Psalms 69

Amharic Dawro DFBLVL (Geeshsha Mas'aafaa)

1Abeet S'oossaw, taana ashsha; ayaw gooppe, haatsay taw k'ood'iyaa gakkeedda.

2Gedii ek'k'iyaa sa'ay bayinna c'ariyaan muukettaad; c'iimmo haatsaa giddo gelaad; haatsaa zuluu ta bolla baana hanee.

3Maadoo waassaade daaburay; ta kottoniikka meleedda. Ta S'oossay allee gaade s'eellishin, ta ayifii galjjeedda.

4Taana c'oo is's'iyaawanttu, ta huup'iyaa binnaanaappe dara. Wordduwaan taana morkkiyaawanttunne, d'ayissanaw koyiyaawanttu dareeddino. Taani wolk'k'antsa akkabeena miishshaa taana c'iggisiino.

5Abeet S'oossaw, ta bayzzuwaa eeyyatetsaa neeni eraasa; taani ootseedda nagaray neeppe k'osettenna.

6Abeet Godaw, Ubbaappe Wolk'k'aama Med'inaa Godaw, neena hidootan naagiyaawanttu, ta gaasuwaan yeellatoppino. Abeet Israa'eeliyaa S'oossaw, neekko shiik'iyaawanttu ta gaasuwaan kawushoppino.

7Taani boriyaa danddayeeddawenne ta som"ii yeellaa mayyeeddawe ne diraassa.

8Taani ta ishatoo imatsaa, k'ay ta aatti naanaatoo allaga gidaaddi.

9Taani ne golliyaw seelettiyaa seelay, taana tamaadan guuddee; neena boriyaawanttu borii ta bolla wod'd'eedda.

10Taani s'oomaade, ta huup'iyaa kawushsheeddawe, taw k'iliic'uwaa gideedda.

11Taani kayyuwaa mayuwaa mayyeedda wode, unttunttoo tossaw gidaaddi.

12Katamaa Penggiyaan uttiyaawanttu taana k'iliic'iino; matsottiyaawanttu tabaa yetsaa kessiino.

13Shin abeet Med'inaa Godaw, taana gidooppe, taani neena woossay. Abeet S'oossaw, ne dosiyaa wodiyaan, aggena ne siik'uwaa daruwaan, neeni ashana geeddawaadan taw zaaruwaa imma.

14C'ariyaan muukettenaadan taana ashsha. Taana is's'iyaawanttuppe, c'iimmo haatsatuwaappe neeni kessa akka.

15Haatsaa di"uwaan taana afissoppa; woy c'iimmo olaan taana mitissoppa; woy duufuwaa doonaa ta bolla gorddisoppa.

16Abeet Med'inaa Godaw, aggena ne siik'uwaa keekkatetsaadan, taw zaaruwaa imma. Ne k'aretaa daruwaadan taakko simma.

17Taappe ne k'oomaappe ne som"uwaa gentsoppa; taani waayettiyaa diraw, taw elle zaaruwaa imma.

18Neeni taakko shiik'a; taana woza; ta morkkatuwaappe taana la"a kesa.

19Taani boriyaa, yeellaanne, kawushshaa akkeeddawaa neeni eraasa. Ayaw gooppe, ta morkkatuwaa ubbaa neeni be'aasa.

20Borii ta wozanaa pas'ennaadan mentso diraw; hidoota k'ans's'aad. Taw k'arettiyaawaa koyaad. Shin ittuunne baawa; taana mintsetsiyaa asaa s'eellaad; shin demmabeykke.

21Taani koshateedda wode, taw c'ammiyaa k'umaa aatseeddino. Taani saametteedda wode, taw c'aala woyniyaa eessaa immeeddino.

22Unttunttu miyaa samppay unttunttoo p'ire gido. Unttunttu yarshshuwaa yarshshiidde, miyaa gibiray unttunttoo gitiyaa gido.

23S'eellennaadan unttunttu ayifii goozetto; unttunttu gaaduwaa ubbaa gede kokkorssa.

24Ne hank'k'uwaa unttunttu bolla tiga; ne suulo hank'k'uu unttuntta yederssiide oyk'k'o.

25Unttunttu kambbuu mela de'o; unttunttu dunkkaaniyaan ooninne de'oppo.

26Ayaw gooppe, unttunttu, neeni mureeddawantta yederssiino; k'ay neeni dechcheeddawanttu tuggaabaa dentsiide haasayiino.

27Neeni unttunttu nagaraa bolla nagaraa gujjanaadan agga; ne maarotetsaappe unttuntta ayaynne gakkoppo.

28Unttunttu de'uwaa mas'aafaappe k'uc'ettino; s'illo asaana mazggabettoppino.

29Taani sakettaadenne tuggataade de'ay. Abeet S'oossaw, taana ashshaade, saro sa'aan wotsa.

30Taani S'oossaa suntsaa yetsan galatana; galataa imuwaan Aa darssana.

31Hewekka, booraa yarshshiyaawaappe woy kac'aama korumaa yarshshiyaawaappe aad'd'iide, Med'inaa Godaa nashshechchana.

32Naak'etteeddawanttu taana S'oossay, ashsheedawaa be'iide nashetino. Hinttenoo S'oossaakko shiik'iyaawanttoo, hintte wozanay minetto.

33Ayaw gooppe, Med'inaa Goday hiyyeesatuwaa sisee; k'asho golliyaan de'iyaa bare asaakka kad'enna.

34Saluunne sa'ay, k'ay abbayinne Aa giddon wos's'i k'aas's'iyaa ubbatuu S'oossaa galatino.

35Ayaw gooppe, S'oossay S'iyoone ashshana; Yihudaa katamatuwaa zaariide kees's'ana. Aa Asay yaan de'ananne he biittay unttunttussa gidanawaa.

36Aa k'oomatuwaa naanatuu he biittaa laattana; Aa suntsaa siik'iyaawanttu yaan de'ana.

← Chapter 68 Chapter 70 →