Psalms 86

Amharic Dawro DFBLVL (Geeshsha Mas'aafaa)

1Abeet Godaw, taani hiyyeessanne, metootanchchaa asaa gidiyaa diraw, ta waasuwaa sisaade, taw alla.

2Taani S'oossaa asaa gidiyaa diraw, taana pas'a wotsa. Neenan ammanettiyaa taana, ne k'oomaa ashsha. Neeni ta S'oossaa.

3Abeet S'oossaw, taani gallassaa ubbaa neekko waassiyaa diraw, taw k'aretta.

4Abeet S'oossaw, taani ta shemppuwaappe neena woossiyaa diraw, taana, ne k'oomaa nashshechchaa.

5Abeet S'oossaw, neeni keekkanne atto giyaawaa; neena s'eesiyaa ubbaw ne siik'uu dara.

6Abeet Med'inaa Godaw, ta woosaa sisa; taani watiwatiyaa watiwatuwaa hayzza.

7Neeni taw alliyaa diraw, ta metuwaa gallassan taani neekko waassay.

8Abeet Godaw, s'oossatuwaa giddon ne mali baawa; ne oosuwaa mala oosuukka baawa.

9Abeet Godaw, neeni med'd'eedda kawutetsaa Asay ubbay yiide, ne sintsan gulbbatana; unttunttu ne suntsaa bonchchana.

10Ayaw gooppe, neeni wolk'k'aama; neeni malalissiyaabaa ootsaasa. Ne s'alalay S'oossaa.

11Abeet Med'inaa Godaw, taani ne tumuwaan hamettana mala, taana ne ogiyaa tamaarissa. Taani ne suntsaw yayana mala, taw itti wozanaa imma.

12Abeet Godaw ta S'oossaw, taani neena, ta kumentsaa wozanaappe galatana. Ne suntsaa med'inaw bonchchana.

13Ayaw gooppe, ne siik'uu taw dara; neeni taana duufuwaan geliyaawaappe ashshaada.

14Abeet Godaw, otoranchcha asatuu ta bolla denddeeddino; dagantsiyaa asatuwaa c'uguu taana wod'anaw koyee. Unttunttu neena alaalle giikkino.

15Shin abeet Godaw, neeni k'arettiyaanne maariyaa S'oossaa; hank'k'ettanaw gam"aasa; siik'uunne ammanettussay dariyaawaa.

16Taakko simmaade taw k'aretta. Ne k'oomaw wolk'k'aa imma; ne k'oomati na'aa taana ashsha.

17Abeet Med'inaa Godaw, ne keekkatetsaa malaataa taana bessa. Neeni taana maaddeeddawaanne mintsetseeddawaa be'iyaa wode, taana is's'iyaawanttu hewan yeellatana.

← Chapter 85 Chapter 87 →