Revelation 10

Amharic Dawro (Ooratha Caaquwaa)

1ቃሲካ ታኒ ሃራ ዎልቃማ ኪታንቻይ ሳሉዋፔ ኬሲዴ፥ ዱጌ ዎꬊያዋ ቤዓዲ። ሻሪያ ኢ ማዪ ኡቴዳ፤ ቃሲ ዙሉ ኣ ሁጲያ ዩዪ ኣꬊ ኡቴዳ። ኣ ዴሙካ ኣዋ ማላ፤ ኣ ጌዲካ ታማ ቱሳ ማላ።

2ሄ ኪታንቻይ ዶያ ዴዒያ ኢቲ ጉꬃ ፃፄቶ ማፃፋ ባሬ ኩሺያን ኦይቄዳ። ባሬ ኡሼቻ ጌዲያ ኣባ ቦላ ኤሲዴ፥ ባሬ ሃዲርሳ ጌዲያ ቢታ ቦላ ኤሴዳ።

3ጉዲያ ጋሙዋዳን፥ ዎልቃፔ ጉዴዳ። ኢ ጉዴዳዋፔ ጉዪያን፥ ላፑ ዳዳቱ ኣናና ጉንꬃን ሃሳዬዲኖ።

4ኡንቱንቱ ጉሜዳ ዎዴ ታኒ ፃፋናው ቆፓዲ። ሺን ሳሉዋፔ፥ «ላፑ ዳዳቱ ሃሳዬዳዋ ኣሳው ቃቶፓኔ ፃፎፓ» ያጊያ ኮሻይ ታው ሲሴቴዳ።

5ሄዋፔ ጉዬ፥ ኣባ ቦላኒኔ ቢታ ቦላን ኤቂዴዒሺን ታኒ ቤዔዳ ኪታንቻይ፥ ባሬ ኡሼቻ ኩሺያ ሳሉዋ ፑዴ ሚጬዳ።

6ሳሉዋኔ ሳሉዋን ዴዒያ ኡባባ፥ ሳዓኔ ሳዓን ዴዒያ ኡባባ፥ ኣባኔ ኣባን ዴዒያ ኡባባ፥ ሜꬌዳ ሜꬊ ሜꬊናው ዴዒያ ፆሳ ሱንꬃን ጫቄዳ። ያቲዴ፥ «ዎዲ ዉራናው ጋሚዔና።

7ሺን ላፑንꬃ ኪታንቻይ ባሬ ማላካታ ፑኒያ ዎዴ፥ ፆሳይ ናባቱዋ ጊዴዳ ባሬ ኣሺካሬቶ ቃላ ኦዲ ዎꬄዳዋዳንካ፥ ኢ ፁሬዳ ቆፋይ ፖሌታና» ያጌዳ።

8ሄዋፔ ጉዪያን፥ ሳሉዋፔ ሃሳዪሺን ታኒ ሲሴዳ ኮሻይ ላዔንꬁዋ ዛሪዴ ታና፥ «ኣባ ቦላኒኔ ቢታ ቦላን ኤቄዳ ኪታንቻ ኩሺያን ዶያ ዴዒያ ፃፄቶ ማፃፋ ባዴ ኣካ» ያጊያዋ ሲሳዲ።

9ታኒ ሄ ኪታንቻኮ ባዴ፥ ጉꬃ ፃፄቶ ማፃፋ ታው ኢማና ማላ፥ ኣ ኦቻዲ። ኢ ታና፥ «ኣካዴ ማ፤ ማፃፋይ ኔ ኡሉዋ ጫሚሳናዋ፤ ሺን ኔ ዶናን ኤሳዳን፥ ኢ ማልዓናዋ» ያጌዳ።

10ሄዋፔ ጉዬ፥ ታኒ ኪታንቻ ኩሺያፔ ሄ ጉꬃ ፃፄቶ ማፃፋ ኣካዴ ማዲ፤ ታ ዶናን ማፃፋይ ኤሳዳን ማልዔዳ። ሺን ታኒ ሜዳዋፔ ጉዪያን፥ ታ ኡሎ ጊዱ ጫሜዳ።

11ቃሲካ ታና፥ «ያራ ኡባ፥ ዛሪያ ኡባ፥ ዱማ ዱማ ቢታ ቃላኔ ካታቱዋባ ኔኒ ቲምቢቲያ ቃንፄናን ሃሳያናው ቤሴ» ያጌዳ።

← Chapter 9 Chapter 11 →