Hosea 14

Amharic Gamo (Geeshsha Maxaafa)

1Isra7eele derezoo! Intte intte nagara gaason kundida gishshas GODAA intte Xoossako simmite.

2Paaxeththa qaala ekki GODAAKKO simmidi, «Nu nagara ubbaa atto ga; nuni nu doonappe galata shiishshana mala ne maaroteththan nuna ekka.

3Asoorey nuna ashshenna; nuni ola paratankka ammanettoko; hayssafe guye nuni nu kushen medhdhida eeqa xoossata, ‹Hayti nu xoossata› gookko. Manqoti neeppe qadheteth demmeettes» giite.

4GODAY, «Ta hanqoy istta bollafe simmida gishshas taas ammanettontta ixxida ta deraa ta paththana; ta istta coo mela siiqana.

5Tani Isra7eele asaas puuse ira mala gidana; isttika lo7o ciishsha mala ciiyana; Libaanoose ziga mala xapho yeddana.

6Istta haggay diccana; wogara miththa mala istti lo7ana; Libaanoose ziga mala lo7o sawo sawana.

7Istti simmidi ta kuwa garsan uttana; Caarechcha kaththa mala istti cililana; woyne miththa mala istti ciiyana. Istta sunththi Libaanoose dere woyne ushsha mala ubbason erettana.

8Efreemee! Taassinne eeqa xoossatas ay gaytoteththi dizee? Ne woosa siyizaynne nena naagizay tana; Tani ubba wode cilili uttida miththa mala; ne ayfizay taappe dendidayssanna» gees.

9Aadho eranchchay ha yo7ota akeekana. Akeekizaadey ha yo7ota erana; GODAA ogey suure; xilloti izan hemetteettes. Nagaranchchati gidikko izan dhuphetteettes.