Psalms 77

Amharic Dawro DFBLVL (Geeshsha Mas'aafaa)

1Taani S'oossaw magannay; taana siso gaade taani S'oossaa woossay.

2Taani ta metuwaa gallassi Godaa koyay. K'amman taani shemppennan ta kushetuwaa aakko mic'c'ay; gidooppenne, taani minettanaw danddaykke.

3Taani S'oossaabaa k'oppiyaa wode, oolay; taani aabaa yuushsha k'oppiyaa wode, ta shemppuu daaburee.

4Neeni k'amma ubbaa taana gem"ishshuwaa diggaade ahissaasa. Taani loytsa hirggiyaa diraw, haasayanaw danddaykke.

5Taani aad'd'eedda gallassatuwaa k'oppay; kase laytsatuwaakka hassayay.

6Taani k'ofaa sheekkaade ak'ay; ta wozanay yuushshi k'oppiyaa wode, Taani ta huup'iyaa hawaadan yaagaade oochchay;

7«Goday nuuna med'inaw aggi bashanee? Zaaretsiide I nuuna keekaa bessennee?

8Aa siik'uu atteedee? I geeddawe hawaappe sintsanaw sa'aan ootsenee?

9S'oossay maariyaawaa dogeeddee? Bare k'aretaakka hank'k'uwaan laammeedee?» yaagaade oochchay.

10K'aykka taani, «Taana k'oheeddawe, Ubbaappe D'ok'k'iyaa S'oossaa ushechcha kushii, kaseppe maaddiyaa maaduwaa aggeedawaa» yaagay.

11Med'inaa Godaw, ne oosotuwaa taani k'oppana. Ee; neeni beni wode, ootseedda malalissiyaabatuwaa ubbaa taani hassayana.

12Ne ootseeddawaa ubbaa, taani zaara zaaraadde k'oppana; ne wolk'k'aama oosotuwaa ubbaa taani yuushsha k'oppana.

13Abeet S'oossaw, ne ogii geeshsha; ay s'oossinne nu S'oossaa mala wolk'k'aama gidenna.

14Neeni malalissiyaabaa ootsiyaa S'oossaa. Asaa giddon ne wolk'k'aa k'onc'c'issiyaawaa.

15Ne asaa, Yaak'oobanne Yooseefo zeretsatuwaa, ne k'esiyaan wozaadda.

16Abeet S'oossaw, haatsatuu neena be'eeddino; haatsatuu neena be'iide yayyeeddino. Abbaa c'iimmatuukka kokkoreeddino.

17Shaaretuu iraa duge zaariide tigeeddino; guuguntsay saluwaan guummeedda. Ne walk'k'antsay yaan haan walk'k'ammeedda.

18Ne guuguntsay guntsay gotiyaa giddon kooshummeedda; ne walk'k'antsaa p'ooletsay sa'aa poo'isseedda. Biittaykka gaji gajiide kokkoreedda.

19Neeni abbaa gidduwaana hamettaasa; c'iimmo abbaa gidduwaana aad'aassa; gidooppenne, ne gedii yed'd'eedda sa'ay beettena.

20Musenne Aaroona kushiyan neeni ne asaa dorssaa wudiyaadan kaaletsaadda.

← Chapter 76 Chapter 78 →