa xoossati nena ashshetto! istta ubbaaka carkoy ekki efana; guuththa peenoy istta laalli dhayssana; gido attiin tana baas baqataso ooththida asi biittayo laattana; ta geeshsha zumayo baas miish ooththana» gees.

14GODAY, «Baasite, baasite! Oge giigsite; ta deraa ogaappe dhuphiza miish ubbaa diggite» gees.

15Dhoqqu gidayssi, Ubbaa haarizayssi, izas sunththayka Geesh geetettidayssi, mernaas de7izayssi, «kawuyidayta ayana denththeththanaas, wozinay meqqidayta minththeththanaas, dhoqqu gida geeshshasohon ta de7ays; qasseka wozinay meqqidaytaranne ayanan ashke gididaytara tani de7ana.

16Asa ayanay ta sinththan daaburontta mala ta medhdhida asaas peenoy eqqontta mala ta mernaas walassike; ta ubbato hanqettike.

17Iza nagara gishshassinne iza yiiqeteththa gishshas ta hanqettadis; ta iza qaxxayadis; ta sinththaaka hanqon izappe genththadis; gido attiin ha7ikka simmidi izi ba ogen bides.

18Tani iza ogeta be7adis; gidikkoka ta iza paththananne kaaleththana; izassinne iza gishshas yeekkiza geeshshata ta minththeththana.

19Isra7eele biittan yeekkizayta doonan ta galata woththana. Mataninne haahon dizaytas saroynne woppay gido. Tani istta paththana» gees.

20Gido attiin iitati dambalay urqqanne buura kessiza mala co7u gaanaas dandayonttayssa mala bulakettiza abba mala.

21Ta Xoossay, «Iitatas saroy baawa» gees.

← Chapter 56 Chapter 58 →