Psalms 65

Amharic Dawro DFBLVL (Geeshsha Mas'aafaa)

1Abeet S'oossaw, S'iyoonen new galatay bessee; nuuni new shiik'etteeddawaakka gatsana.

2Abeet woosaa sisiyaawoo, asay ubbay neekko yaana.

3Nu nagaray nuuna muukkeedda wode, ne nuw atotetsaa immaadda.

4Neeni dooreeddanne ne chilootan uttanaw mataa shiishshiyaa Asay anjjetteeddawaa. Nuuni ne son, Geeshsha Dunkkaaniyaan de'iyaa lo"oban kumeeddo.

5Abeet nuuna ashshiyaa S'oossaw, maalalissiyaa ne s'illo oosuwaan neeni nuw allaasa. Sa'aa gas'aappe gas'aa gakkanaw, haakko abbatuwaappekka hefintsan de'iyaa asaa ubbaw, ammanettiyaawe neena.

6Neeni neena wolk'k'aa danc'c'isaade; wolk'k'aama deretuwaa ne minotetsan essaadda.

7Neeni abbaa kooshshaanne, beetaa guntsaa sirp'p'i ootsaasa; k'ay Asay denddiyaa dendduwaa irs's'issaasa.

8Hewaadan neeni ootseedda malaataa diraw, sa'aa gas'aa gakkanaw de'iyaa Asay ubbay new, «Hoola!» gee. Away mokkiyaasaappe wulliyaasaa gakkanaw de'iyaa asaa ubbaa nashechchaadda.

9Neeni biittaa naagaade iraa bukissaasa; yaataade daro tu'eyaasa. Asaw katsay mokkana mala, S'oossaa pulttotuu haatsaan kumeeddino; hewaadan ootsaade neeni giigissaadda.

10Kaachaa wod'ana malanne guulluwaa shugissana mala, neeni yafaran haatsaa kuntsaassa; katsay mokkana mala anjjaasa.

11Laytsaa kalo laytsaa ootsaasa; neeni aad'd'iyaa sa'ay ubbay kumi palahee.

12Neeni hentsaa sa'aa maatan kuntsaassa; zoozetuwaakka nashshechchaa danc'c'isaasa.

13Neeni hentsaa gadiyaa dorssaa wudiyaa mayzzaasa; zanggaaraa biittaakka katsaa kuntsaa. Unttunttu nashshechchaw hombboc'iinonne yes's'iino.

← Chapter 64 Chapter 66 →